專有名詞
專有名詞（粵拼：zyun1 jau5 ming4 ci4；英文：proper noun），簡稱專名[1]:3644，又叫固有名詞[2]（日式中文），係名詞嘅一種，指隻名詞係指緊一件特定嘅物體，例如「歐洲」（指緊一笪地方）、「阿莊」（指緊一個人）或者「微軟」（指緊一間企業）都係固有名詞。
標點符號
編輯現代中文有專名號及書名號，一共兩種用於專有名詞嘅標點符號；後者會用嚟標示文藝作品等嘅名，其他嘅就只可能會用前者標示。佢哋嘅用法，以下列兩類為主。
傳統式
編輯當取此風格，文字橫排時，底綫式專名號及底綫式書名號皆會用到，每逢遇到專有名詞彼此連接，佢哋嘅底綫都要稍為分開；文字直排時，啲綫會劃喺啲字嘅左邊。由於佢同好多電子系統唔相容，現時已經式微，不過仍然會用於部分繁（／正）體字教科書及加咗其他現代標點符號嘅古文，基礎教育亦會將此傳授予學生。
流行式
編輯取此風格時，無論文字係橫排定係直排，都唔用專名號，只用前後括號式書名號。現時佢喺所有中文地區都好流行，無論文字係以電子檔案定係印刷品形式出現，原因之一係電子系統擅長處理佢哋；同樣嘅幾個符號，按大陸及台灣標準，用法分別頗大。香港及澳門都主要用繁（／正）體字，政府揀咗大陸嗰套標點風格而民間就鍾意跟台灣。
攷
編輯- ↑ 教育部重編國講辭典編輯委員會編 (1981)。《重編國語辭典》。第4卷 (第2版)。台北：臺灣商務印書館。
- ↑ 〈固有名詞及人稱代名詞之中日對譯研究 -以吳明益≪天橋上的魔術師≫為例-__臺灣博碩士論文知識加值系統〉。ndltd.ncl.edu.tw。喺2022-10-12搵到。