മുൻഷി പരമുപിള്ള

അടൂർ പെരിങ്ങനാട് അമ്മകണ്ട കരയിൽ കോപ്പാരേത്തു വീട്ടിൽ കൊച്ചുകുഞ്ഞു പിള്ളയുടെയും ഉമ്മിണിയമ്മയുടെയും മകനായി ജനിച്ചു. ഇ വി കൃഷ്ണപിള്ള അദ്ദേഹത്തിന്റെ അയൽവാസിയും ആത്മ മിത്രവുമായിരുന്നു. ഏഴാം ക്ലാസ് ജയിച്ചു മുൻഷിയായി. കെ.സി. കേശവ പിള്ളയുടെ 'സദാരാമ' നാടകത്തിൽ അഭിനയിച്ചു. ഇടക്കാലത്ത് അധ്യാപക വൃത്തി ഉപേക്ഷിച്ചെങ്കിലും, വീണ്ടും ജോലിക്ക് കയറി. സുപ്രഭ, ആറടിമണ്ണ്, തിരിച്ചടി, കള്ളൻ ഞാനാ എന്നിങ്ങനെ അദ്ദേഹത്തിന്റെ ഒട്ടനവധി നാടകങ്ങൾ പ്രശസ്ത നാടകക്കമ്പനികൾ നിരവധി വേദികളിൽ അവതരിപ്പിക്കുകയും, നാടക കൃത്ത് , ഹാസ്യകാരൻ എന്നീ നിലകളിൽ അദ്ദേഹം പ്രശസ്തനാവുകയും ചെയ്തു. പ്രസന്ന എന്ന ആദ്യകാല മലയാള സിനിമയുടെ കഥാകൃത്ത് മുൻഷിയായിരുന്നു. ചിത്രം പക്ഷിരാജ സ്റ്റുഡിയോസ് മലയാളത്തിലും തമിഴിലും നിർമ്മിച്ചപ്പോൾ മുൻഷി ആയിരുന്നു മലയാളം തിരക്കഥ എഴുതിയത്. വനമാല, സന്ദേഹി, കാഞ്ചന, കാലം മാറുന്നു, തസ്കര വീരൻ എന്നീ സിനിമകൾക്കും കഥ, തിരക്കഥ, സംഭാഷണം, എന്നിവ എഴുതി. മുൻഷിയുടെ ജനപ്രിയ നാടകം 'സുപ്രഭ'യുടെ ചലച്ചിത്രാവിഷ്കാരമായിരുന്നു 'മണമകൾ' എന്ന തമിഴിലെ സൂപ്പർ ഹിറ്റ്‌ സിനിമ. ഇതിന്റെ കഥ എഴുതിയത് മുൻഷി പരമു പിള്ളയും^[1] സംഭാഷണം മു. കരുണാനിധിയുമായിരുന്നു. ^[2]

സി.വി. കുഞ്ഞുരാമന്റെ നവജീവനിൽ ആണ് മുൻഷി എഴുതിത്തുടങ്ങിയത്. പ്രസന്നകേരളം, നവസരസൻ , ജ്വാല എന്നീ മാസികകളുടെ പത്രാധിപരായിരുന്നു മുൻഷി. സരസൻ മാസികയിലൂടെ മുൻഷി നടത്തിയ സാമൂഹ്യ വിമർശനം അന്നത്തെ ഭരണാധികാരികളെ അലോസരപ്പെടുത്തി. ഉത്തരവാദ ഭരണ കാലത്ത് സർ സി.പിയെ വിമർശിച്ചു കൊണ്ട് അദ്ദേഹം എഴുതിയതിനു മാസിക പലതവണ നിരോധിക്കപ്പെട്ടു. ഓരോ തവണയും അദ്ദേഹം പുതിയ പേരുകളിൽ മാസിക ഇറക്കി. ^[3]

അദ്ദേഹം മൂന്നു വിവാഹങ്ങൾ കഴിച്ചു. ആദ്യ ഭാര്യയെ ഉപേക്ഷിച്ചു. രണ്ടാമത്തെ ഭാര്യ രത്നമയീദേവി. മൂന്നു മക്കൾ ആയിരുന്നു അവർക്ക്. ശാരദാ മണി ദേവി, ജ്യോതീന്ദ്ര നാഥ ദീക്ഷിത്. നരേന്ദ്ര നാഥ ദീക്ഷിത്. എന്നിവർ. പിന്നീട് രത്നമയീദേവിയുമായി മുൻഷി അകന്നു.അവസാന കാലത്ത് അദ്ദേഹം മുറപ്പെണ്ണായ ലക്ഷ്മിക്കുട്ടി അമ്മയോടൊപ്പമായിരുന്നു താമസം.

ഇദ്ദേഹത്തിന്റെ സ്മരണക്കായി അടൂരിൽ മുൻഷി പരമു പിള്ള സ്മൃതി കേന്ദ്രം പ്രവർത്തിക്കുന്നു.

1. ↑ "Manamagal 1951". The Hindu. Aug 15, 2008. Archived from the original on 2014-03-13. Retrieved 19 മാർച്ച് 2014. {{cite news}}: |first= missing |last= (help)
2. ↑ “മുൻഷി പരമു പിള്ള വ്യക്തിയും ജീവിതവും“. ലെൻസ് ബുക്സ്. pp. 42–43. ISBN 9788192256511. {{cite book}}: |first= missing |last= (help)
3. ↑ "മുൻഷി പരമുപിള്ള". malayalachalachithram.com. Retrieved 20 മാർച്ച് 2014. {{cite web}}: |first= missing |last= (help)

• “മുൻഷി പരമു പിള്ള വ്യക്തിയും ജീവിതവും“ - സലിം കുമാർ, ലെൻസ് ബുക്സ്, അടൂർ