Corsica (Francia): Doppu tri jorna di isolamentu quasi totali pi lu sciòpiru dî travagghiatura dî porti corsi, li primi navi pàrtunu dâ Còrsica pi lu cuntinenti. E' la fini dî disaggi pî turisti bluccati ddà.
Gènuva (Italia) - Mori l'allinaturi sicilianu Francu Scoglio: stasira, duranti na trasmissioni televisiva di l'emittenti privata ginuvisi Primo Canale, doppu na discussioni telefònica cu lu prisidenti dû Genoa, Francu Scoglio si sintìu ladiu e murìu. Avìa nasciutu a Lipari, 64 anni fà.
Stoccolma (Svezzia) - Li scinziati miricani Roy J. Glauber e John L. Hall e lu tidiscu Theodor W. Hänsch vinceru lu premiu Nobel pi la fìsica.
Palermu (Italia) - Li carabbineri arristaru a Liborio Immordino, diritturi di lu spitali Cervello di Palermu. L'accusa è di truffa gravi e fausu.
Nyon (Svizzira) - Foru surtiggiati li giruna di la Coppa UEFA. La squatra dû Palermu capitau cu li russi dû Lokomotiv Mosca, li spagnoli di l'Espanyol Barcillona, li danisi dû Broendby e l'israiliani dû Maccabi Petach-Tikva.
Monacu (Principatu di Monacu) - La squatra dû Mònacu ufficializzau oi di aviri pigghiatu comu allinaturi a l'ex allinaturi dû Palermu, Francesco Guidolin.
Stoccolma (Svezzia) - L'AIEA (Agginzìa Ntirnazziunali di l'Energìa Atòmica) e lu sò capu, l'egizzianu Mohamed El Baradei, vinceru lu premiu Nobel pi la paci pi lu sò mpegnu contra la diffusioni di l'armi nucliari.
Palermu - Un fattu straurdinariu capitau oi nni lu spitali Civico di Palermu: un picciriddu di 11 anni niscìu dû coma doppu 23 jorna.
Panabaj (Guatemala) - Quasi 1500 pirsuni mureru nn'un paiseddu dû Guatemala di nomu Panabaj sutta na lavanca di limarra causata di tutta la granni quantitati d'acqua di celu ca cadìu nni sti ùrtimi jorna pi l'arrivu dû cicluni Stan
Palermu - Stasira a li 21,00 la Nazziunali Taliana di palluni joca 'n Palermu contra la Slovenia na partita ca putissi èssiri determinanti pi la qualificazzioni a li Munniali di Girmania.
Palermu - L'Italia si qualificau pi li Campiunati Munniali di Girmania battennu stasira 'n Palermu la Slovenia pi 1 a 0 cu la riti dû jucaturi dû Palermu Cristian Zaccardo.
Cina - La navicedda spazziali Shenzhou VI partìu stamatina ntô spazziu cu dui astrunauti cinisi, Fei Junlong e Nie Haisheng, dû polìgunu spazziali di Jiuquan, milli chilòmitri a nord-ovest di Pechinu.
Lecci - Stasira a li 20,30 la Nazziunali Taliana di palluni joca a Lecci contra la Moldavia l'ùrtima partita di lu giruni di qualificazzioni pi li Munniali di Girmania. L'Italia accanzau la qualificazzioni cu na jurnata d'antìcipu.
Lecci - L'Italia vincìu cû risultatu di 2 a 1 la Moldavia; signaru pi l'Italia Vieri e Gilardinu.
Roma - Impregilo accanzau l'appaltu pi custruiri lu ponti nta lu Strittu di Missina. Battìu l'àutra curdata, la Astaldi.
Roma - Lu Cunsigghiu Supiriuri di la Magistratura numinau a Petru Grassu comu novu Procuraturi Nazziunali Antimafia.
Asculi Picenu - A la fini dâ partita di palluni ntra Àsculi e Sampdoria un razzu sparatu di l'àutra curva jìu a firiri na signura tifusa dâ Sampdoria. La pulizzìa scuprìu cu fu: un picciutteddu di 16 anni ca avìa trasutu nnô stadiu a partita finuta.
Ateni (Grecia) - Dui scossi di tirrimotu di ntinzità 6 di la scala Richter foru sintuti stasira nta l'ìsula di Zanti, ntô Mari Joniu. Nun s'havi nudda nutizzia di morti o firiti.
Tel Aviv (Israeli) - La squatra di palluni dû Palermu vincìu la sò prima partita dû giruni dâ Coppa UEFA, battennu pi 2 a 1 fora casa lu Maccabi Petah Tikva; pû Palermu signaru Brienza e Terlizzi.
Varsavia (Pulonia) - Secunnu li primi exit poll, lu candidatu cattòlicu Lech Kaczyński, 56 anni, vincìu lu balluttaggiu di li prisidinziali cu lu 53% dî voti.
Lagos (Nigeria) - Nun ci sunnu supèrstiti ntra li passaggeri di l'ariuplanu, un Boeing 737, ca cadìu la notti passata in Nigeria: pari ca li morti sunnu 116.
Cità dû Vaticanu - Lu papaBinidittu XVI oi canunizzau li primi 5 santi di lu sò puntificatu: Jozef Bilczewski, pulaccu; Gaetanu Catanoso, calabbrisi; Zygmunt Gorazdowski, pulaccu; Alberto Hurtado Cruchaga, cilenu e lu frati franciscanu sicilianu Filìci di Nicusìa
Bagdad (Iraq) - Dicinnovi pirsuni mureru stasira nnû Palestine, l'albergu dî giurnalisti straneri ntô centru di Bagdad, doppu l'attaccu di tri màchini chini di esplusivu guidati di 3 kamikazi.
Nepal - 7 alpinisti francisi e 11 sherpa sunnu dispersi ntô massicciu di l'Himalaya.
Palermu - Na prutesta di li cuntadini di la pruvincia di Trapani bluccau lu tràfficu 'n Palermu stamatina. Li cuntadini trapanisi addumànnanu a la Riggiuni cuntribbuti pi aiutari l'agricultura.
Palermu - Chiddu chi fu lu primu prisidenti di l'Assemblea Regionale Siciliana, Giuseppi Alessi, oi fa cent'anni; ricivìu na littra d'auguri di parti dû prisidenti dâ Repùbblica Taliana.
Nova Deli (Innia) - Tri o quattru bummi ammazzaru a chiossai di 60 pirsuni e nni fireru a 152 a li 17,40 (ura lucali) di òi nta 3 mircati mpurtanti di la cità di Nova Deli.
