Gustave Eiffel

Gustave Eiffel nasquèt a Dijon en 1832 dins una familha amonedada que son paire, Alexandre Eiffel, un oficièr qu'aviá participat a las guèrras napoleonianas tre 1811, trabalhava coma secretari de l'intendéncia militara de Dijon e sa maire, Catherine Moneuse, èra una femna d'afars. Aquela aviá investit dins lo negòci de fusta e de carbon e aviá amassat aital una fortuna personala pro consequenta. En 1843, Gustave Eiffel dintrèt al collègi Sainte-Barbe abans d'èsser admissible a l'Escòla politecnica de París, mas subretot admés en 1852 a l'Escòla Centrala de las Arts e Manufacturas de la capitala francesa. I efectuèt sos estudis d'engenheire e obtenguèt son diplòma en 18559. Gustave Eiffel, demorèt a Clichy dins lo departament de Hauts-de-Seine a partir de 1856. Aprèp d'èsser estat emplegat qualques meses dins la polveriá de Châtillon-sur-Seine e puèi a la Companhiá dels camins de fèrre de l'Oèst, Eiffel rescontrèt, en 1856, Charles Nepveu, un entrepreneire que s'èra especializat dins la construccion metallica que, gràcias al progrès de la metallurgia, coneissiá en aquel temps una bèla difusion. Aqueste material, resistent, leugièr e de bon manipular, èra preferit fòrça sovent a la pèira per tal de far d'estalvis.

Lo jove engenhaire demostrèt pro lèu sos talents, la sia primièra realizacion d'importància foguèt la passarèla Eiffel facha a Bordèu en 1858 en collaboracion amb Paul Régnauld, e n'assumiguèt, a l'edat de 26 ans, la direccion. Gustave Eiffel utilizèt alara la tecnica de fondacion amb aire comprimit durant l'execucion de las pilas tubularas.

En 1862, quand aviá 30 ans, se maridèt amb Marguerite Gaudelet, plan mai jove qu'el qu'aviá pas que 18 ans. Amassa aguèron cinc enfants, tres filhas e dos dròlles entre 1863 e 1873. Sa femna se moriguèt en 1877 quand aviá pas que 32 ans.