Order of Canada

Order of Canada eller Ordre du Canada (norsk Canadaordenen) er den høgaste sivile utmerkinga i Canada etter Order of Merit, som den kanadiske monarken delar ut personleg.

Ordenen blei oppretta 1. juli 1967 for å heidra kanadiarar som har bidrege til store endringar for Canada. Ordenen kan også delast ut som anerkjenning av innsatsen til ikkje-kanadiarar som har skapt ei betre verd. Musikarar, politikarar, artistar, TV- og filmstjerner, personar som har gjort ein velgjerande innsats og mange andre har fått medlemskap i ordenen.

Monarken av Canada er ordensherre, og generalguvernøren av Canada er ordenskanslar og fyrste Companion.^[1]

Ordenen er delt inn i tre klassar:^[2]

• Companion (Companions of the Order of Canada, forkorta CC)
• Officer (Officers of the Order of Canada, forkorta OC)
• Member (Members of the Order of Canada, forkorta CM)

Ordensteikna for Order of Canada er utforma som eit stilisert snøkrystall i kvit emalje. Midtmedaljongen har eit canadisk lønneblad mot kvit bakgrunn, det heile er omgitt av ei raud bord der mottoet til ordenen er innskrive: «DESIDERANTES MELIOREM PATRIAM» (‘dei ønskjer eit betre land’). Medaljongen er krona av St. Edvards krone. For lågaste grad er lønnebladet i sølv emalje, for offiserar i gull og for høgaste grad i raud emalje. Mottoet er skrive i sølvbokstavar for lågaste grad og i gull for dei to andre. Ordensteikna er elles i hovudsak like for dei tre gradene, men blir borne på ulik måte i band av ulik utforming. Ordensbandet er kvitt med breie, raude kantstriper. Fargane er henta frå det kanadiske flagget.^[2]

Ordensherren har eit eige embetsteikn besett med diamantar, rubinar, smaragdar og safirar. Ordenskanslaren ber, som embetsteikn, insignia for ein companion.