An

An an al indica an periodo de tenpo pari a quel doperà da la Tera par conpletar la so orbita dintorn del Sol. An an al ze dividest in 365 dì, ma da' che la Tera la feniss al so giro te un tenpo poco pi longo se ga rendest necessario dontar i ani bisesti fati de 366 dì, par coreger la diferensa. par estension al nome se el dopera par al periodo orbital de qualunque pianeta, te el qual caso a "an" ghe gnen dontà an agetiu (come "an marsian"). In astronomia gnen definidi diversi tipi de an:

• an siderale: al definiss al periodo che ghe mete la Tera par far na rivolusion conpleta de la so orbita, mesurada rispeto a un insieme de punti de riferimento (come le stele fisse). La so durada mèdia la ze de 365,256 363 051 dì (365 d 6 h 9 min 10 s).

La durada real del an la canbia, in quant al movimento de la Tera al ze influensà da la gravità de la Luna e dei altri pianeti.

• an tropico: al periodo che ghe mete la Tera a far na rivolusion, co riferimento a la strutura formada da la intersesion tra la eclitica (al pian su el qual gira la tera) e al pian del Equator (al pian perpendicolar al ass de rotasion de la Tera). Par colpa de la precession, sta strutura la va an pel indrio te la eclitica rispeto a le stele fisse. Come conseguensa, al an tropico al ze an pel pi curt rispeto a quel sideral. La so durada mèdia la ze de 365,242 189 67 dì (365 d 5 h 48 min 45 s).
• an anomalo: al periodo che la Tera la conpleta na rivolusion de la so orbita rispeto a i so apsidi. La orbita terestre la ze elitica; i punti estremi de la elisse, ciamadi apsidi, i è:

1. al perielio, aonde che la Tera la ze pì arent al Sol (dintorn del 2 de genaro)
2. al afelio, aonde che la Tera la ze pì distante dal Sol (dintorn del 2 de lujo).

Par via de la interferensa gravitasional dei altri pianeti, la sagoma e al orientamento de la orbita no i ze fissi, e i apsidi i se sposta a pianpianet rispeto a i punti de riferimento. Par sto motivo, al an anomalo al ze na s-cianta pì longo del an siderale. In mèdia 365,259 635 864 dì (365 d 6 h 13 min 52 s).

• an eclitico: al periodo che ghe mete al Sol (come che el gnen vist da la Tera) par conpletar na rivolusion co riferimento a un nodo lunar, de la orbita de la Luna (al punto aonde che al orbita lunar la interseca la eclitica). Sto periodo al ze associà co le eclissi: le gnen co tanto al Sol fa la Luna i ze arent a un de sti do nodi; sichè le eclissi le gnen al incirca entro an mese ogni medo an eclitico. Ghe n'è de conseguensa do stajon eclitiche ogni an. la durada mèdia del an eclitico la ze de 346,620 075 883 dì.
• in maniera analoga del an eclitico, gnen definì an periodo 'te el qual al Sol (come che el gnen vist da la Tera) al conpleta na rivolusion co riferimento al perigeo de la orbita lunar. Sto periodo, poco mansonà 'te la leteradura astronomica, al ze associà co la dimension aparente de la Luna al colm, e anca co la durada variabile del mese sinodico. La durada de sto periodo la ze de 411,784 430 29 dì.

Al Calendario normalmente al tenta de adeguarse al an tropico, parchè le stajon le ze determinade da sto tipo de an. Par motivi pràteghi al an del calendario al ze fat da un numero intiero de dì. te el calendario dess in vigor te la società ocidental, al calendario gregorian, i ani i ga 365 dì. A el scopo de cenerlo sincronizà co el an tropico, ogni 4 ani an calendario al conta 366 dì (an bisest). La principal ecesion al calendario gregorian la ze al calendario islamico, an calendario lunar sensa ani bisesti, secont al qual le ricorense le se sposta te le stajon.

Al an giuliano: base del calendario giuliano al ła na durada de 365,25 dì.

Al an gaussiano al dura 365,256 898 3 dì, e al ze derivà da la "costante gravitasional gaussiana" che la gnen espressa in unità del sistema solare.

Al an besseliano: al ze an an tropico che el scominsia quando che al Sol al rua a la longitudine elitica di 280°. Sta longitudine la gnen senpre dondesta arent al 1° de genaro. Al ciapa al nome dal astronomo e matemàtego del XIX secolo Friedrich Bessel.

• Na ana la ze an an de miseria.
• an de la fam co la alusion al 1816 e dopo al 1917, ani che ze stat patì la far par colpa de na carestia te el primo caso, e de la guera te el secondo. "Tu se longo come al an de la fam" se ghe el diss a uno par dir che al ze tanto pegro.
• An bisest, ogni mat al fa al so sest.

• An luce
• Calendario
• Ordini de grandesa (tenp)

• Wikimedia Commons el detien imàjini o altri file so an
• Scholia el detien schemi gràfeghi so An