Cloro

Su cloro o cloru (de su gregu χλωρός, chloròs, «birde pàllidu») est s'elementu chìmicu de sa tàula periòdica cun nùmeru atòmicu 17 e sìmbulu Cl. Faghet parte de su grupu de sos alògenos, postu in su grupu 17 de sa tàula periòdica. Su gasu cloro est birde grogàsticu, duas bortas e mesu prus cracu de s'ària e tenet unu fragu allupadore estremamente desagradèssidu e est meda velenosu. In cunditziones istandard e in un'ampru discansu de temperaduras e pressiones su gasu cloro est costituidu dae una molècula biatòmica Cl₂ (nùmeru CAS 7782-50-5). Est unu agente ossidante potente, isbianchidore e disinfetante. Suta de forma de anione cloruru Cl− est unu cumponente de su sale comune de coghina (o cloruru de sòdiu) e de medas àteros cumpostos, est meda abundosu in natura e netzessàriu a belle totus sas formas de vida, incluende s'organismu umanu (su sàmbene umanu cuntenet difatis una discreta cantidade de anione cloruru).