Batalha de Navarin
La batalha de Navarin se debanèt lo 20 d'octòbre de 1827 dins lo corrent de la Guèrra d'Independéncia de Grècia. Foguèt la consequéncia d'una demonstracion de fòrça navala d'una flòta coalizada formada de naviris francés, britanics e rus (28 naviris) dins lo pòrt de Navarin, ont èra estacionada una flòta turcoegipciana d'aperaquí 90 naviris, que degenerèt après d'incidents entre una fregata britanica e un brutlòt otoman. En despiech de son inferiotat numerica, lei naviris coalizats èran pus poderós e son artilhariá destruguèt la màger part de la flòta turcoegipciana.
Lo bilanç militar de la batalha èra de 60 naviris destruchs, 6 000 tuats e 4 000 bleçats per la flòta de l'Empèri Otoman còntra 174 tuats e 475 bleçats per lei Coalizats. Pasmens, mai d'un naviri dei venceires aviá subit de degalhs importants. Lei consequéncias politicas de la batalha foguèron fòrça importantas car entraïnèt la neutralizacion de la flòta turca e favorizèt l'intervencion dirècta dei Francés e dei Rus au profiech deis insurgents grècs a partir de 1828. Rapidament vencut, l'Empèri Otoman deguèt acceptar l'independéncia grèga tre 1829.