維基百科

張國榮

香港創作歌手同演員 (1956-2003)
  想搵第二個意思嘅話，請睇張國榮 (搞清楚)。

張國榮（粵拼：zoeng1 gwok3 wing4，英文：Leslie Cheung ; 1956年9月12號—2003年4月1號），原名張發宗，係香港男歌手、演員同埋詞曲創作者，亦曾做過電影配樂、排舞、音樂錄像導演同埋藝術總監，響中國以至亞洲亦都有住巨大嘅影響力。2005年入選中國電影表演藝術學會嘅「中國電影百年百位優秀演員」，2010年入選美國CNN「史上最偉大二十五位亞洲演員」。

張國榮
Leslie Cheung
張國榮喺1999年影嘅相
男藝人
原名張發宗
羅馬拼音Cheung Kwok Wing
英文名Leslie Cheung
花名哥哥
Leslie
國籍國籍：
 英國屬土
（1956–1997）
 中國（香港）[1]
（1997–2003）
公民權：
加拿大 加拿大非稅務居民[2]
籍貫廣東梅縣
出世1956年9月12號
英屬香港九龍
死2003年4月1號(2003-04-01)（46歲）
 香港中環文華東方酒店
死因抑鬱症而跳樓身亡
職業
  • 歌手
  • 作曲+詞人
  • 演員
語言
  • 粵文
  • 英文
  • 國語
  • 客家話
  • 日文
教育程度英國 英國列斯大學紡織系一年級（中退）
母校聖璐琦書院（小學部）
佛教黃鳳翎中學
玫瑰崗學校
Eccles Hall School
列斯大學
威靈頓英文中學（高街分校）
宗教信仰冇
父母
演奏樂器聲樂
出道地 英屬香港
出道日期1977年
出道作品《I Like Dreamin'》（唱片）
《紅樓春上春》（電影）
代表作品歌：
電影：
  • 《阿飛正傳》
  • 《春光乍泄》
  • 《霸王別姬》
  • 《東邪西毒》
  • 《倩女幽魂》
活躍年代1977年－2003年
唱片公司
經紀公司
簽名
相關團體張國榮官方歌迷會
網路電影資料庫（IMDb）資訊
獎
香港電影金像獎
最佳男主角
1991年 《阿飛正傳》
香港電影評論學會大獎（中文：香港电影评论学会大奖）
最佳男主角
1994年 《東邪西毒》
十大中文金曲頒獎典禮
金針獎
1999年
其他獎
最受歡迎男歌星 – 十大勁歌金曲
1988年、1989年

叱吒樂壇男歌手金獎 – 叱吒樂壇流行榜
1988年、1989年
榮譽大獎 – 十大勁歌金曲
1999年
致敬大獎 – 十大勁歌金曲
2000年

最佳男主角 – 日本影評人協會大獎
1993年 《霸王別姬》

九龍出世，老豆係香港有名嘅裁縫張活海。曾經到英國留學。1976年獲得《亞洲歌唱大賽》亞軍之後加入麗的電視正式出道。但一開始出嘅唱片銷量並唔好，試過賣唔出去、被嘲「好似隻雞」，直至1983年憑住《風繼續吹》同《Monica》打響名堂，喺1984至1989年間推出《有誰共鳴》、《無心睡眠》、《沉默是金》等作品，成為香港樂壇巨星；亦因此獲獎無數，曾經響《十大勁歌金曲頒獎典禮》連續兩屆攞「最受歡迎男歌星」同埋叱咤樂壇流行榜男歌手金獎。1989年退出歌壇，1995年復出。2000年獲得十大中文金曲頒獎音樂會金針獎。

除咗歌唱，佢亦有出演電影，初時主要扮演「純情男孩」，但未獲成功，響1986年拍嘅電影《英雄本色》先至令佢響影壇打開知名度。1989年響退出歌壇後就進軍影壇，籍住《阿飛正傳》攞到第十屆香港電影金像獎影帝。1993年嘅《霸王別姬》更係令佢響國際打出知名度，攞到第4屆日本電影影評人大獎嘅最佳外語片男主角、第8屆東京影展電影評論家大獎最佳男主角；而呢套戲亦被認為係中國文藝電影嘅代表作之一。1997年主演嘅《春光乍洩》令佢成為LGBT文化嘅代表人物。2003年4月1號因抑鬱症墮樓身亡，終年46歲。

名字

編輯
 
當時響《亂世佳人》入面扮偉希禮嘅萊斯利·侯活：張國榮改英文名嘅靈感同來源

其實張國榮出世名係「張發宗」，但根據初中同學嘅講法，佢響中學時期已經改咗名叫「張國榮」[3]。

原先英文名係叫做「Bobby」（一寫為「Bobbie」），響英國留學嗰陣改做「Leslie」，原因為佢好鍾意英國男演員萊斯利·侯活（英文：Leslie Howard，代表作係響《亂世佳人》入面扮偉希禮）。佢曾經響1989年嘅演唱會上面提過：「我點解叫Leslie呢？其實我細個係叫做Bobby，但係我又好驚被人誤會我係一種動物，所以就改咗一個比較sexy一啲嘅名Leslie。」「呢個名既可以男仔用又可以女仔用，幾中性。」[4]

早年

編輯

張國榮係客家人，祖籍廣東梅縣，1956年9月12號響香港九龍出世，喺屋企十個細路之中排最細[4]，所以有「十仔」呢個乳名。老豆係出名裁縫張活海（1910 - 1989），專為荷里活明星縫製洋衫，影星馬龍·白蘭度、加利·格蘭、導演亞弗列·希治閣都係張活海嘅客人之一[5]；阿媽潘玉瑤（1919 - 1998）係張活海嘅正妻[5]。張國榮後嚟曾經透露自己阿爺係廣東省嘅大地主，響文革被當時嘅政府批鬥致死，所以老豆走咗落嚟香港[6][7]。

張國榮細個曾經住響老豆位於中環嘅工廠[5]，後嚟搬到灣仔道81號一棟五層高嘅別墅同父母分開住[8]。佢成日話自己有個不幸嘅童年，因老豆花心、加上響出面有兩個小妾，令到老豆同阿媽關係一直唔好，所以張自細淨係得工人六姐關心佢[7]。佢曾經咁樣講：「可以話同老豆住埋一齊得五日，而同阿媽就係半年。」[7]由於童年少咗父母嘅關愛，令佢同父母關係非常疏遠[5]。張活海同潘玉瑤生咗十個仔女，其中阿三、阿四同阿九響出世無耐就夭折，存活落嚟嘅只有七個仔女，張國榮係最細[9]。響七兄弟姐妹中，張國榮同大姐張綠萍關係最好。張綠萍後嚟亦響好多事情上全力支持張國榮[10]。

佢小學時期入讀聖璐琦書院（小學部），期間表現出好高嘅音樂才華：成日參加校內音樂節、朗誦同埋綜藝表演，仲曾經兩次得到英詩朗誦冠軍。1968年升讀銅鑼灣佛教黃鳳翎中學，一年後轉校到玫瑰崗學校，除咗英文科之外嘅科目成績都麻麻地，個時張國榮對西方電影有好大興趣，成日研究《殉情記》嘅原聲帶。但係張國榮嘅成績一直未如理想[11]，甚至到咗要留班嘅邊緣[11]，老豆張活海見到佢咁嘅成續火都嚟埋，於是響1972年直接送佢去英國嘅Eccles Hall School讀書[12]，而張國榮響禮拜六、日會兼職做調酒師，有時又響修安嘅一間由親戚開嘅餐廳做業餘駐唱[13]。後嚟響英國高級程度會考中成績優異，其中英文科攞到A級成績，成功升讀英國列斯大學（Leeds University）紡織系，攞埋獎學金[14]。張國榮讀紡織系本身係打算繼承老豆嘅西裝生意，但一年後老豆中風，老豆想自己臨死前仔女可以留響自己身邊，所以張國榮被迫退學返香港，有一段時間響Levi's做牛仔褲sales，又響律師行打過工[15]。之後張國榮決定繼續求學，入讀堅道英文書院（即威靈頓英文中學水街分校）[16]；冇耐轉讀威靈頓英文中學（高街分校）中五，由於當時佢嘅中文水平差過英文太多，於是佢選擇主修中文[17]。畢業後，張國榮有段時間住響長洲，後嚟為咗生活而到市區搵工作[18]。

歌唱事業

編輯

成為歌手

編輯

張國榮響讀緊威靈頓英文中學（高街分校）嗰陣就曾經同人夾band「ONYS」，佢自己做主唱，甚至參加過公開歌唱比賽[15]；響英國留學期間亦曾經響餐廳做駐唱[13]。1976年，張國榮一位中意玩音樂嘅朋友參加麗的電視（亞洲電視前身）舉辦嘅亞洲音樂歌唱大賽，咁就順便幫張國榮報埋名[19]。試音個陣評選之一莫何敏儀認為張國榮又靚仔又後生，所以畀佢高分數，令佢成功進入準決賽[20]。張國榮嘅父母得知後一直非常反對，只有工人六姐同大姐張綠萍支持佢繼續追夢，而呢兩個人嘅支持亦成為張國榮堅持嘅動力[21]。張國榮響準決賽以揀咗以美國歌手當·麥連嘅《American Pie》參賽，當時嘅評選之一黎小田認為《American Pie》太長，要求張國榮縮短時間，張國榮唔肯，話「It doesn't make sense」（咁唔合理）[22]，評判覺得張國榮太串，所以張國榮開口唱咗得幾句就畀人叮走[23][24]。後嚟張國榮要求畀佢清唱，最終過關，獲得香港區亞軍，成功進入亞洲音樂歌唱大賽總決賽，但響亞洲區四甲不入[25]。張國榮響成為香港區亞軍後畀寶麗金列為旗下基本歌手，響試音後就簽約[26]。

出道初期

編輯

佢第一張唱片《DAYDREAMIN’》係英文歌，1978年推出，流住當時最興嘅椰殼頭，睇得出佢嗰陣嘅風格已經好前衛[27]；1979年又推出咗粵語唱片《情人箭》，但呢張唱片畀人批評把聲「好似隻雞」，甚至最後淪落到要一蚊一張唱片嘅地步[28]。張國榮後嚟亦坦言呢兩套唱片係「完全嘅失敗」[28]。佢嗰陣時並唔紅，尤其係佢嘅形象帶有占士甸（James Byron Dean）嗰種反叛同埋浪漫，當年大眾唔太接受[29]。喺一次響沙田嘅戶外表演中佢向現場觀眾掟帽，但帽就被人掟返轉頭，現場觀眾重柴佢臺[29]。由於出道初期成績並唔理想，張國榮曾經好迷茫，響歌唱比賽時就認識嘅前輩黎小田鼓勵佢繼續唱歌，又建議佢先專心響音樂事業，出返三幾張唱片先，因此黎小田響1982年帶住張國榮轉投華星唱片[23]。而當時唱片公司覺得張國榮潛力唔大，唔想栽培佢，就咁畀佢走[28]。

黎小田非常欣賞張國榮嘅風格，認為張嘅音域夠廣[24]但聲線太尖，要求張國榮個key降低音啲，要有返男人嘅磁性，亦要改善吞音嘅問題[30]；而張國榮響聽取黎小田嘅建議後，聲線的確Sexy咗好多，之後亦冇人再批評過佢把聲[23]。黎小田當時有份製作張國榮嘅專輯，認為當下翻唱日文歌係大勢所趨，就揀咗唔少日文歌畀佢唱[30]。1983年，佢推出個人第三張唱片《風繼續吹》裏面同唱片同名嘅廣東話主打歌（翻唱自山口百惠嘅《さよならの向こう側》），為張國榮打響頭炮[31]。唱片公司見張國榮唱片賺到錢，於是開始為佢嘅唱片發行錄音帶版本[32]。1984年，佢憑《Monica》（翻唱自吉川晃司同名歌曲）一曲首奪十大中文金曲同埋TVB十大勁歌金曲嘅金曲獎，而唱片《Leslie》仲打破咗當時香港一直以抒情歌曲做主調嘅路線，用充滿青春嘅風格探入民心，開啟香港樂壇快歌勁舞時代，成為香港流行音樂史上具有里程碑意義嘅作品，瞬間就變成天王級歌手[31]。

巔峰時代

編輯

1985年，張國榮發行唱片《為你鍾情》，同上一張唱片《Leslie》主打快歌唔同，今次作品以情歌做主打。因為覺得白膠唱片比當時主流嘅黑膠唱片外表更好，張國榮就決定新唱片係白膠唱片。《為你鍾情》係香港第一張白膠唱片，並開創咗香港有色膠唱片嘅先河。呢次唱片分別有兩隻歌打入十大中文金曲，分別係同名主打歌《為你鍾情》同埋《不羈的風》，開始響派台成績方面嶄露頭角。[33]

1986年張國榮發行咗兩張唱片，分別係《Stand Up》同埋《愛火》。其中《Stand Up》延續《為你鍾情》有色膠嘅作風，同時間發行黃、綠、紫同黑色一共四款膠片，成為一時佳話[34]。而《愛火》所收錄嘅同名主打歌由張國榮填詞，係佢第一次參加歌曲嘅幕後製作[35]。當年張國榮一人喺十大勁歌金曲獨佔七隻歌；同時亦有五首歌入選香港電台龍虎榜冠軍歌曲，均為眾歌手之眾。而佢響主演嘅電影《英雄本色》入面唱主題曲《當年情》，亦入選十大中文金曲。同年發表嘅歌曲《有誰共鳴》令佢第一次奪得十大勁歌金曲頒獎禮壓軸大獎金曲金獎。同年年尾佢獲邀擔任《香港小姐競選》嘅司儀。[36]

1986年年尾張國榮同華星唱片合約快要到期，而其經紀人陳淑芬宣佈自立門戶恆星娛樂，所以張國榮選擇跟住陳淑芬離開華星，加入當時新成立嘅新藝寶，表示係睇中新公司嘅自由度[37]。新藝寶老細陳少寶當時形容張國榮嘅轉投係「香港音樂史最轟動嘅跳槽」[37]。陳少寶亦想張國榮翻唱日文歌，但唔似黎小田咁搵到好歌就畀張唱，而係確定要乜再去搵合適嘅歌[38]。最終張國榮響1987年8月發行轉投新藝寶後嘅第一張大碟《Summer of Romance》[39]。張以往嘅作品都係由黎小田監製，新作品嘅監製則換上太極樂隊嘅成員唐奕聰，由此張國榮往後十幾年就一直同唐奕聰保持合作同埋友好嘅關係，後嚟唐更成為張嘅御用製作人[40][41]。《Summer of Romance》響商業方面大獲成功，其香港本地銷量超過七白金（35萬張），係1987年香港銷量最高嘅唱片，並獲頒第十屆十大中文金曲IFPI全年銷量冠軍大獎，開啟張國榮嘅巔峰時代[42]。碟裏面嘅《無心睡眠》更加係香港樂壇經典快歌之一，橫掃當年各大頒獎典禮嘅獎項，獲得1987年度十大勁歌頒獎禮金曲金獎、十大勁歌金曲獎、十大中文金曲獎[43]。為咗打開日本市場，陳少寶安排張國榮出席同年嘅東京音樂節[38]，並響大碟《Summer of Romance》中附送張國榮響東京拍嘅寫真[44]。

1988年，佢推出寫真集《Stark Impressions》，係繼羅文後香港第二位男歌手推出寫真集。同年佢推出咗兩張唱片《Virgin Snow》[45]同埋《Hot Summer》[46]。張響《Virgin Snow》入面大膽嘗試唔同嘅音樂風格，又有情歌又有快歌，而且仲請嚟新監製梁榮駿，自此之後梁就成日同張合作[47]。《Virgin Snow》同前作《Summer of Romance》一樣響商業方面大獲成功，銷量超過六白金（30萬張），獲頒十大中文金曲IFPI白金唱片大獎[47]。而《Hot Summer》所收錄嘅歌曲就獲得多個獎項：《無需要太多》獲得十大中文金曲 、《貼身》獲十大勁歌金曲 ，而由佢本人親自作曲、同許冠傑合唱嘅《沉默是金》 就同時獲得十大中文金曲同十大勁歌金曲[48][49]。張國榮同年獲得十大中文金曲IFPI大獎[50]、十大勁歌金曲「最受歡迎男歌星獎」同埋叱咤樂壇男歌手金獎[51]。

1989年佢一口氣推出《側面》、《Salute》、《Final Encounter》三張大碟，監製都係梁榮駿，而三張大碟嘅銷量均超過6白金（30萬張），全部都攞到十大中文金曲IFPI白金唱片大獎，其中《側面》更獲得叱咤樂壇大碟IFPI大獎[52]。《Salute》則畀樂評人評價為「翻唱專輯中嘅一座高峰」，深受大眾好評，而張國榮更將《Salute》所有收益全部捐畀香港演藝學院，以用作新人培訓[31]。同年張國榮奪得十大勁歌金曲「最受歡迎男歌星」獎[53]同埋叱咤樂壇男歌手金獎，係連續第二年獲得同個獎項[51]。

譚張爭霸

編輯
 
譚詠麟：「譚張爭霸」入面另一位主角，響1984年至1988年被視為張國榮最大嘅競爭對手

「譚張爭霸」係指緊張國榮同另一位香港男歌手譚詠麟響1984年到1988年之間嘅競爭，係第一次有香港歌手嘅歌迷爆發大型鬥爭[54]。1984年，當時譚詠麟幾乎包辦成香港樂壇所有獎項，人氣如日中天，但係張國榮嘅走紅令大眾認為有後起之秀可以挑戰到譚詠麟，因此視兩人為競爭對手關係，並稱之為「譚張爭霸」，兩人響1984年至1987年曾一同角逐「最受歡迎男歌星獎」同「金曲金獎」，響香港引起巨大話題[54]。雖然私底下兩位歌手其實關係唔錯，但由於媒體嘅炒作，令事件白熱化[31]。喺紅極一時嗰陣，兩位歌手嘅歌迷成日有磨擦[44]，例如1986年十大勁歌金曲頒獎典禮上，張國榮嘅《有誰共鳴》獲得金曲金獎，結果台下譚詠麟歌迷發起離場行動，大叫「造馬」，噓聲大到幾乎蓋住張國榮嘅歌聲[54]。而響呢次十大勁歌金曲頒獎典禮結束後，雙方嘅歌迷一共過千人更響後台爆發衝突，場面混亂，有好幾個人受傷[55]。「譚張爭霸」令到譚張二人身心大受折磨，加上1988年譚詠麟爆發「買獎風波」，所以譚宣佈唔會再攞任何樂壇嘅獎項，「譚張爭霸」先至徹底落幕[54][55]。

海外音樂市場

編輯

1985年，張國榮獲邀成為當時被稱為「韓國國民歌姬」李仙姬嘅演唱會嘉賓，令佢響韓國打開知名度[56]。佢響1986年推出國語唱片《英雄本色當年情》，目標係進軍台灣市場，但反應唔大[57][37]。張國榮並冇因此而放棄台灣市場，1987年又發行國語唱片《愛慕》，希望成功打入台灣，點知意外地響韓國空前大賣20萬張，創造華語唱片響韓國嘅銷量紀錄，成功打開韓國市場，成為第一位打入韓國市場嘅香港歌手[57]。1988年，張國榮推出第三張國語唱片《拒絕再玩》，希望再次打入台灣市場，雖然銷量不高[38]但依然響台灣引起關注，當年有唔少台灣人都學張國榮響《拒絕再玩》MV嘅衣著，帶起一股潮流[58]。直至1989年嘅國語唱片《兜風心情》，響台灣引起巨大轟動[59]，由此張國榮先徹底打開台灣市場[58]。由於響韓國有一定知名度，所以佢同年響韓國發行LP《The Greatest Hits of Leslie Cheung》，響韓國大買30萬張[57]。

1990年，張國榮為Orion To You朱古力拍廣告，而由佢作嘅廣告主打歌《To You》成為韓國家傳戶曉嘅歌曲。1995年復出歌壇後，張國榮憑住《寵愛》響韓國大買五十萬張，到依家依然保持住華語唱片響韓國嘅最高銷量紀錄[57]。

退出歌壇

編輯
内文：張國榮退出歌壇事件

1989年9月17號，張國榮響麗晶酒店搞演唱會招待會個陣宣佈退出歌壇，並喺紅館舉行33場告別演唱會，進行封咪儀式[60]。張國榮話「封咪」係因為自己想學偶像山口百惠咁樣退隱[61]，但真正原因仲惹嚟猜測。總之響封咪後，張國榮就移民咗去加拿大[62]。當時佢住響西溫哥華，生活低調，呢段時間佢亦修讀電影課程[63]。但經過同伴侶唐鶴德嘅討論後，決定返到香港生活[64]。唐鶴德先於1994年返香港，張國榮其後響1995年回流香港，並且響唐鶴德嘅支持下選擇復出樂壇同埋向影壇發展[65][64]。1997年佢響節目《星空下的傾情》話，當年移居加拿大個陣覺得個度係天堂，環境好靚，但日子耐咗就對半退休生活感到枯燥，仲話「響度好似等死似咁」、「我以為加拿大係天堂，但去咗先發覺唔係，原來真正嘅天堂係香港！」[66]

捲土重來

編輯
 
張國榮喺《跨越97年演唱會》

1995年，張國榮宣佈復出樂壇，加盟滾石唱片，並響7月推出復出之作《寵愛》[67]。《寵愛》收錄咗十首由張國榮響1990年至1995年期間演唱過嘅電影主題曲[67]，其中主打歌《追》（電影《金枝玉葉》主題曲）深獲大眾好評，攞到香港電影金像獎最佳原創歌曲獎；而另一首收錄曲《紅顏白髮》（《白髮魔女傳》主題曲）亦響台灣受到讚賞，並獲得第30屆金馬獎最佳電影歌曲[68]。《寵愛》響全亞洲嘅銷量有成二百幾萬[69]，其中響韓國大賣50萬張，而響香港亦獲得6白金銷量（33萬張），係1995年香港銷量最高嘅唱片，並獲頒十大中文金曲IFPI全年銷量冠軍大獎，係張國榮第二次攞獎[70]。《寵愛》被認為係為當時已開始走下坡嘅香港樂壇注入新嘅活力[70]。

一年之後佢推出唱片《紅》[71]，請嚟林夕為全碟所有歌填詞，亦係張國榮第一次同林夕合作（之後張國榮推出嘅歌絕大部份由林夕包辦）[72]。普遍評論家認為《紅》十分之具有張國榮個人嘅色彩[72]。1997年張國榮全力投入響《跨越97年演唱會》之中，當年淨係發行咗一張現場專輯《張國榮跨越97年演唱會》 [72]。1998年6月，佢約滿滾石唱片，但因為念及情義，因而同滾石續約一年[73]。確定續約後，佢先後推出廣東話EP《這些年來》同埋國語唱片《Printemps》[73]。《Printemps》同《這些年來》嘅製作班底除林夕之外其他全部係台灣人[73]。

1999年6月正式約滿滾石嘅張國榮宣佈將會轉投新公司，並且直接開價三千萬轉會費，導致只有英皇娛樂同環球唱片表示肯同佢簽約[74]。因為環球唱片香港區負責人係張國榮舊東家新藝寶嘅老細陳少寶，張國榮希望再次同陳少寶合作，最終揀咗環球[74]。轉投環球之後，佢發行專輯《陪你倒數》[74]；主打歌《左右手》橫掃各個樂壇頒獎典禮，有叱咤樂壇至尊歌曲大獎、十大勁爆歌曲年度歌曲大獎十大中文金曲、金曲銀禧榮譽大獎[75]。同年張國榮榮獲十大中文金曲頒獎典禮「金針獎」，呢個係香港樂壇最高榮譽嘅獎項[75]。自1995年復出以嚟，張國榮宣佈唔會再打歌同埋攞任何香港樂壇嘅獎項[76]，話想將獎項留畀年輕人[77]，不過佢有出席「金針獎」嘅頒獎典禮，佢話呢個係非競爭性獎項所以佢先出席[75]。

2000年7月1號張國榮發行大碟《大熱》[78]；而響7月31號佢開始「熱情演唱會」[27]。喺2000到2001年呢兩年內佢幾乎攞曬中國歌壇嘅所有最高獎項，包括「最流行歌手」、「最傑出藝人」等[79]。2001年8月，佢獲邀出任香港作曲家及作詞家協會第一代CASH音樂大使[80]，並為該會創作主題曲《挪亞方舟》[81]。2002年獲得第25屆十大中文金曲頒奬典禮金曲銀禧榮譽大獎[82]。2002年尾張國榮著手製作新大碟，今次佢打算嘗試更多唔同嘅音樂風格，但唔少位都未完成下張國榮就離世[83]。環球響2003年推出呢���大碟[84]，並命名為《一切隨風》[85]。

演唱會

編輯

香港

編輯

1985年，出道9年嘅張國榮連開10場張國榮百爵夏日演唱會，「百爵」係指贊助���「百爵爽鞋粉」[86]，係佢個人第一個演唱會，亦打破香港歌手初次開演唱會嘅場數紀錄（23場）[87]；正因為佢響呢個演唱會上唱咗蔡楓華嘅歌，所以蔡響《勁歌金曲》節目入面話張「一時嘅光輝未必係永恆」[88]。之後，張國榮亦響1986年、1988年、1989年、1997年同2000年響紅館舉行多場個人演唱會，每次演唱會都差唔多二十至三十幾場左右，張國榮話佢並唔介意演唱會場次，要精益求精，一次畀一次好[89]。響多場演唱會啲觀眾都大叫甚至沖上台，造成多次混亂，張國榮好多時都要「安哥」嚟平息。

2000年舉行「熱情演唱會」，全球巡迴43場，受到樂迷嘅熱烈歡迎。其中佢更加請嚟法國高級服裝設計師尚ー保羅·高堤耶負責設計佢嘅演唱會服裝，前衛嘅設計（就好似紅色高踭鞋配長頭髮嘅張國榮）令人耳目一新，同時惹嚟反對佢嘅人炮轟佢「乸」[27]；不過設計就得到美國《時代雜誌》讚佢係「Top in Passion and Fashion（中文：頂尖嘅熱情同時尚）」、日本《朝日新聞》就讚佢係「天生表演者」[27]。佢係第一位響上海八萬人體育場連開兩場、日本連開十場嘅歌手。呢次亦係張國榮生前舉行嘅最後一場演唱會[90]。

其他

編輯

1986年英女王伊利沙伯二世訪港，港英政府因而響紅館搞咗《女皇訪港青年精英大匯演》，歷時一個鍾，張國榮同鍾鎮濤、區瑞強、張學友合唱歌曲《這是我家》，歡迎英女王嘅來臨[91]。1989年，張國榮響韓國搞個人演唱會，成為第一個響韓國開演唱會嘅華人歌手[57]。1996年12月12號至1997年1月4號，佢響香港紅館舉行跨越97演唱會，總共24場，世界巡迴演唱會60場，當中6場係喺日本搞，打破咗香港歌手響日本開演唱會嘅場數紀錄。

演藝事業

編輯

早年經歷

編輯

1976年，張國榮響攞到亞軍後，麗的電視副總經理鍾景輝認為張國榮雖然唔係冠軍，但個樣好精靈，好有潛質，於是同張國榮簽咗一份三年嘅二等演員合同，從此張國榮進入娛樂圈[23][92]。張國榮響簽約後同監製張之珏（鍾景輝徒弟）表示好想拍戲，所以張之珏畀佢拍電視劇[93]。因此張國榮喺早期主要係拍劇，例如《鱷魚淚》、《浣花洗劍錄》、《對對糊》、《甜甜廿四味》等等。至於張國榮拍嘅第一套電影係1978年嘅《紅樓春上春》，佢扮男主角賈寶玉，之不過係個咸片（軟調色情）[94]。當初張國榮之所以同意出演《紅》係諗住自己啱出道就擔正做「男一」係好難得嘅事，加上當時拍攝方開拍前同佢講《紅》係笑片，令到張國榮完全唔知係咸片，得悉係咸片後惟有頂硬上[95]。

響八十年代初期，佢出演《喝采》、《檸檬可樂》等一系列青春偶像派電影，當時張國榮多出演純情男孩或有錢仔嘅角色，成功擺脫當初拍《紅樓春上春》時「咸片男一」嘅印象[95]，更憑住前衛不羈、反叛但又靚仔嘅形象好受觀眾歡迎，亦因不羈嘅形象而響當時同陳百強、鍾保羅並稱「中環三太子」，三人曾經共同主演電影《喝釆》同《失業生》[44][96]。1982年憑《烈火青春》嘅二世祖「Louis」一角第一次攞到金像獎影帝提名，呢套電影被視為係香港電影新浪潮代表作之一，有好多大膽、性愛等鏡頭，張國榮表示雖然之前拍《紅樓春上春》令佢對性愛鏡頭有陰影，不過為咗劇情佢都唔會抗拒[97][98]。但由於當時張國榮響票房同歌唱方面嘅成績都唔理想，麗的認為佢潛力唔大，就畀佢轉投其他公司，最後張國榮轉投無線電視[註 1][28]。

嶄露頭角

編輯

張國榮早期扮演純情男孩、二世祖居多，因此希望改變戲路[99]，後嚟仲直言「青春片係賣座嘅，不過由我拍就唔係咁賣座啦，唔知點解都仲係好多導演搵我拍囉」[28]。1983年嘅《鼓手》被睇成係佢嘗試轉型嘅第一步，雖然票房慘淡但呢次係張國榮第一次出演非青春偶像派電影[44]。1984年佢主演無綫劇集《儂本多情》，係佢響無線拍嘅第一個無線電視劇作品，劇入面佢飾演一個花花公子，呢種形象令到觀眾覺得好深刻[100]。

1985年《英雄本色》開拍，導演吳宇森響睇過張國榮之前拍嘅《喝采》後，認為張國榮同角色「宋子傑」一樣咁有「叛逆味道」，因此邀請張國榮出演；張國榮睇過劇本後覺得非常好，仲可以同狄龍、周潤發等前輩合作，所以同意接拍[101]。角色「宋子傑」響正義同佢犯罪嘅大佬之間俳回，出眾嘅演技得到香港電影金像獎最佳男主角提名；《英雄本色》唔單止打破香港最高票房紀錄，仲紅到去日本同韓國，當地有唔少人因為「宋子傑」而成為「榮迷」，而由張國榮唱嘅主題曲《當年情》亦響韓國成為家傳戶曉嘅歌曲[102][56]；張國榮後嚟曾經話過《英雄本色》係佢電影生涯嘅轉捩點[28]。

《英雄本色》令張國榮同導演吳宇森結緣，吳宇森對於「宋子傑」一角冇任何獎項提名有啲失望，認為以張國榮嘅實力同付出應該要有返咁上下嘅收獲，於是製作咗一套專為張國榮度身打造嘅電影《英雄本色II》，並響1987年上映，張國榮最終憑呢套電影獲得香港電影金像獎影帝提名[103]。同時由佢主演嘅《倩女幽魂》亦都響1987年上映，佢響戲入面扮書生寧釆臣，張國榮認為拍古裝片唔靚所以原本打算拒演，但響得知劇本後，認為寧釆臣嘅遭遇、性格同出道早期嘅自己類似，於是決定拍呢套戲；而寧采臣一角成為香港電影史上經典嘅書生形象之一，打破當時由時裝片當道嘅市場，甚至帶起一陣「書生熱」浪潮，佢亦第一次獲得臺灣金馬獎最佳男主角提名[28][95]。

1988年響由關錦鵬執導嘅電影《胭脂扣》入面扮「十二少」陳振邦，張國榮認為十二少係個「鹹濕同膽小鬼」，係佢拍過嘅電影入面最中意嘅角色[104]。佢亦憑「十二少」一角第三次獲得香港電影金像獎影帝提名[28]，但最終以一票之差輸畀洪金寶，理由係「戲份太少」[105]。

揚威影壇

編輯
 
香港杜莎夫人蠟像館有個以電影《風月》同《霸王別姬》嘅書生造型做藍本嘅張國榮蠟像，響2004年開始展出到依家[106]

張國榮響開始「封咪演唱會」之前，已經接拍咗由吳宇森執導嘅《縱橫四海》，佢原本打算開完演唱會同拍埋《縱橫四海》之後就移居加拿大，但臨走之前佢講咗句︰「我想拍王家衛嘅戲」，當時係華星娛樂職員、《阿飛正傳》策劃陳善之知道後就即刻安排王家衛同張國榮見面[107]。本身王家衛只打算畀張國榮客串，後嚟佢認為張拍得好，所以加重咗張嘅戲份[108][109]。為咗拍好呢套戲，張國榮仲特登去減肥[110]。佢以精湛嘅演技將角色「旭仔」嘅浪蕩不羈演繹出嚟[111]，評論大讚張冇淨係停留響導演畀演員嘅對白、動作設計層面，而係深入角色嘅內心[112]。雖然《阿飛正傳》一出街個時口碑並唔好，票房亦唔高，但越後就越受歡迎，依家被普遍認為係香港文藝片中嘅經典之作，「旭仔」嘅一句「冇腳嘅雀仔」更成為經典台詞[113][114]。張國榮亦憑呢套電影獲得第十屆香港金像獎最佳男主角，加上王家衛響拍呢套電影個陣曾經教張國榮好多表演嘅技巧，令張國榮演技突飛猛進，為佢之後嘅國際成名打好基礎[115][116]。

1993年，張國榮響電影《霸王別姬》扮主角程蝶衣，佢細膩、全情投入咁演譯咗程蝶衣嘅「不瘋魔不成活」，甚至導演話好依然要求重拍[117]。佢嘅演技備受讚揚[117]，。佢憑攞法國康城影展嘅金棕櫚獎、國際影評人聯盟大獎費比西獎、美國金球獎嘅最佳外語片獎、奧斯卡最佳外語片提名等。《霸王別姬》令到佢響國際演藝界打響名堂，響全世界都得到好好嘅評價，從此佢揚威影壇[27]。

1994年，張國榮因主演《東邪西毒》，獲香港電影評論學會最佳男演員獎[118]、威尼斯國際電影節最佳男演員提名，但由於票房慘淡，所以後嚟就拍搞笑版《東成西就》[119]。同年亦憑住《金枝玉葉》成為當年香港暑假電影票房嘅冠軍。

佢亦曾被邀擔任日本東京國際電影節青年導演獎（1993年）及德國柏林國際影展（1998年）嘅評委，係公認最傑出嘅華人影星之一。

張國榮影壇生涯主要演文藝片，但商業片佢都拍唔少。好似《家有囍事》、《金玉滿堂》、《大三元》呢啲張國榮係以搞笑形象演出。其中《家有囍事》收四千九百萬港紙票房，係張國榮從影以嚟最收得嘅。

衝出國際

編輯
 
張國榮響星光大道嘅星牌：由於星光大道係響張死後建立，所以係少數冇手印嘅星牌之一[120]

1996年，由張國榮主演嘅《大三元》、《金枝玉葉2》、《新上海灘》三部電影齊齊入選香港年度十大賣座電影。12月，佢喺香港紅磡體育館舉行「跨越97演唱會」24場，世界巡迴31場。

1997年，佢響電影《春光乍洩》做男主角。響呢奪戲入面，佢扮演男同性戀者何寶榮。呢套電影令佢得到空前成功，獲得戛納國際電影節最佳男演員、第17屆香港電影金像獎最佳男主角、第34屆臺灣金馬獎最佳男主角三個提名。1998年，佢成為第一位做柏林國際影展評委嘅亞洲演員；同年《春光乍洩》又令佢得到咗法國康城影展嘅最佳男主角提名，成為LGBT文化嘅代表之一。之後佢同日本攝影師清永安雄響澳門影寫真集《ALL ABOUT LESLIE》。

1999年，張國榮覺得香港電影業處於低迷嘅時間，為咗帶嚟更多嘅活力，佢同二十位香港導演組成「創意聯盟」。其中由張之亮執導嘅《流星語》就係呢個聯盟其中一個作品。張之亮搵過好多演員，但就得張國榮肯去拍呢套戲。

2000年11月響香港電台搞嘅「千禧十大演藝紅人」評選入面，張國榮排名第一。同年，佢主演電影《鎗王》，而佢嘅演技亦得到行內較高嘅評價；又入選咗日本電影雜誌《電影旬報》「20世紀百大外國男演員」之一。9月，佢主演同執導嘅公益電影《煙飛湮滅》正式上映[63]。

2001年，張國榮獲日本擁有最多會員嘅亞洲電影影迷會「飲茶俱樂部」（CINECITY）投票選為2000年度「最佳男演員獎」（電影《流星語》）。呢個獎項共舉辦11年，張國榮連續十年奪冠。

2002年3月，佢嘅遺作《異度空間》上映，佢扮演心理醫生Jim，獲提名做香港電影金像獎最佳男主角[121]。

幕後製作

編輯

張國榮響2000年獲香港政府邀請拍攝同製作公益電影《煙飛湮滅》，響唔收錢、冇條件下參加呢次製作[122]。呢次作品係張國榮第一次執導嘅電影，所以非常重視，仲請嚟多年嘅好朋友梅豔芳做女主角。由於運籌得當，呢次拍攝用咗5日就完成。響上映後，外界對呢次嘅評價唔錯，認為張國榮「盡顯功力」[123]。

張國榮響2002年成立「夢幻聯隊」幕後製作公司，開始製作同執導電影《偷心》，而《偷心》嘅男主角演員係張國榮本人[124]。張國榮認為香港投資人只係為咗錢，所以走去請大陸投資公司，並請嚟中國劇作家何冀平寫劇本[125]。張國榮對於呢個作品嘅要求好高，因而三番四次修改劇本；原先預定響青島開拍，但結果因為城市風貌唔啱心水而決定改拍攝地點[124]。面對拍攝工作咁快就畀傳媒曝光，張國榮好嬲，並且同劇組簽保密協定。不過當時張國榮亦忙住拍電影《異度空間》、而大陸投資方又響2002年10月畀人拉咗���坐監，《偷心》開拍日期一再被推遲，最終響張國榮死後計劃流產。[126]

廣告同代言

編輯

張國榮一生人淨係代言過五個廣告，全部都係響80年代代言，分別係大家樂（1985年）、柯尼卡菲林（1986年）、百事可樂（1987年）、To You Chocolate（韓國，1989年）同埋山葉機車（台灣，1989年）。雖然廣告代言少，但發揮嘅影響力非常大[127]。佢響大家樂代言個陣曾經講出「為你做足一百分」嘅口號，雖然出場得5秒但已經引起巨大轟動，口號沿用到依家[127]。張國榮亦係百事可樂亞洲區第一位代言人，響1988年成為「百事巨星」，更響同年開始「百事巨星張國榮演唱會」[127][128]。而韓國嘅To You Chocolate經佢代言後銷量急增300%，一躍成為當時韓國銷量第一嘅朱古力[127]。佢生前最後一個代言嘅廣告係山葉機車，本身張國榮並冇打算接呢個代言，但當時公司認為佢形象好，加上想捧下新人柏安妮，於是就安排張國榮同柏安妮接下呢個代言，結果成功響台灣引起一陣「機車潮」，張國榮亦成功打入之前一直都開拓唔到嘅台灣市場[58][129]。

離世

編輯

2003年4月1號，張國榮約經理人陳淑芬女士到香港文華東方酒店見面，但陳等咗好耐都未見人影。同日18點41分，張國榮喺香港文華東方酒店24樓跳樓自殺；據知係跌落二樓帳蓬再彈返落地[130]，發現後畀人送到瑪麗醫院。瑪麗醫院響19點06分公佈，指經醫生檢驗後證實已經響18點45分（即未送到醫生手上個陣）死咗，終年46歲。屍體之後畀人送去西環域多利亞公眾殮房。

響拍完《異度空間》後，有指張國榮入戲太深，精神恍惚，把聲亦比平時沙啞，更加話佢嗰時已經患上抑鬱症[131][132]。伴侶唐鶴德後嚟話，張國榮早響2002年11月就自殺未遂；之後就已經開始睇精神科醫生[132]。事後陳亦證實張國榮已患上抑鬱症，努力治療年幾，但係仍然因為病情失控而自殺[133]。而張國榮家姐張綠萍響後嚟接受香港電台訪問嗰陣表示，佢嘅抑鬱症係生理上，冇得醫嘅，有醫生寫咗一張長達四頁嘅報告畀佢，話「抑鬱症響醫學上分為心理同生理兩方面，生理嘅就係因為腦部入面嘅化學物質唔夠平衡而導致，心理嘅大家都知係唔開心嘅嘢導致。張國榮就係生理上面嘅。」[131][134]

由於張國榮死得太突然，加上當日係愚人節，唔少人都唔信、以為係玩笑，所以當知道嚟真之後都好驚訝。消息震撼亞洲樂壇，仲有眾多Fans。有Fans接受唔到張國榮嘅死，於是跟住自殺。響張國榮自殺前嘅3月份只有99人自殺，但到咗4月份自殺個案就大增32%至131人，其中有唔少死者留低嘅遺書表示自己嘅死同張國榮自殺有關[135]。2003年4月8號，張國榮嘅葬禮喺香港殯儀館舉行。大批歌迷喺當日早早聚集喺殯儀館外，喺場嘅唔少明星同埋歌星，如張國榮生前嘅知己梅艷芳，都喊到收唔到聲。電影界代表導演徐克，音樂界代表填詞人黃霑同埋藝人代表張學友讀悼詞。劉純豪、羅建基、徐克、張學友、關錦鵬、劉培基、梁家輝、林夕等八人爲張國榮扶靈，送佢最後一程。香港無綫電視現場直播整個葬禮，多間海外電視台亦有直播報道。張國榮嘅靈位響沙田寶福山，白色石碑上面嘅相旁邊刻咗出自林夕嘅「當年情常在心，紅塵夢醒無憾」。

張國榮響2003年跳樓過身後，坊間一直有傳聞話佢未死。2004年11月，有傳聞指一個阿根廷華人喺布宜諾斯艾利斯旁邊嘅一個小鎮見到貌似張國榮嘅中年男人，隨後就有大量傳聞講述張國榮實際喺阿根廷，並隱居喺一個規模唔大嘅農場入面，網上仲流傳佢響阿根廷嘅相。2006年，又傳出話王家衛其實知道張國榮響阿根廷，為咗見張國榮而遲咗去康城影展。2018年，更有指當年跳樓嘅其實唔係張國榮本人，而係一個尋死嘅賭徒，依家張國榮過得好好，不過肥咗。啲人一般認為係「榮迷」太過掛住張國榮而作出嚟嘅傳聞，亦有人認為係炒作、惡作劇。[136][137]

個人生活

編輯
你問我感情嘅嘢...感情嘅事我唔會講，you just think what you think。身為一個藝人，我只需要大家聽我嘅歌、睇我嘅戲，其他嘢唔重要。
——張國榮響九零年代一次接受記者訪問，被問及私生活個陣時嘅反應[138]

張國榮非常注重個人私隱，唔願意向公眾公開太多私生活。佢認為大眾只需要關注於佢嘅作品，而唔係私生活。但係由於佢個人嘅成就同埋地位，佢嘅私生活一直備受傳媒關注。[64]

感情生活

編輯

張國榮曾經同倪詩蓓、楊諾思、雪梨、鄧慧詩四個女藝人傳過緋聞[139][140][141][142]。以上四個女朋友都係傅媒報道，係緋聞，但毛舜筠就係張國榮一生人之中唯一一個公開承認嘅女朋友。1976年，張國榮簽約麗的電視，識咗當時同公司嘅毛舜筠。兩個人一齊主持音樂節目，佢對毛一見鍾情，所以兩個人後嚟就拍咗拖。冇幾耐，張就同當時只有17歲嘅毛求婚，但係毛當時畀佢嚇親而拒絕[143]。後嚟張國榮響電視節目上講過：「如果當初你（毛舜筠）願意接受我嘅求婚，可能會改變我嘅一生。」[144]1991年，佢哋響拍《家有囍事》期間再次見面，之後做咗老友[145]。

喺2001年《時代週刊》亞洲版訪問上，張表示幫TVB拍MV個陣因為太過性感而被禁止，佢都知咁做會俾聽眾同埋觀眾懷疑或相信佢係同性戀，但係佢覺得話自己係雙性戀較為恰當[4]。而佢亦曾經響個人寫真書《所有》話：「如果有一個人中意我，我亦同樣中意對方嘅話，係男係女並唔重要。」[146]

唐鶴德

編輯

張國榮同投資分析師唐鶴德嘅戀情最受大眾矚目。唐同張國榮自細就玩埋一齊，比張細三歲，後嚟因為張國榮��英國讀書而冇再聯絡。直至1982年，張國榮響香港麗晶酒店再次見到唐鶴德，一年後經共同老友正式認識對方，兼且開始拍拖。響戀情啱開始嗰陣張國榮唔出名，唐身為金融業人士，曾經攞自己嘅人工去支持佢[141]。1984年兩個人曾經分開過，但冇耐又喺返埋一齊[147]。響成個80年代，佢兩個嘅關係一直都好低調[147]。1990年張國榮移居加拿大西溫哥華，並響個度買咗一間價值一百萬加元嘅豪宅[148]，唐鶴德亦都跟住一齊移民。後嚟張國榮受唔到響加拿大沉悶嘅生活，同唐鶴德經過討論後選擇回流香港，唐鶴德響1994年先返到香港，並響渣打銀行做投資分析師。而張國榮響唐鶴德嘅全力支持下，亦都跟住響1995年回流香港並且復出。但直至呢個時候兩人關係依然未公佈。[64]

直至90年代初，開始有香港傳媒報道指張國榮係同性戀，又跟蹤偷拍到同佢唐鶴德嘅親密相[149]；張國榮當時並唔承認，仲表示「有人想砌我搞基！」[150]。但經過內心反覆嘅糾纏甚至衝突，張國榮索性喺1996年底嘅復出歌壇演唱會上公開多謝唐鶴德，為唐獻唱一首《月亮代表我的心》，話佢同埋自己阿媽係「生命中至愛嘅朋友同埋親人」，正式承認同唐嘅關係[150]。而唐鶴德響張國榮復出後，辭去投資分析師嘅工作，轉為幫張國榮處理私人財務，全力支持張國榮嘅事業[150]。1999年喺《Leslie的所有》採訪中，承認自己同埋唐鶴德識於微時，關係已經長達十幾年[132]。

2003年張國榮過身後，唐鶴德以未亡人嘅身份打點一切，包括主持葬禮、接管同埋處理張國榮所留下的遺產；而唐鶴德響每一年張國榮嘅死忌都會響社交平台鋪帖紀念。有傳媒將張國榮自殺歸咎於張國榮本身，唐鶴德由此親自接受《明報周刊》專訪，要求外界唔好再以文字同圖片嚟對張國榮進行「鞭屍」嘅行為[151]。

慈善事業

編輯

張國榮熱心公益，不過佢唔中意高調地做善事，佢曾經講過「唔想畀人一種搏宣傳嘅感覺」[152]，所以新聞少有報導佢做嘅善事[153]。張國榮成日響慈善晚會上獻唱、憑籍自己嘅高人氣嚟叫大家捐錢，而佢自己又會出錢順便捐埋[153]。佢因為童年過得唔開心所以專注於兒童公益[122]，係香港兒童癌病基金會嘅讚助人，仲響《跨越97年演唱會》上帶頭為香港兒童癌病基金會籌款，係第一位響演唱會上發起慈善籌款嘅粵語歌手[153]；是次演唱會籌得八十幾萬港紙，跟住張國榮自己出咗十幾萬，最終捐咗一百萬畀該基金會[153][122]。

「
兒童係國家嘅棟樑，亦係我哋嘅接班人，應該要好好培養，而且我嘅童年唔係好開心，所以好想各地嘅兒童幸福啲。
 」

——張國榮[122]

2000年，張國榮獲邀拍攝同製作公益電影《煙飛湮滅》，響唔收錢、冇條件下參加呢次製作[122]。佢後嚟獲香港反吸煙及健康委員會任命做「全球華人不吸煙大使」，公開呼籲大家唔好吸煙，仲話「戲可以重新再拍，但人只能夠活一次」[154]。2001年，佢拍香港影視及娛樂事務管理處宣傳影片（支持香港電影拍攝工作）同Discovery Channel《Animal Planet》（捐款保育瀕臨絕種獅鼻猴）。

年份 擔任大使
2000年 健康快車光明大使[122]
2002年 護苗基金親善大使
全球華人不吸煙大使[154]

興趣喜好

編輯

張國榮係個運動迷，興趣廣泛，中意打羽毛球、劍擊、足球、籃球。生前佢每個禮拜都會去打羽毛球，羽毛球嘅技術係獲得圈內人士認證嘅「頂尖」，仲曾經孖張曼玉參加過混雙比賽[155]。佢亦係個健身迷，仲請嚟陳旭達做自己嘅私人教練[155]。另外，張國榮好中意瞓覺，認為一日瞓八個鐘係唔夠嘅，要瞓十個鐘先至夠，而且床褥一定要舒服、床單一定要係佢中意嘅牌子，如果佢瞓唔夠有時會發脾氣[108]。張國榮亦都中意飲酒，佢飲酒會揀牌子同產地，最中意嚟自英國同法國嘅酒[156]。佢本身係個老煙槍，因為壓力大[157]所以一日至少要食兩包煙，直至2000年因為獲邀製作公益電影《煙飛湮滅》先至戒煙[154]。

風格同形象

編輯
 
圖中紅色高踭鞋同埋背後嘅雜誌封面即為張國榮響1997年演唱會上嘅衣著，打扮中性，被視為係領先於時代嘅衣著，但響當年飽受批評。

張國榮風格大膽前衛、勇於創新[4]，響九十年代已經開始留長頭髮，響2000年之後就變得越嚟越夠膽公開自己嘅性取向，其中大碟《大熱》收錄歌《我》係佢嘅出櫃之歌[158]；並且響「熱情演唱會」中以長髮、高踭鞋示人，打扮中性陰柔。雖然當時有人批評佢嘅風格，但到今時今日啲人睇法已經冇咁負面，甚至認為佢係「領先於時代二十年」。香港大學社會系副教授江紹祺曾經講過「90年代係香港同志運動發展嘅重要階段，社會上開始聽得到同志嘅聲音。張國榮嘅情況，可以話係同呢一股思潮互相配合。」[159]張國榮曾經講過「我覺得藝人嘅最高境界係可以男女兩個性別響同一個人身上，因為藝術本身係冇分性別。」[160]

張國榮響多個電影作品之中成日同梅艷芳合作，作品有《胭脂扣》、《緣份》、《金枝玉葉2》同《偶然》，其中兩人響《胭脂扣》嘅合作令兩人一躍成為香港頂尖藝人[161]。 《Hong Kong Cantopop: A Concise History》（2017）嘅作者朱耀偉指出，張國榮同梅艷芳形成咗一種「前所未有」嘅化學反應，無論響電影上或者���舞台上都展示出「超凡嘅神秘魅力」[162]。

影響

編輯

張國榮係極具影響力嘅文化偶像。2000年，入選日本電影雜誌《電影旬報》「20世紀百大外國男演員」。2003年6月，新浪網同國內17家媒體共同推出大型公眾調查「中國二十世紀十大文化偶像」，張國榮係第七位[163]。2005年由香港影藝界所舉辦嘅「中國電影一百年」活動當中，張國榮俾香港人選為呢一百年嚟最喜愛嘅男演員[164]。2006年，日本電視台NHK進行問卷調查，其中張國榮被選為「十佳演員」[165]。

大眾認同

編輯

張國榮在生嘅時候，佢啲擁躉主要嚟自香港、中國、亞洲以至全世界嘅華人地區[166]，被稱為「榮迷」、「哥迷」，除咗參加官方歌迷會活動、聚會、探班之外[167][168]，有唔少「榮迷」甚至達到瘋狂嘅地步，例如自費登頭版廣告慶祝張國榮生日[167]、為張國榮而終生不嫁[168]、嚟香港做藝人出道[169]等，有啲已經嫁人但依然冇阻對張國榮嘅熱情[170]，並視追隨張國榮係一生嘅信仰[132]。張國榮在生時堅持做自己嘅行為，例如公開宣佈自己嘅性向、中性化打扮等，佢前衛嘅作風影響唔少人，好多「榮迷」亦歌頌佢嘅「唔做假」，有人甚至因為佢嘅作風而成功克服焦慮症[171]。

張國榮響日韓兩地都有巨大影響力，尤其係韓國。韓國「榮迷」嘅數量十分龐大，大多係響《英雄本色》開拍後而開始中意上張國榮，有唔少韓星都曾經公開自己係「榮迷」嘅身份，例如全智賢、Rain、張東健、劉在錫[172]、李準基等，佢哋響拍戲時都會刻意模彷張國榮[56]。當年嘅韓星甚至乎會模彷張國榮嘅衣著同外型，就好似張國榮響《英雄本色》嘅中間分界髮型[56]。而日本都有唔少「榮迷」，對佢嘅評價十分正面，大多都係畀佢嘅演技而吸引，甚至叫佢做「演技派貴公子」[173]。而張國榮嘅寫真集響日本一上架好快就會賣哂[174]。

張國榮離世後，仍然有唔少人懷念佢，其中有啲人係喺張國榮離世後開始鍾意佢，呢啲人一般被稱爲「後榮迷」，多數係1990年代到2000年代出世嘅一代，甚至除咗香港，就連台灣同韓國都有一定數量[175][176][141][177]。唔少「後榮迷」喺每年4月1號（即係張國榮嘅死忌）都會聚集一齊，進行一啲紀念活動。有啲評論認為，「後榮迷」嘅出現，部分原因係文化評論上關於佢的論述嘅論述不斷增加[141]。香港中文大學文化及宗教研究系助理教授陳少紅（筆名洛楓）統計，逝世後所造成嘅迴響，遠超香港同期逝世明星（如羅文、梅艷芳），規模只有李小龍可以媲美[7]。

紀念

編輯
内文：張國榮紀念活動

響張國榮死後，唔少人都會舉辦一啲活動嚟紀念佢。響第22屆香港電影金像獎頒獎禮，大會唔鋪紅地，四大天王合唱張國榮嘅《當年情》。響同年4月9號嘅香港國際電影節入面，大會為張國榮嘅死默哀一分鐘。

而海外嘅「榮迷」都冇忘記佢。響韓國，唔單止響多套韓國電視劇會出現張國榮嘅身影（就好似《請回答1988》、《九尾狐傳》等等[172]），甚至分別響2009年同2022年舉辦「張國榮電影節」嚟介紹同推廣張國榮所拍嘅電影[178][172]。

2003年，張國榮獲第三屆華語流行樂傳媒大獎追頒「終身成就獎」。

2004年，張國榮獲第二十三屆香港電影金像獎追頒「演藝光輝永恆大獎」。

2005年11月8號，香港郵政推出「香港流行歌星」郵品系列，張國榮成為其中一位獲致敬推出郵票嘅歌手（面額係3蚊）[179]。

2022年，星聚匯搞咗《榮情蜜意張國榮影展》，響4月1號起上映《霸王別姬》、《胭脂扣》同《英雄本色》呢三套作品[166]。

影視作品

編輯
内文：張國榮影視作品一覽

張國榮拍嘅第一套影視作品係1978年嘅《紅樓春上春》，自此之後嘅24年期間分別拍過56套電影。代表作有《胭脂扣》、《倩女幽魂》、《霸王別姬》、《阿飛正傳》、《英雄本色》等，可以話係家傳戶曉[180]。2002年公益電影《煙飛湮滅》正式上映，係唯一一套由佢執導嘅電影[181][182]。1990年憑《阿飛正傳》獲得香港電影金像獎最佳男主角，呢次亦係佢唯一一個金像獎獎項[181]。最後一個作品係2002年嘅《異度空間》。佢亦有拍電視劇，一生人拍過19套，第一套係麗的嘅《鱷魚淚》[183]，至1986年客串《香港八六》之後就冇再拍過[184]。代表作有《儂本多情》、《福祿壽喜》[185]，但成績唔似響電影方面咁亮眼[183]。佢都拍過廣播劇[185]。

音樂作品

編輯
内文：張國榮音樂作品一覽

張國榮一生出過24個大碟，其中英文一個、粵語十八個、國語六個。佢出嘅第一個音樂作品係《DAYDREAMIN’》，1978年出，而第一個粵語專輯係1979年嘅《情人箭》；但由於呢兩個作品表現唔好，公司認為佢潛力唔大就畀佢走[28]。所以佢直至1983年轉投華星後先出第二個粵語專輯《風繼續吹》，而《風繼續吹》、《張國榮的一片痴��》反應唔錯，咁先令佢打開知名度[186]。可以肯定係，由第三張專輯《風繼續吹》開始，就會發行錄音帶版本[32]。直至1989年，都維持每年至少推出一張專輯嘅次數[187]。1995年以專輯《寵愛》復出樂壇[188]。佢最後一張專輯係2003年7月8號、佢走後先發行嘅《一切隨風》[189]。

派台歌曲成績

編輯
内文：張國榮派台成績

呢個成績表單顯示出從1983年－1989年，1995年到而家張國榮喺香港派台歌曲嘅成績，其中1990年－1994年張國榮因為退出歌壇嘅原因，因此未有歌曲派台。1995年－1998年張國榮喺滾石唱片期間，明確講明唔參與歌曲派台[190]。

攞獎同提名

編輯
内文：張國榮攞獎同提名一覽

參考

編輯

書籍

編輯
  • 志摩千歲. 張國榮的時光. 上海書店出版社. 原作名: レスリーの時間. 2011-12. ISBN 9787806787007
  • 洛楓. 張國榮：禁色的蝴蝶. 廣西師範大學出版社. ISBN 9787563383030
  • 張國榮藝術研究會. 張國榮 盛世光陰. 香港電影雙周刊出版社. 2005-09-12. ISBN 9789628114948
  • 關熙潮 (2015-10-13)。《張國榮：不如我們從頭來過》 (中文)。香港：香港中和出版有限公司。ISBN 9789888284993。
  • 蔣林（2013-04-15）：不一樣的煙火:張國榮音樂傳奇 香港中和出版有限公司 ISBN 978-988-8200-42-9
  • 殷信希. 張國榮為你鍾情: Will You Remember Me
  • 朱耀偉 (2017).Hong Kong Cantopop: A Concise History

註

編輯
  1. ↑ 由於當時張國榮跟住黎小田轉投華星唱片，而當時華星係無線嘅附屬子公司，所以張國榮轉投得華星就要過埋無線。而當時麗的見張國榮冇乜水花，咁就畀佢走。

引用

編輯
  1. ↑ 〈張國榮〉 (中國中文)。騰訊娛樂。原著喺2016年3月6號歸檔。喺2015年10月30號搵到。
  2. ↑ 汪曼玲 (1995-11-05)。〈張國榮：我沒用過契媽一個仙〉。《明報週刊》。原先內容歸檔喺2021-02-17。
  3. ↑ 〈哥哥逝世15周年 經典背後的秘密 - 香港經濟日報 - 報章 - 副刊〉。paper.hket.com。喺2023-02-06搵到。
  4. ↑ 4.0 4.1 4.2 4.3 "Forever Leslie - TIME". web.archive.org. 2009-03-14. 原著喺2013-05-21歸檔. 喺2023-02-06搵到.
  5. ↑ 5.0 5.1 5.2 5.3 《張國榮：不如我們從頭來過》。頁 14。
  6. ↑ 《印刻文學生活誌, 第 44 期》。頁 34。
  7. ↑ 7.0 7.1 7.2 7.3 〈【由零開始】哥哥的10件軼事 ｜ 蘋果日報〉。《Apple Daily 蘋果日報》 (香港中文)。原著喺2021-05-14歸檔。喺2021-05-14搵到。
  8. ↑ 网易 (2022-04-28)。〈张国荣有何魅力，能让粉丝这么长情？〉。www.163.com。原著喺2023-04-07歸檔。喺2023-04-07搵到。
  9. ↑ 〈【繼續為你鍾情】哥哥點解叫哥哥？十件張國榮你或許想知道的事 - 晴報 - 娛樂 - 中港台〉。skypost.ulifestyle.com.hk (中文)。喺2023-07-01搵到。
  10. ↑ 〈「哥哥」親家姐勇敢選擇〉。www.lesliecheung.cc。喺2023-07-01搵到。{{cite web}}: CS1 maint: url-status (link)
  11. ↑ 11.0 11.1 關熙潮。《張國榮：不如我們從頭來過》。頁 29。
  12. ↑ Lisa Odham Stokes， Rachel Braaten. Historical Dictionary of Hong Kong Cinema. p. 90.
  13. ↑ 13.0 13.1 CORLISS, RICHARD (2001-05-07). "Forever Leslie". Time (美國英文). ISSN 0040-781X. 喺2022-08-25搵到.
  14. ↑ 〈【旅遊】英國利兹 尋張國榮足跡 -〉。《LifeStyle Journal 優雅生活》。喺2022-04-07搵到。
  15. ↑ 15.0 15.1 《張國榮：不如我們從頭來過》。頁 39。
  16. ↑ 〈廉署退下火線 出任平機會主席〉。www.bastillepost.com。2019-06-21。喺2024-02-14搵到。
  17. ↑ 《張國榮：不如我們從頭來過》。頁 34。
  18. ↑ 卓柏安 (2019-04-02)。〈【張國榮逝世16周年】網民揭哥哥與長洲當年情 幫餵豬種菜游東灣〉。《香港01》。喺2022-08-23搵到。{{cite web}}: CS1 maint: url-status (link)
  19. ↑ 《張國榮為你鍾情: Will You Remember Me》。頁 8。
  20. ↑ 白云旅行说 (2021-01-29)。〈被张国荣誉为"最完美的女人"，原来莫文蔚的妈妈这么牛！_手机网易网〉。www.163.com (英文)。喺2022-08-27搵到。
  21. ↑ 《張國榮：不如我們從頭來過》。頁 24–25。
  22. ↑ 〈一切由American Pie開始〉。《on.cc東網》。2018-09-12。喺2022-08-25搵到。{{cite web}}: CS1 maint: url-status (link)
  23. ↑ 23.0 23.1 23.2 23.3 李思朗 (2019-12-01)。〈【黎小田逝世】歌唱比賽相遇針鋒相對 張國榮變巨星全靠呢句？〉。《香港01》 (香港中文)。喺2022-08-20搵到。
  24. ↑ 24.0 24.1 〈黎小田追憶張國榮 初試啼聲已見天分〉。muipoa.muimusic.com。原著喺2016-04-23歸檔。喺2022-08-23搵到。
  25. ↑ 〈亞洲歌唱比賽昨晚總決賽 馬尼拉區兩位歌手囊括冠軍亞軍兩席 漢城金永愛台北蔡敏雙季軍〉。華僑日報。1977。喺2022-08-25搵到。
  26. ↑ 《張國榮：不如我們從頭來過》。頁 45。
  27. ↑ 27.0 27.1 27.2 27.3 27.4 〈#FashionIcon：流水會帶走光陰的故事，張國榮卻在我們的記憶裡越發鮮明〉。The Femin (美國英文)。2020-04-01。喺2022-02-25搵到。
  28. ↑ 28.0 28.1 28.2 28.3 28.4 28.5 28.6 28.7 28.8 董欣琪 (2022-04-01)。〈張國榮逝世｜認初出道唔識唱歌 拍電影機會更多：希望唔再做毒藥〉。《香港01》 (香港中文)。喺2022-04-14搵到。
  29. ↑ 29.0 29.1 Pan (2009-04-03)。〈你噓過張國榮嗎？——懷念張國榮〉。PChome。原先內容歸檔喺2021-05-13。喺2021-05-13搵到。
  30. ↑ 30.0 30.1 關熙潮。《張國榮：不如我們從頭來過》。頁 71。
  31. ↑ 31.0 31.1 31.2 31.3 〈十年之后 世间再无张国荣-中国新闻周刊网〉。web.archive.org。2016-01-05。歸檔時間2016-01-05。喺2023-04-04搵到。{{cite web}}: CS1 maint: bot: original URL status unknown (link)
  32. ↑ 32.0 32.1 林穎嵐 (2018-04-01)。〈【張國榮逝世15周年】收藏家遍尋哥哥錄音帶 《風繼續吹》激罕〉。《香港01》 (香港中文)。喺2022-04-14搵到。
  33. ↑ 關穎賢 (2022-06-20)。〈張國榮《為你鍾情》創顏色唱片先河 黃霑寫給中國人的結婚進行曲〉。《香港01》 (香港中文)。喺2023-04-04搵到。
  34. ↑ 袁智聰 (2017-10-18)。〈【選擇性失聰】關於顏色膠唱片 我只有隨緣｜專欄〉。《香港01》 (香港中文)。喺2023-04-04搵到。
  35. ↑ 网易 (2021-07-01)。〈1986年10月张国荣粤语专辑《张国荣·爱火》〉。www.163.com。喺2023-04-04搵到。
  36. ↑ 〈南岛晚报数字报〉。web.archive.org。2021-06-20。歸檔時間2021-06-20。喺2023-04-04搵到。{{cite web}}: CS1 maint: bot: original URL status unknown (link)
  37. ↑ 37.0 37.1 37.2 《張國榮：不如我們從頭來過》。頁 100。
  38. ↑ 38.0 38.1 38.2 《張國榮：不如我們從頭來過》。頁 101。
  39. ↑ 〈come back to love: 張國榮 Summer Romance '87 平面廣告〉。come back to love。喺2023-04-04搵到。
  40. ↑ am730 (2021-03-02)。〈Gary Tong猝逝｜與無數歌手合作 張國榮御用監製之一〉。am730 (中文)。喺2023-04-04搵到。
  41. ↑ 〈"太极乐队"唐奕聪猝逝，谢谢他留下的无数粤语歌_张国荣〉。www.sohu.com。喺2023-04-04搵到。{{cite web}}: CS1 maint: url-status (link)
  42. ↑ 〈8月21日之廣東歌｜明日之廣東歌｜商業電台 881903〉。《商業電台 881903》 (繁體中文)。2020-08-21。喺2023-04-04搵到。
  43. ↑ 〈歷屆得獎名單 - 2010十大勁歌金曲頒獎典禮 - tvb.com〉。jsg.tvb.com。喺2023-04-04搵到。
  44. ↑ 44.0 44.1 44.2 44.3 非凡出版 (2021-01-21)。〈回憶張國榮｜歌曲颳起不羈風與譚詠麟成勁敵 巔峰之際突告別樂壇〉。《香港01》 (香港中文)。喺2022-03-08搵到。
  45. ↑ 《張國榮的《Virgin Snow》》 (中文)，1988-01-01，喺2023-04-04搵到
  46. ↑ "‎Hot Summer by 張國榮 on Apple Music". web.archive.org. 2018-10-26. 歸檔時間2018-10-26. 喺2023-04-04搵到.{{cite web}}: CS1 maint: bot: original URL status unknown (link)
  47. ↑ 47.0 47.1 网易 (2021-08-07)。〈1988年2月张国荣粤语专辑《Virgin Snow》〉。www.163.com。喺2023-04-04搵到。
  48. ↑ 〈资料：1988度十大中文金曲(第十一届颁奖礼)_影音娱乐_新浪网〉。ent.sina.com.cn。喺2023-04-04搵到。
  49. ↑ 世界新聞網。〈沉默是金〉。《世界新聞網》 (臺灣中文)。喺2023-04-04搵到。
  50. ↑ 〈歷年十大中文金曲頒獎音樂會 - 第十一屆 (1988)〉。web.archive.org。2022-08-29。歸檔時間2022-08-29。喺2023-04-09搵到。{{cite web}}: CS1 maint: bot: original URL status unknown (link)
  51. ↑ 51.0 51.1 〈【想你張國榮】Leslie淚眼憶人生3大憾事 張國榮難忘被阿倫歌迷狂噓侮辱 - 香港經濟日報 - TOPick - 娛樂〉。topick.hket.com。喺2023-04-04搵到。
  52. ↑ 〈61歲冥誕 港人依舊最愛你的唱片｜哥哥昔日舞台風采 - 香港文匯網〉。news.wenweipo.com。原著喺2023-04-04歸檔。喺2023-04-04搵到。
  53. ↑ 〈最受歡迎男歌星〉。原先內容歸檔喺2020年3月27號。喺2007年10月15號搵到。
  54. ↑ 54.0 54.1 54.2 54.3 monthly, BIOS。〈香港八〇｜三十歲的張國榮談起「譚張之爭」，像個受傷很深的少年 ｜ BIOS monthly〉。www.biosmonthly.com。喺2023-04-05搵到。
  55. ↑ 55.0 55.1 笔趣历史 (2020-09-29)。〈5年"谭张争霸"事件始末，张国荣谭咏麟到底经历了怎样的伤害？〉。k.sina.cn。喺2023-04-05搵到。
  56. ↑ 56.0 56.1 56.2 56.3 鍾樂偉 (2016-04-01)。〈到今日，韓國人也沒有忘記張國榮〉。《The News Lens 關鍵評論網》 (中文)。原著喺2023-04-08歸檔。喺2023-04-08搵到。
  57. ↑ 57.0 57.1 57.2 57.3 57.4 〈韩国人心中的"张国荣"情结_腾讯新闻〉。new.qq.com。喺2022-08-27搵到。
  58. ↑ 58.0 58.1 58.2 〈【本週音樂】懷念永遠的巨星—張國榮〉。《鏡週刊 Mirror Media》 (繁體中文)。2017-03-31。喺2022-08-30搵到。
  59. ↑ 自由時報電子報 (2018-09-16)。〈與張國榮唱紅〈兜風心情〉 52歲柏安妮現在長這樣 - 自由娛樂〉。《自由時報電子報》。喺2022-08-30搵到。
  60. ↑ 〈張國榮作驚人宣佈 演唱會完畢後收山〉。www.lesliecheung.cc。喺2022-08-27搵到。{{cite web}}: CS1 maint: url-status (link)
  61. ↑ 〈她退了，他們沒有〉。www.singtaousa.com (中文)。喺2022-08-20搵到。
  62. ↑ 〈【繼續為你鍾情】哥哥點解叫哥哥？十件張國榮你或許想知道的事 - 晴報 - 娛樂 - 中港台〉。skypost.ulifestyle.com.hk (中文)。原著喺2023-04-04歸檔。喺2022-08-20搵到。
  63. ↑ 63.0 63.1 蔣林。《不一樣的煙火:張國榮音樂傳奇》。頁 239。
  64. ↑ 64.0 64.1 64.2 64.3 《張國榮：不如我們從頭來過》。頁 167。
  65. ↑ ETtoday新聞雲。〈張國榮離開17年從未忘記！唐鶴德深夜曬照：我知道，你在另一個國度想念我們 | ETtoday星光雲 | ETtoday新聞雲〉。star.ettoday.net (繁體中文)。原先內容歸檔喺2021-09-29。喺2021-09-29搵到。
  66. ↑ Cheung, Apeiron (2020-04-01)。〈張國榮 超越時代〉。《TOHK 多聞》。喺2022-08-30搵到。{{cite web}}: CS1 maint: url-status (link)
  67. ↑ 67.0 67.1 〈张国荣专辑《宠爱》〉。web.archive.org。2017-08-06。歸檔時間2017-08-06。喺2023-04-09搵到。{{cite web}}: CS1 maint: bot: original URL status unknown (link)
  68. ↑ TVBS。〈金馬獎／五度入圍金馬未封帝 張國榮以「歌」獲獎│TVBS新聞網〉。TVBS (臺灣中文)。喺2023-04-09搵到。
  69. ↑ 〈回望滚石30年：兴衰，与华语乐坛同步〉。web.archive.org。2021-05-21。歸檔時間2021-05-21。喺2023-04-09搵到。{{cite web}}: CS1 maint: bot: original URL status unknown (link)
  70. ↑ 70.0 70.1 《張國榮：不如我們從頭來過》。頁 170。
  71. ↑ 〈‎紅 by 張國榮 on Apple Music〉。web.archive.org。2018-10-26。歸檔時間2018-10-26。喺2023-04-09搵到。{{cite web}}: CS1 maint: bot: original URL status unknown (link)
  72. ↑ 72.0 72.1 72.2 《張國榮：不如我們從頭來過》。頁 174–175。
  73. ↑ 73.0 73.1 73.2 《張國榮：不如我們從頭來過》。頁 192。
  74. ↑ 74.0 74.1 74.2 《張國榮：不如我們從頭來過》。頁 194–195。
  75. ↑ 75.0 75.1 75.2 〈第二十二届十大中文金曲获奖名单(1999年)〉。web.archive.org。2014-11-05。原著喺2014-11-05歸檔。喺2023-04-09搵到。
  76. ↑ 〈張國榮鐵定親領金針獎〉。www.lesliecheung.cc。喺2023-04-09搵到。{{cite web}}: CS1 maint: url-status (link)
  77. ↑ 《不一樣的煙火:張國榮音樂傳奇》。頁 121。
  78. ↑ 〈‎大熱 by 張國榮 on Apple Music〉。web.archive.org。2018-10-26。歸檔時間2018-10-26。喺2023-04-10搵到。{{cite web}}: CS1 maint: bot: original URL status unknown (link)
  79. ↑ 〈CCTV-MTV音乐盛典明星大亮相〉。web.archive.org。2021-08-10。歸檔時間2021-08-10。喺2023-04-10搵到。{{cite web}}: CS1 maint: bot: original URL status unknown (link)
  80. ↑ 《張國榮：不如我們從頭來過》。頁 217。
  81. ↑ 《不一樣的煙火:張國榮音樂傳奇》。頁 246。
  82. ↑ 〈第25届十大中文金曲完全获奖名单(3)〉。web.archive.org。2021-05-21。歸檔時間2021-05-21。喺2023-04-10搵到。{{cite web}}: CS1 maint: bot: original URL status unknown (link)
  83. ↑ 《不一樣的煙火:張國榮音樂傳奇》。頁 250。
  84. ↑ 〈张国荣遗作大碟创纪录 香港一分钟卖一张(附图)〉。ent.sina.com.cn。喺2023-04-10搵到。
  85. ↑ 〈讓風繼續吹—紀念 張國榮 逝世20週年｜方格子 vocus〉。vocus.cc (英文)。2023-03-31。喺2023-04-10搵到。
  86. ↑ 范永聰，范詠誼，楊映輝。《致我們的中學時光》。頁 166。
  87. ↑ 〈第一代百事巨星〉。原著喺2009年3月19號歸檔。喺2007年9月2號搵到。
  88. ↑ Muzikland。《香港流行音樂專輯101：第一部 1971-1987》。頁 252。
  89. ↑ 〈張國榮演唱會 跳躍、鮮艷、電影感〉。www.lesliecheung.cc。喺2022-08-26搵到。{{cite web}}: CS1 maint: url-status (link)
  90. ↑ 朱奕錦 (2022-04-02)。〈張國榮2000年《熱·情》演唱會超清修復版首播 前衛造型曾招負評〉。《香港01》 (香港中文)。喺2022-10-09搵到。
  91. ↑ 〈英女王逝世︳1986年最後訪港 張國榮成龍張學友參與大匯演獻藝〉。hk.news.yahoo.com (中文)。喺2022-10-09搵到。
  92. ↑ 《張國榮：不如我們從頭來過》。頁 44。
  93. ↑ 〈【張之珏專訪1】收留張國榮暫住屋企 Leslie牀單保存至今〉。《明周娛樂》。2021-09-08。喺2022-08-27搵到。{{cite web}}: CS1 maint: url-status (link)
  94. ↑ 聯合新聞網 (2018-06-15)。〈紅樓大混戰 林青霞演寶玉最俊俏 張國榮沾情色最犧牲〉。《噓！星聞》 (中文)。喺2022-04-14搵到。
  95. ↑ 95.0 95.1 95.2 〈張國榮逝世20周年丨首部電影與黃杏秀拍三級《紅樓夢》自嘲「衰幾年」 60作品成就亞洲最偉大演員〉。www.singtaousa.com (中文)。喺2023-04-13搵到。
  96. ↑ Something, 30 (2011-04-01)。〈30 Something: 張國榮+陳百強+鍾保羅的青春電影 (二): 失業生 (1981)〉。30 Something。歸檔時間2019-09-23。喺2023-04-13搵到。{{cite web}}: CS1 maint: bot: original URL status unknown (link) CS1 maint: numeric names: 作者名單 (link)
  97. ↑ 莫匡堯 (2023-03-31)。〈烈火青春︱隔40年譚家明重剪修復 「二次創作」為哥哥再造結局〉。《香港01》 (香港中文)。喺2023-04-13搵到。
  98. ↑ 《張國榮：不如我們從頭來過》。頁 79。
  99. ↑ 〈張國榮想改變戲路〉。web.archive.org。2021-05-17。歸檔時間2021-05-17。喺2022-04-14搵到。{{cite web}}: CS1 maint: bot: original URL status unknown (link)
  100. ↑ 非凡出版 (2021-01-21)。〈回憶張國榮｜歌曲颳起不羈風與譚詠麟成勁敵 巔峰之際突告別樂壇〉。《香港01》 (香港中文)。喺2022-08-27搵到。
  101. ↑ 〈張國榮狄龍拗誰做劊子手〉。www.lesliecheung.cc。喺2023-07-03搵到。{{cite web}}: CS1 maint: url-status (link)
  102. ↑ "Digital Chosunilbo (Chinese Edition) : Daily News in Chinese About Korea". web.archive.org. 2008-08-12. 歸檔時間2008-08-12. 喺2023-04-13搵到.{{cite web}}: CS1 maint: bot: original URL status unknown (link)
  103. ↑ 《不一樣的煙火:張國榮音樂傳奇》。頁 91。
  104. ↑ 〈【巨星逝世19周年】張國榮最愛《胭脂扣》「十二少」 不喜歡《霸王別姬》「程蝶衣」 -- 上報 / 流行〉。www.upmedia.mg。喺2022-04-14搵到。
  105. ↑ 〈張國榮歸來侃侃而談得獎感受〉。喺2023-11-03搵到。
  106. ↑ TVBS。〈張國榮摯愛唐鶴德 揭幕哥哥蠟像│TVBS新聞網〉。TVBS (臺灣中文)。喺2022-04-04搵到。
  107. ↑ 中時新聞網。〈《阿飛正傳》回味張國榮戲魂 - 娛樂新聞〉。《中時新聞網》 (中文)。喺2022-04-15搵到。
  108. ↑ 108.0 108.1 〈【張國榮離世17年】睡不夠就會鬧脾氣還愛鬥嘴？ 重溫哥哥5個面貌〉。hk.news.yahoo.com (中文)。喺2023-01-28搵到。
  109. ↑ 《張國榮：不如我們從頭來過》。頁 140。
  110. ↑ 《張國榮：不如我們從頭來過》。頁 140-141。
  111. ↑ 鄒崇銘 (2020-07-04)。〈《阿飛正傳》三十周年祭 再談「冇腳的雀仔」的追尋和失落｜01周報〉。《香港01》 (香港中文)。喺2022-04-15搵到。
  112. ↑ 〈《阿飞正传》：无足鸟寻找归处〉。2014-11-04。歸檔時間2021-08-10。喺2023-11-16搵到。{{cite news}}: CS1 maint: bot: original URL status unknown (link)
  113. ↑ 陳穎思 (2020-12-22)。〈【阿飛正傳】重溫十大經典對白 「旭仔」名言永垂不朽〉。《香港01》 (香港中文)。喺2022-04-15搵到。
  114. ↑ 《張國榮：不如我們從頭來過》。頁 143。
  115. ↑ 〈哥哥逝世15周年 回顧張國榮經典演出背後的秘密 - 香港經濟日報 - TOPick - 休閒消費〉。topick.hket.com。原先內容歸檔喺2021-12-11。喺2021-07-28搵到。
  116. ↑ 《张国荣私家相册: 张国荣辞世两周年特别纪念传记》。頁 95。
  117. ↑ 117.0 117.1 電影神搜 (2018-12-29)。〈【霸王別姬．影評】張國榮成就不朽經典 重拾當年難以忘懷的感動〉。《香港01》 (香港中文)。喺2022-04-15搵到。
  118. ↑ 香港電影評論學會最佳男演員獎[失咗效嘅鏈]
  119. ↑ 《张国荣私家相册: 张国荣辞世两周年特别纪念传记》。頁 102。
  120. ↑ 中時新聞網。〈書摘精選》沒有明星的星光大道 - 娛樂〉。《中時新聞網》 (中文)。喺2022-04-04搵到。
  121. ↑ 洪曉璇 (2020-10-10)。〈梅艷芳57歲冥壽｜黃偉文公開《芳華絕代》手稿：職業生涯最大運氣〉。《香港01》 (香港中文)。原先內容歸檔喺2021-07-28。喺2021-07-28搵到。
  122. ↑ 122.0 122.1 122.2 122.3 122.4 122.5 陳嘉欣 (2017-04-19)。〈張國榮低調探望骨癌粉絲 生前行善感動人心〉。《香港01》 (香港中文)。喺2023-01-28搵到。
  123. ↑ 《不一樣的煙火:張國榮音樂傳奇》。頁 240。
  124. ↑ 124.0 124.1 〈剧本与景点都未定 张国荣的《偷心》不能按期开拍〉。ent.sina.com.cn。喺2023-02-13搵到。
  125. ↑ 《張國榮：不如我們從頭來過》。頁 231。
  126. ↑ 《張國榮：不如我們從頭來過》。頁 232。
  127. ↑ 127.0 127.1 127.2 127.3 〈【張國榮Leslie】張國榮離世20周年 原來一生只曾代言4個品牌？（附廣告片） -〉。inews.hket.com。喺2023-04-14搵到。{{cite web}}: CS1 maint: url-status (link)
  128. ↑ HK, ELLE。〈拆解Blackpink擔任Pepsi Black亞太區代言全黑造型！歷代經典百事代言人你數得出幾多個？ | ELLE HK〉。www.elle.com.hk。喺2023-04-14搵到。
  129. ↑ 〈那些年精彩的機車廣告歌曲，創造華語歌壇與機車產業共榮共好的雙贏〉。www.fountmedia.io。喺2023-04-14搵到。
  130. ↑ 吳子生 (2019-03-31)。〈【張國榮逝世16周年】前突發記者揭謎底 一個報案電話保哥哥尊嚴〉。《香港01》 (香港中文)。原先內容歸檔喺2021-09-26。喺2021-09-26搵到。
  131. ↑ 131.0 131.1 〈【想你張國榮】抑鬱症不只是心理疾病 哥哥患生理抑鬱影響身體機能 - 香港經濟日報 - TOPick - 健康 - 醫生診症室〉。topick.hket.com。原先內容歸檔喺2021-12-11。喺2021-07-28搵到。
  132. ↑ 132.0 132.1 132.2 132.3 〈【星期日人物】張國榮離世十五周年 狂迷：鍾意哥哥係一生信仰〉。《明周文化》。2018-03-31。喺2022-08-21搵到。{{cite web}}: CS1 maint: url-status (link)
  133. ↑ 〈東網光影：一代巨星張國榮殞落〉。《on.cc東網》 (香港中文)。2017-04-01。原先內容歸檔喺2021-09-26。喺2021-09-26搵到。
  134. ↑ 〈【一代巨星】唐鶴德紀念張國榮64歲冥壽 IG貼舊照懷念哥哥：分開也像同渡過 - 香港經濟日報 - TOPick - 娛樂〉。topick.hket.com。原先內容歸檔喺2021-09-26。喺2021-09-26搵到。
  135. ↑ 澎湃新闻 (2019-12-01)。〈明星自杀，最可怕的是他们带来的"自杀模仿"〉。news.sina.com.cn。喺2023-04-08搵到。
  136. ↑ 〈東方日報C1：張國榮「復活」內地揸巴士〉。東方日報。2019-07-17。
  137. ↑ 〈張國榮還活著？許多網友認為是惡作劇〉。人民網。喺2004-06-03搵到。
  138. ↑ 《張國榮：不如我們從頭來過》。頁 166。
  139. ↑ 中時新聞網。〈張國榮逝世17週年 初戀女友嫁漫畫教父卻悲劇「苦養自閉兒」 - 娛樂〉。《中時新聞網》 (中文)。原先內容歸檔喺2021-05-10。喺2021-05-09搵到。
  140. ↑ ETtoday新聞雲。〈還記得「李莫愁」嗎？ 消失34年肉垂皮鬆現況曝光 | ETtoday星光雲 | ETtoday新聞雲〉。star.ettoday.net (繁體中文)。原先內容歸檔喺2017-05-10。喺2021-05-09搵到。
  141. ↑ 141.0 141.1 141.2 141.3 〈張國榮逝世15周年 唐鶴德沿用哥哥電話號碼至今？ - 香港經濟日報 - TOPick - 休閒消費〉。topick.hket.com。喺2021-05-09搵到。
  142. ↑ 〈【IQ成熟時】59歲鄧慧詩素顏與港台元祖級DJ聚會 張國榮舊愛與林慕德譜黃昏戀 - 晴報 - 娛樂 - 中港台〉。https (中文)。原先內容歸檔喺2021-12-11。喺2021-05-09搵到。
  143. ↑ 沈洛嘉 (2021-04-01)。〈張國榮逝世18週年｜盤點8位影后拍檔 毛舜筠唯一被公開認愛〉。《香港01》 (香港中文)。原先內容歸檔喺2021-12-11。喺2021-05-09搵到。
  144. ↑ 〈【蘋聞重溫】拒絕張國榮求婚 ｜ 蘋果日報〉。《Apple Daily 蘋果日報》 (香港中文)。原先內容歸檔喺2021-05-09。喺2021-05-09搵到。
  145. ↑ 〈張國榮62歲生忌 廿歲哥哥向毛舜筠求婚被拒 - 香港經濟日報 - TOPick - 休閒消費〉。topick.hket.com。原先內容歸檔喺2021-12-11。喺2021-05-09搵到。
  146. ↑ 美麗佳人編輯部。〈張國榮走了19年！仍以優雅前衛超越時代：「如果有一個人喜歡我，我也同樣地喜歡對方的話，是男是女並不重要。」〉。《Marie Claire 美麗佳人》 (臺灣中文)。喺2023-02-07搵到。
  147. ↑ 147.0 147.1 關熙潮。《張國榮：不如我們從頭來過》。頁 89。
  148. ↑ 网易 (2021-04-29)。〈明星、富豪、贪官扎堆，一条街上的中国金钱名利场〉。www.163.com。喺2023-04-09搵到。
  149. ↑ ETtoday新聞雲。〈「回頭一牽手就是一輩子」 唐鶴德守身獨愛張國榮20年 | ETtoday星光雲 | ETtoday新聞雲〉。star.ettoday.net (繁體中文)。原先內容歸檔喺2017-07-13。喺2021-05-09搵到。
  150. ↑ 150.0 150.1 150.2 〈曾唱《月亮代表我的心》公開至愛 與唐唐18年突陷四角戀〉。the-sun.on.cc。喺2023-02-07搵到。{{cite web}}: CS1 maint: url-status (link)
  151. ↑ 《媒介與性╱別》。頁 143。
  152. ↑ 〈張國榮行善錢力齊出 送梅豔芳情侶裝為博歡心〉。www.lesliecheung.cc。喺2023-01-28搵到。{{cite web}}: CS1 maint: url-status (link)
  153. ↑ 153.0 153.1 153.2 153.3 《不一樣的煙火:張國榮音樂傳奇》。頁 188。
  154. ↑ 154.0 154.1 154.2 《張國榮：不如我們從頭來過》。頁 210–211。
  155. ↑ 155.0 155.1 〈一世怀念！张国荣逝世17周年 生前爱好体育曾观战世界杯决赛〉。www.ppsport.com。喺2023-01-28搵到。
  156. ↑ 《张国荣私家相册: 张国荣辞世两周年特别纪念传记》。頁 155。
  157. ↑ 浩然看电影 (2020-05-16)。〈张国荣有多好？自己烟不离手却劝人戒烟〉。k.sina.cn。喺2023-01-28搵到。
  158. ↑ 〈15年來代譜心聲 林夕披露拍檔心意 張國榮以《我》宣示性取向 | 蘋果日報•聞庫〉。《聞庫》。2003-04-05。喺2023-04-10搵到。
  159. ↑ 〈張國榮的性別遺產：15年後仍然領先時代〉。《BBC News 中文》 (繁體中文)。喺2023-02-06搵到。
  160. ↑ 〈1：16張國榮繼續熱捧 - 東方日報〉。orientaldaily.on.cc。喺2023-04-09搵到。
  161. ↑ "Encore screening of Leslie Cheung, Anita Mui classics | The Standard". web.archive.org. 2020-10-27. 歸檔時間2020-10-27. 喺2023-07-01搵到.{{cite web}}: CS1 maint: bot: original URL status unknown (link)
  162. ↑ Hong Kong Cantopop: A Concise History. p. 80.
  163. ↑ 〈中國二十世紀十大文化偶像〉。原著喺2008年4月17號歸檔。喺2008年5月3號搵到。
  164. ↑ 〈張國榮被選為一百年來最喜愛的男演員〉。原著喺2009年3月19號歸檔。喺2007年9月2號搵到。
  165. ↑ 〈張國榮被選為「十佳演員〉。原著喺2007年8月29號歸檔。喺2007年9月2號搵到。
  166. ↑ 166.0 166.1 〈圖輯：十五年後 張國榮為何還在收獲粉絲〉。《BBC News 中文》 (繁體中文)。喺2022-08-23搵到。
  167. ↑ 167.0 167.1 〈1990s「哥迷」5年登頭版廣告 賀張國榮生日 - 20210827 - CULTURE & LEISURE〉。《明報OL網》 (繁體中文)。喺2022-08-23搵到。
  168. ↑ 168.0 168.1 〈張國榮婚紗照曝光 忠實女粉絲：不會再嫁！｜蘋果新聞網｜蘋果日報〉。AppleDaily (中文)。2021-03-27。喺2022-08-23搵到。
  169. ↑ 夏子婷 (2022-03-07)。〈飛虎3壯志英雄｜河國榮結婚32年愛妻專一 為患病妻棄生育〉。《香港01》。喺2022-08-23搵到。{{cite web}}: CS1 maint: url-status (link)
  170. ↑ 〈資深榮迷回憶追星歲月 跟張國榮共同度過的人生 - 香港經濟日報 - 報章 - 副刊〉。paper.hket.com。喺2022-08-23搵到。
  171. ↑ 〈張國榮離世18年！00後粉絲靠作品追傳奇一生 克服焦慮症獨立辦展｜蘋果新聞網｜蘋果日報〉。AppleDaily (中文)。2021-04-01。喺2022-08-23搵到。
  172. ↑ 172.0 172.1 172.2 HK, Harper's BAZAAR。〈張國榮當年的影響力！就連韓星都要靠邊站〉。www.harpersbazaar.com.hk (英文)。喺2022-02-25搵到。
  173. ↑ 石子順。《中國電影的明星——朱旭，姜文，張藝謀，張國榮》。
  174. ↑ 〈張國榮有多受日本人歡迎？｜從未曝光過的照片窺探哥哥的心靈角落 | Art〉。Madame Figaro Hong Kong (美國英文)。2022-01-10。喺2023-04-08搵到。
  175. ↑ 〈韓國人迷戀張國榮之謎　首爾奉恩寺建紀念碑及植樹 （王夕子）〉。亞洲周刊。2021-04-12。 {{cite news}}: |first1= missing |last1= (help)
  176. ↑ 劉苑杉。〈【投書】張國榮，不如我們重新來過：「後榮迷」的愚人節悲傷〉。{{cite web}}: CS1 maint: url-status (link)
  177. ↑ 黎倩婷 (2022-04-01)。〈張國榮逝世19周年｜前區議員製哥哥足跡圖 提供疫下另類文化旅遊〉。《香港01》 (香港中文)。喺2022-04-02搵到。
  178. ↑ 〈韓國CGV追憶張國榮逝世19週年《THE張國榮特展》，台灣將於4月1日上映經典三部張國榮作品〉。tw.news.yahoo.com (中文)。喺2022-04-04搵到。
  179. ↑ 〈香港流行歌星郵票〉。原著喺2007年11月16號歸檔。喺2007年9月2號搵到。
  180. ↑ 三立新聞網 (2022-02-11)。〈香港影帝TOP10！梁朝偉只排第二 網：第一實至名歸 | 娛樂星聞 | 三立新聞網 SETN.COM〉。www.setn.com (中文)。喺2022-02-27搵到。
  181. ↑ 181.0 181.1 王誦賢 (2021-03-31)。〈盤點8部張國榮客串電影 唔止《97家有囍事》用過「張國榮」現身〉。《香港01》 (香港中文)。喺2022-02-27搵到。
  182. ↑ Storm.mg (2021-04-08)。〈張國榮逝世18週年》13部經典電影，帶你一同回憶永遠的哥哥—張國榮-風傳媒〉。www.storm.mg (臺灣中文)。喺2022-02-27搵到。
  183. ↑ 183.0 183.1 關熙潮。《張國榮：不如我們從頭來過》。頁 第三章。
  184. ↑ 林迅景 (2018-04-01)。〈【張國榮逝世15周年】哥哥18個電視劇造型 光頭look一樣咁靚仔〉。《香港01》 (香港中文)。喺2022-02-27搵到。
  185. ↑ 185.0 185.1 自由時報電子報 (2015-09-12)。〈《今日壽星》 離世12年 緬懷一代巨星張國榮 - 自由娛樂〉。《自由時報電子報》。喺2022-02-27搵到。
  186. ↑ 華僑日報。〈張國榮成立歌迷會 望演得成「人間蒸發」〉。mmis.hkpl.gov.hk。喺2022-04-13搵到。{{cite web}}: CS1 maint: url-status (link)
  187. ↑ 《張國榮：不如我們從頭來過》。頁 244。
  188. ↑ ETtoday新聞雲。〈哥哥好想你！張國榮逝世15年 「這10首經典」聽了就想念 | ETtoday星光雲 | ETtoday新聞雲〉。star.ettoday.net (繁體中文)。喺2022-04-14搵到。
  189. ↑ 〈【本週音樂】懷念永遠的巨星—張國榮〉。《鏡週刊 Mirror Media》 (繁體中文)。2017-03-31。喺2022-04-14搵到。
  190. ↑ 〈張國榮宣布復出〉。原先內容歸檔喺2020年5月14號。喺2020年5月31號搵到。

出面網頁

編輯
 
維基同享有多媒體嘅嘢：
Leslie Cheung
 
維基語錄收錄咗同呢篇文相關嘅摘錄： :zh:張國榮
由「https://zh-yue.wikipedia.org/w/index.php?title=張國榮&oldid=2211087」收