大嶼山

大嶼山（「嶼」字有地名變讀，讀「如」；粵拼：daai6 jyu4 saan1；英文：Lantau Island，原爲Lantao，南大澳之葡音），有時亦叫大嶼，係香港一島，係香港各島之中最大。喺佔西南一帶。大嶼山面積有一百四十四平方公里，大過香港島百分之八十四左右。行政上，大嶼山大部分歸入離島區，但係大嶼山東北，因爲舊時居民生活靠荃灣，就歸荃灣區，當中包括陰澳、竹篙灣同埋汲水門等。

大嶼山以前交通唔方便、遠離市區，唔少地方都未開發；但因為咁，大嶼山就成為咗香港市民度假嘅勝地。之不過，二十世紀九十年代尾，赤鱲角新機場起好，有東涌新市鎮，有機場核心計劃中嘅青馬大橋同汲水門大橋，大嶼山同市區就駁通晒。香港人同遊客好易去大嶼山。

史上文獻，如鄭和之航海圖，又有大奚、小奚。大奚就係大嶼山，因爲島之故，又寫大奚山。《香港雜記》繙英文Lantao做靈濤，叫靈濤島或靈濤之島。