Bairisk

Bairisk er ei dialektgruppe av det høgtyske språket som blir brukt i lengst søraust i utbreiingsområdet til tysk. Namnet bairisk har same opphav som Bayern, men ikkje same utbreiing som den tyske delstaten. For det første er ikkje alle bayerske dialektar bairiske: Vest i Bayern (Schwaben) bruker ein alemannisk, i nord frankisk. For det andre bur dei fleste bairisk-talarar i Austerrike, og bairisk blir også brukt i mellom anna Nord-Italia.

Bairisk kan vidare delast inn i tre dialektgrupper:

• nordbairisk, som blir brukt i Bayern i området rundt Nürnberg og Regensburg
• mellom- eller donaubairisk, som blir brukt i mesteparten av Bayern og omtrent dei austerrikske delstatane Salzburg, Ober-, Niederösterreich, Wien og Burgenland
• sørbairisk, som blir brukt i ei smal stripe i Bayern sør for Augsburg, dei austerrikske delstatane Tirol, Kärnten og Steiermark, den italienske provinsen Sør-Tirol og Münster- og Samnaundalen i den sveitsiske kantonen Graubünden.

I tillegg til dette samanhengande området høyrer også enkelte tyske språkøyar til det bairiske dialektområdet. Dette er nokre kommunar i Italia, delar av dei gjenverande tyskspråklege minoritetane i Tsjekkia, Slovakia, Ungarn og Ukraina, og hutterer-folket i Nord-Amerika. Den spesielle sørbairiske dialekten som blir brukt i dei italienske språkøyane (utanom Sør-Tirol), blir kalla zimbrisk. Ein finn han i isolerte kommunar i dei italienske regionane Veneto og Friuli-Venezia Giulia, i tillegg til provinsen Trento.