കീഴ്ത്തലം പൊങ്ങൽ

സമുദ്രത്തിൽ സാധാരണഗതിയിൽ തിരശ്ചീന ദിശയിലാണു് ജലം സഞ്ചരിക്കുന്നതു്. കടലിന്റെ പരപ്പിനെ അപേക്ഷിച്ചു് ആഴം വളരെ കുറവായതിനാലും സമുദ്രത്തിലെ വ്യത്യസ്ത ആഴങ്ങളിൽ ജലത്തിനു് വ്യത്യസ്ത സവിഷേതകളായതിനാലും, ലംബദിശയിലെ ജലസഞ്ചാരം കുറവാണു്. എന്നാൽ ചില പ്രത്യേക സാഹചര്യങ്ങളിൽ കാറ്റുകൊണ്ടു് മുകൾപരപ്പിലെ ജലം വിസ്ഥാപനം ചെയ്യുമ്പോൾ, താഴെതട്ടിലുള്ള തണുപ്പുള്ളതും പോഷകസമൃദ്ധവുമായ ജലം മുകളിലേക്കു് വരുന്നു^[1]. ഈ പ്രതിഭാസമാണു് കീഴ്ത്തലം പൊങ്ങൽ എന്നറിയപ്പെടുന്നതു്. ഇതു് മത്സ്യവളർച്ചയ്ക്കും, പ്രജനനത്തിനും അനുകൂലസാഹചര്യമൊരുക്കുന്നു. ലോകത്തിലെ മൊത്തം മത്സ്യസമ്പത്തിന്റെ 40 ശതമാനവും ലഭിക്കുന്നതു് സമുദ്രത്തിന്റെ 3 ശതമാനം മാത്രം വരുന്ന നാലു് പ്രധാന കീഴ്ത്തലം പൊങ്ങുന്ന മേഖലയിൽ നിന്നുമാണു്.

പ്രധാനമായും അഞ്ചുതരത്തിലുള്ള കീഴ്ത്തലം പൊങ്ങലാണു് കാണപ്പെടുന്നതു്. തീരദേശ കീഴ്ത്തലം പൊങ്ങൽ, അകസമുദ്രത്തിൽ കാറ്റുമൂലമുണ്ടാകുന്ന വിപുലതോതിലുള്ള കീഴ്ത്തലം പൊങ്ങൽ, ചുഴികളാൽ സൃഷ്ടിക്കപ്പെടുന്ന കീഴ്ത്തലം പൊങ്ങൽ, കടലടിത്തട്ടിന്റെ ആകൃതിയുമായി ബന്ധപ്പെട്ടുണ്ടാകുന്ന കീഴ്ത്തലം പൊങ്ങൽ, അകസമുദ്രത്തിലെ വിസ്തൃതവും നേർത്തുപോകുന്നതുമായ കീഴ്ത്തലം പൊങ്ങൽ.

ഭൂമിയുടെ കറക്കം മൂലം ഭൂമദ്ധ്യരേഖാ പ്രദേശത്തു് ഉടലെടുക്കുന്ന കൂടിയ തരംഗദൈർഘ്യമുള്ള സമുദ്രതരംഗങ്ങളും, പടിഞ്ഞാറൻ തീര സമുദ്രജലപ്രവാഹവും, കടലിലെ അടിത്തട്ടിലെ രൂപവ്യതിയാനങ്ങളും തെക്കു് കിഴക്കൻ അറബിക്കടലിലെ കീഴ്ത്തലം പൊങ്ങലിനെ കാര്യമായി സ്വാധീനിക്കുന്നുണ്ടു്. ഇന്ത്യയിലെ തെക്കു്-പടിഞ്ഞാറെ തീരത്തുള്ള അറബിക്കടലിന്റെ തെക്കു-കിഴക്കേവശം തീരദേശ കീഴ്ത്തലം പൊങ്ങൽ നടക്കുന്ന മേഖലയാണു്.