Henri Fantin-Latour

Ignace Henri Jean Théodore Fantin-Latour, nömmt Henri Fantin-Latour (* 14. Januar 1836 in Grenoble; † 25. August 1904 in Buré (Orne)) weer en franzöösch Maler un Lithograph.

Sien Utbilden fung he an bi sien Vader Jean-Théodore Fantin-Latour, dornah bi Horace Lecoq de Boisbaudran. Af 1854 studeer he an de École nationale supérieure des beaux-arts de Paris. 1859 is he Gustave Courbet begegnet, in de sien Atelier he twee Johr later arbeit. 1863 hörr he to de Maler, de to glieker Tiet up den Salon des Refusés un de Pariser Salon vertreden weern.

Ofschons dat de Tiet vun de Impressionisten weer, entwickel he sien eegen, den Realismus verplichteten Stil. Bekannt wurrn sien Blömenbiller un Gruppenportraits vun völ dunnmaalse Pariser Malers un Schrievers ut sien Früendskreis. Dorto tellen Hommage à Delacroix, Un atelier aux Batignolles un Le Coin de table. Édouard Manet hett het ok mehrfack portraiteert. Bedüütsam weer ok sien Infloot up de latere Kunstströömung vun den Symbolismus. Ferner is Fantin-Latour för sien Lithographien bekannt, in de he sück mit tallriek bekannt klassisch Komponisten un de hör Musik utnannersetten dee.

1876 hett he de Malerin Victoria Dubourg heiraadt. De Sömmer verbroch he van dor af up den Landsitt vun de Familie vun sien Fru in Buré in dat Departement Orne in de Basse-Normandie, wo he ok storven is. Fantin-Latour is up den Karkhoff vun Montparnasse in Paris begraben.