Koto Padang

Alun ado data nan pasti sia nan maagiah namo kota ko jo kato "Padang". Dipakirokan kota ko pado bamulo dari sabuah lapangan, dataran atau gurun^[4] nan laweh mako dinamokan Padang. Dalam bahaso Minang, kato padang dapek juo bamukasuik samacam sinjato padang nan panjang.^[5]

Manuruik tambo, saedaran kota ko dulunyo marupoan bagian dari wilayah rantau nan ditaruko dek parantau-parantau Minangkabau dari dataran tinggi atau darek, utamonyo nan dari Solok-Salayo. Tampek bamukim partamonyo adolah di kampuang-kampuang nan talatak di tapi selatan Batang Arau (di tampek nan kini banamo Subarang Padang).^[6] Kampuang-kampuang baru kudian ditaruko ka arah utara pamukiman awa tasabuik, nan kasadonyo tamasuak Kanagarian Padang dalam adaik Nan Salapan Suku, iyolah :^[7]

• Lareh Bodi Caniago:

1. Suku Sumagek (Caniago Sumagek),
2. Suku Mandaliko (Caniago Mandaliko),
3. Suku Panyalai (Caniago Panyalai), jo
4. Suku Jambak

• Lareh Koto Piliang:

1. Suku Sikumbang (Tanjuang Sikumbang),
2. Suku Balai Mansiang (Tanjuang Balai-Mansiang),
3. Suku Koto (Tanjuang Piliang), jo
4. Suku Malayu

Adopulo kaum pandatang dari rantau pasisia lainnyo, iyolah dari Painan, Pasaman, jo Tarusan.^[7]

Takah kawasan rantau Minangkabau lainnyo, pado mulonyo kawasan pasisia barat Sumatera ado di bawah pangaruah Karajaan Pagaruyuang.^[8] Samantaro itu, pado mulo abaik ka-17 kawasan ko alah dikuasoi dek Kasultanan Aceh.^[9][10] Tibonyo banso asiang di Kota Padang bamulo dek kunjungan palauik Inggirih pado taun 1649.^[11] Kota ko kudian mulai bakambang samanjak tibonyo Vereenigde Oost Indische Compagnie (VOC) pado taun 1663 nan diiriangi jo galombang rantau panduduak Minangkabau dari kawasan darek^[12].

Salain muaronyo nan rancak, VOC cinan mambangun palabuahan kapa jo pamukiman baru di pasisia barat Sumatra untuak mamudahan jalan dagang ka kawasan padalaman Minangkabau. Salanjuiknyo pado taun 1668, VOC bajayo mausia pangaruah Kasultanan Aceh jo mananaman pangaruahnyo di sapanjang pantai barat Sumatera, bak cando nan tatulih pado surek Regent Jacob Pits ka bakeh Rajo Pagaruyuang nan barisikan pinta untuak dilakuannyo ubuangan dagang baliak jo mandistribusian ameh ka kota ko.^[13] VOC bajayo mangambangkan Kota Padang dari kampuang-kampuang nalayan manjadi kota metropolitan pado abaik ka-17.^[14] Padang manjadi kota labuahan kapa nan rami untuak manggaleh ameh, teh, kopi, jo rampah-rampah. Dalam pakambangannyo, pado 7 Agustus 1669 malatuihlah pagolakan rakyaik Pauh jo Koto Tangah malawan monopoli VOC. Walau dapek diradam dek VOC, kajadian ko kudian kajadian ko dikana manjadi taun lahia Kota Padang.^[15]

Tarago tu banso Eropa siliah baganti maambiak aliah kuaso di Kota Padang. Pado taun 1781, dek rangkaian Parang Inggirih-Balando Kaampek, Inggirih bajayo manguasoi kota ko.^[16][17] Namun, sasudah ditandotanganinyo Pajanjian Paris pado taun 1784 kota ko dibaliakan ka VOC.^[18] Pado taun 1793 kota ko taleso dijarah jo dikuasoi dek parompak Parancih nan bamarkas di Mauritius banamo François Thomas Le Même, nan upayonyo diapresiasi dek pamarintah Parancih wakatu itu jo maagiah panghargaan.^[19] Kudian pado taun 1795, Kota Padang diambiak aliah baliak dek Inggirih.^[16] Namun, salapeh paparangan era Napoleon, pado taun 1819 Balando mangklaim baliak kawasan ko nan kudian dikukuahan malalui Traktat London, nan ditandotangani pado 17 Maret 1824.^[16][20]

Pado taun 1837, pamarintah Hindia Balando manjadian Padang sabagai pusek pamarintahan wilayah Pasisia Barat Sumatra (Sumatra's Westkust) nan wilayahnyo tadiri dari Sumatra Barat jo Tapanuli kini.^[21] Kudian kota ko manjadi daerah gemeente sajak 1 April 1906 sasudah kaluanyo ordonansi (STAL 1906 No. 151) pado 1 Maret 1906. Inggo Parang Dunia II, Padang marupokan salah satu dari limo kota palabuahan paliang gadang di Indonesia, salain Jakarta, Surabaya, Medan, jo Makassar.^[22] Manjalang masuaknyo tantara Japang pado 17 Maret 1942, Kota Padang ditinggaan Balando dek kapanikannyo. Pado wakatu nan basamoan Soekarno taleso tatahan di kota ko dek pihak Balando sangkek tu nio mambaoknyo turuik sato malarian diri ka Australia.^[23] Kudian palimo Angkatan Darek Japang untuak Sumatra basobok jo baliau untuak marundiangan nasib Indonesia salanjuiknyo.^[24] Salapeh Japang dapek mangandalian situasi, kota ko kudian dijadian sabagai kota administratif untuak urusan pambangunan jo karajo umum.^[25]

Kaba Indonesia mardeka pado 17 Agustus 1945 baru sampai ka Kota Padang akhia bulan Agustus. Namun, pado 10 Oktober 1945 Tantara Sakutu alah masuak ka Kota Padang malalui Palabuahan Taluak Bayua, dan kudian kota ko diduduaki salamo 15 bulan.^[26] Pado tanggal 9 Maret 1950, Kota Padang dibaliakan ka Republik Indonesia nan sabalunnyo manjadi nagara bagian Republik Indonesia Serikat (RIS) malalui surek kaputusan Presiden RIS nomor 111. Kudian, manuruik Undang-Undang Nomor 225 taun 1948, Gubernur Sumatra Tangah sangkek tu malalui surek kaputusan nomor 65/GP-50, pado 15 Agustus 1950 manatapan Kota Padang sabagai daerah otonom. Wilayah kota dipalaweh, samantaro status kawedanan Padang diapuih jo urusannyo bapindah ka Wali Kota Padang.^[25] Pado 29 Mai 1958, Gubernur Sumatera Barat malalui Surat Keputusan Nomor 1/g/PD/1958, sacaro de facto manatapan Padang manjadi ibu kota provinsi Sumatera Barat, dan sacaro de jure taun 1975, nan ditandoi jo kaluanyo Undang-Undang Nomor 5 taun 1974. Pamarintah pusek kudian mangaluakan Peraturan Pamarentah Nomor 17 taun 1980, nan manatapan parubahan bateh-bateh wilayah Kota Padang sabagai pamarintah daerah.^[27] Manuruik Rencana Jangka Panjang Manangah Nasional 2015-2019, pamarintah pusek manatapan Kota Padang, basamo Kabupaten Padang Pariaman jo Kota Pariaman untuak pangambangan wilayah metropolitan Palapa (Padang—Lubuak Aluang—Pariaman).^[28]

Padang mandapek piala Adipura untuak partamo kalinyo pado taun 1986 dari Presiden Soeharto dek prestasinyo manjadi salah satu kota paliang barasiah di Indonesia. Salanjuiknyo di taun 1991 koto iko juo nan mandapekan piala Adipura Kencana^[15].

Pado tanggal 30 September 2009, kota iko mandapek musibah gampo bakakuatan 7.6 Skala Richter, nan manyababkan kahancuran 25% infrastruktur nan ado di kota iko^[29].

Kota Padang talatak di pantai barat pulau Sumatra, laweh kasaluruhan 1.414,96 km² atau sataro jo 3,36% dari laweh provinsi Sumatra Barat.^[30] Labiah dari 60% dari laweh Kota Padang barupo pabukitan nan ditutuik dek hutan linduang. Hanyo sakitar 205,007 km² wilayah nan marupoan daerah efektif pakotaan.^[31] Daerah pabukitan mambantang di bagian timur dan selatan kota. Bukik-bukik nan tanamo di Kota Padang di antaronyo adolah Bukik Lampu, Gunuang Padang, Bukik Gado-Gado, jo Bukik Pagambiran. Kota Padang punyo garih pantai sapanjang 68,126 km di daratan Sumatra. Salain itu, ado pulo 19 buah pulau ketek, di antaronyo iyolah Pulau Sikuai lawehnyo 4,4 ha di Kecamatan Bungus Taluak Kabuang, Pulau Toran salaweh 25 ha jo Pulau Pisang Gadang di Kecamatan Padang Selatan.^[32][33]

Pado taun 1833, Residen James du Puy malaporan tajadi gampo bumi nan dipakiroan bakakuatan 8.6–8.9 skala Richter di Padang nan manjadi sabab tajadinyo tsunami.^[34] Sabalunnyo pado taun 1797, dipakiroan dek para ahli panah tajadi gampo bumi bakakuatan 8.5–8.7 skala Richter, nan manimbulan tsunami pulo di pasisia Kota Padang jo mambuek karusakan pado kawasan Pantai Aia Manih.^[34] Pado 30 September 2009, kota ko dihoyak gampo bumi baliak bakakuatan 7,6 skala Richter,^[35] jo titiak pusek gampo di lauik pado 0.84° LS dan 99.65° BT nan kadalamannyo 71 km, nan manyababan hancuanyo 25% infrastruktur di kota ko.^[36]

Katinggian di wilayah daratan Kota Padang amaik bavariasi, iyolah antaro 0 m sampai 1.853 m di ateh pamukaan lauik jo daerah tatinggi adolah Kecamatan Lubuak Kilangan. Suhu udaronyo cukuik tinggi, iyolah antaro 23 °C–32 °C pado siang hari dan 22 °C–28 °C pado malam hari, jo kalambabannyo di antaro 78%–81%.^[37] Kota Padang mamiliki banyak batang aia, iyolah 5 batang aia gadang jo 16 batang aia ketek, jo nan tapanjangnyo iyolah Batang Kandih sapanjang 20 km. Tingkek curah hujan Kota Padang mancapai rato-rato 405,58 mm per bulan jo rato-rato ari ujan 17 ari per bulan. Tingginyo curah ujan mambuek kota ko cukuik rawan jo banjir. Pado taun 1980 2/3 kawasan kota ko panah tarandam banjir karano saluran drainase kota nan bamuaro utamo ka Batang Arau indak talok manampuang baliak limpahan aia tasabuik.^[38]

sacaro administatif, Kota Padang tadiri dari 11 kecamatan nan tabagi dek 104 kelurahan. Kecamatan Koto Tangah marupakan kecamatan jo laweh wilayah paliang gadang, sadang Kecamatan Padang Barat mampunyoi wilayah paliang ketek.

Kota Padang mampunyoi 104 kelurahan nan taseba di 11 kecamatan. Daftar kelurahan di Kota Padang, adalah sebagai berikut:^[41][42]

Berikuik adolah daftar Wali Kota Padang nan pernah manjabat sajak berado di bawah pamarintahan Hindia Belando pado taun 1928 hinggo kini:

Katarangan

Barikuik adolah daftar Wakil Walikota Padang nan parnah manjabat sajak taun 2004 hinggo kini:

Barikuik iko adolah komposisi anggota DPRD Kota Padang dalam ampek pariode tarakhir.^[68][69]

Liek pulo komposisi anggota DPRD Kota Padang 1992–1997^[70] 1999-2004.^[71]

Barikuik iko adolah daftar ketua DPRD Kota Padang sajak taun 1967 sampai kini:

Kota Padang mamiliki karakteristik ruang pakotaan nan maadok Samudera Hindia jo bakuliliang Pagunuangan Bukik Barisan. Pakambangan kawasan urban di Padang bageaak ka arah utara jo timur dari kawasan kota tuo di muaro Batang Arau.^[76] Panataan wilayah kota kini ko maacu pado Paraturan Daerah (Perda) tantang Rencana Tata Ruang Wilayah (RTRW) Kota Padang taun 2010–2030. Sajalan jo pambangunan kota nan babasis mitigasi bancano, wilayah timur Padang dikambangan sabagai kawasan pamukiman dan pusek pandidikan, sadangkan wilayah barat nan badakekan jo pantai marupoan kawasan komersial pakotaan sarato pusek bisnis.^[77][78] Pamindahan pusek pamarintahan Kota Padang ka wilayah timur (Aia Pacah, Koto Tangah) pado taun 2010 adolah salah satu upayo mangurangi konsentrasi panduduak di kawasan tapi lauik.

Dari sisi arsitektur, bangunan nan ado di Kota Padang kini sadang dalam transformasi mabaliakan tradisi dalam bantuak ekspresi arsitektur modern nan mampatahankan sisi tradisional.^[79] Kota ko sacaro umum mampu maimbangi pakambangan bantuak arsitektur lua nan taruih muncua di satiok kota di Indonesia jo seni arsitektur tradisionalnyo.^[80] Hal ko juo tampak salain pado bangunan tasuo pulo bamacam gapura pado babarapo rueh jalan jo ciri khas atok gonjong.^[81] Gonjong ko marupokan salah satu bagian simbol etnik, marepresentasikan makna filosofi Minangkabau nan tarabstrasikan ka dalam bantuak bangunan.^[82] Walaupun kini alah tajadi pageseran nilai budayo maancam eksistensi nilai-nilai nan masih asali, masyarakaik Minang pun maraso baso citra arsitektur vernakularnyo cukuik tawakili dek atok gonjong sajo.^[83]

Sabalunnyo dari ilia Batang Arau manuju Muaro Pantai Padang ado babarapa bangunan tuo jo ciri arsitektur Eropa nan disasuaikan jo gaya model untuak daerah tropis antaranyo NHM (Nederlansche Handels-Maatschappij), Padangsche Spaarbank, De Javansche Bank, dan NV Internatio nan didirian sabalum 1920 nan manjadi saksi bisu jajak kolonial nan tatingga.^[84]

Sajak taun 1995, Pamarintah Kota Padang alah mulai mangambangkan hutan kota tamasuak Ruang Terbuka Hijau (RTH) nan bafungsi maningkekan kualitas lingkungan iduik pakotaan nan nyaman jo elok, juo sabagai salah satu sarana rekreasi sakali utamonyo untuak warga kotanyo.^[85] RTH nan ado di kota ko iyolah RTH Taman Melati jo RTH Imam Bonjol nan juo bafungsi sabagai alun-alun kota. Di kawasan Pantai Padang, adopulo Taman Muaro Lasak nan dilangkoki jo Monumen Merpati Perdamaian. Monumen tasabuik dirasmikan dek Presiden Joko Widodo dalam rangka Multilateral Naval Exercise Komodo 2016.^[86]

Pado sailiran Batang Kuranji ado Utan Kota Delta Malvinas nan marupokan habitat untuak bangau dan buayo kaciak putiah.^[87][88] Samantaro pado Kecamatan Lubuk Kilangan, ado Taman Utan Raya Bung Hatta, nan marupokan kawasan konservasi palestarian plasma nutfah flora utan salaweh 240 ha.^[89] Taman Utan Raya ko babatehan jo Kabupaten Solok, dan alah dimanfaatkan sabagai tampek wisata alam, sarana pandidikan jo panalitian sarato juo bafungsi hidroorologi jo panangka polusi khususnyo untuak Kota Padang.^[90]

Kota Padang mandapek piala Adipura untuak partamo kalinyo pado taun 1986 dari Presiden Soeharto dek prestasinyo manjadi salah satu kota paliang barasiah di Indonesia. Salanjuiknyo pado taun 1991 kota ko juo mandapek Adipura Kencana.^[15] Inggo taun 2009 Kota Padang alah mandapek 17 kali piala Adipura salama 4 periode panilaian.^[91] Salapan taun sasudah Gampo Bumi 2009 nan maancuakan sarana jo prasarana kota, Padang baliak maraiah piala Adipura untuak ka-18 kalinyo pado taun 2017.^[92]

Kota Padang marupokan kota jo jumlah panduduak paliang banyak di Provinsi Sumatra Barat. Manuruik sensus panduduak nan dilakukan Badan pusek Statistik (BPS) taun 2010, jumlah panduduak Kota Padang adolah sabanyak 833.584 urang. Jumlah tu manunjuakan panurunan nan signifikan dari data panduduak taun 2008 (856.815 urang) dek gampo bumi 2009.^[30] Pado akhia taun 2014, Dinas Kependudukan dan Pencatatan Sipil (Disdukcapil) Kota Padang malaporan jumlah panduduak sabanyak 1.000.096 urang jo rincian 273.915 Kapalo Kaluarga nan tadiri dari 507.785 urang laki-laki jo 492.306 padusi.^[93] Pado taun 2009 kota ko basamo jo Makassar, Denpasar, dan Yogyakarta, ditatapan dek Kemendagri sabagai ampek kota proyek pacontohan panerapan Kartu Tando Panduduak (KTP) babasis Nomor Induak Kapandudukan (NIK) di Indonesia.^[94][95][96]

Panduduak Padang rami nan dari etnis Minangkabau.^[98] Etnis lain nan juo bamukim di siko adolah Jao, Tionghoa, Nieh, Mentawai, Batak, Aceh, dan Tamil. Urang Minang di Kota Padang marupoan parantau dari daerah lainnyo dalam Provinsi Sumatra Barat. Pado taun 1970, jumlah pandatang sabanyak 43% dari saluruah panduduak, jo 64% barasa dari daerah-daerah lainnyo dalam provinsi Sumatra Barat. Pado taun 1990, dari jumlah panduduak Kota Padang, 91% barasa dari etnis Minangkabau.^[12]

Urang Nieh sempat manjadi kalompok minoritas paliang gadang pado abaik ka-19. VOC mambaoknyo sabagai budak sajak mulo abaik ka-17. Sistem pabudakan diakhiri pado taun 1854 dek Pangadilan Nagari Padang. Pado mulonyo urang Nieh tingga di Kampuang Nieh, namun kudian banyak tingga di Gunuang Padang. Cukuik banyak juo urang Nias nan manikah jo urang Minangkabau. Salain itu, ado pulo nan manikah jo urang Eropa jo Tionghoa. Banyaknyo panikahan campuran ko manurunkan persentase urang Nieh di Padang.^[99]

Balando kudian mambaok juo urang Jaok sabagai pagawai jo tantara, sarato ado juo nan manjadi tukang di parak-parak. Salanjuiknyo, pado abaik ka-20 urang Jao banyak nan datang sabagai transmigran. Salain itu, urang Madura, Ambon dan Bugih juo panah manjadi panduduak Padang, sabagai tantara Balando pado maso parang Pidari. Panduduak Tionghoa datang indak lamo sasudah pandirian pos VOC. Urang Tionghoa di Padang nan biaso disabuik jo Cino Padang, sabagian gadang alah mambaur dan biasonyo babahaso Minang.^[99] Pado taun 1930 paliang indak 51% marupokan parantau generasi katigo, jo 80% adolah Hokkian, 2% Hakka, sarato 15% Kwongfu.

Urang Tamil atau katurunan India kamungkinan datang basamo tantara Inggris. Daerah hunian urang Tamil di Kampuang Kaliang marupokan pusek niago. Sabagian gadang darinyo nan bamukim di Kota Padang alah malupokan budayonyo.^[100] Urang-urang Eropa dan Indo nan panah mauni Kota Padang mailang salamo taun-taun di antaro kamardekaan (1945) jo nasionalisasi parusahoan Balando (1958).^[99]

Mayoritas panduduak Kota Padang mamaluak agamo Islam. Banyak pamaluaknyo nan urang Minangkabau. Agamo lain nan dianuik di kota ko adolah Kristen, Buddha, dan Khonghucu, nan kabanyakan dianuik dek panduduak bukan dari etnis Minangkabau. Baragam tampek ibadaik juo ditamui di kota ko. Salain didominasi dek musajik, gareja jo klenteng ado juo di Kota Padang.

Musajik Rayo Gantiang marupakan musajik tatuo di kota ko, nan dibangun kiro-kiro taun 1700. Sabalunnyo musajik ko ado di kaki Gunuang Padang sabalun bapindahan ka lokasi kini. Babarapo tokoh nasional panah salat di musajik ko di antaranyo Soekarno, Hatta, Hamengkubuwana IX dan A.H. Nasution.^[101] Bahkan Soekarno sempat agiah pidato di musajik iko .^[102] Musajik ko juo panah manjadi tampek embarkasi haji malalui palabuahan Emmahaven (kini Taluak Bayua) wakatu itu, sabalun dipindahan ka Asrama Haji Tabiang kini.^[103]

Gareja Katholik jo arsitektur Balando alah batagak sajak taun 1933^[104] di kota ko, walaupun French Jesuits alah mulai malayani umaiknyo sajak dari taun 1834, sairiang batambahnyo populasi urang Eropa wakatu itu.^[5]

Dalam rangka mandorong gairah panghayatan kahidupan baragamo utamonyo untuak pamaluak agamo Islam pado taun 1983 untuak partamo kalinyo di kota ko diadoan Musabaqah Tilawatil Qur'an (MTQ) tingkek nasional nan ka-13.^[5]

Kota Padang sajak dari zaman kolonial Balando alah manjadi pusek pandidikan di Sumatra Barat. Tacataik pado taun 1864, jumlah pelajar nan tadaftar di sikolah nan ado di kota ko sabanyak 237 urang.^[105]

Untuak maagiahan palayanan jo kamudahan ka siswa sarato urang tuo murid, pamarintah kota bakarajo samo jo UNP sarato Telkom sajak 1 Juli 2010 nan manyalanggaroan baliak Panarimoan Siswa Baru (PSB) Online untuak sikolah nagari janjang SMP jo SMA, sarato parbaikan pola jo sistem jiko dibandingan jo taun sabalumnyo.^[106][107] Sistem nan alah diterapan sajak taun 2006 ko,^[106] akan mamotivasi sakaligus mamudahan saluruah siswa nan nio malanjuikan pandidikannyo di masiang-masiang tingkek pandidikan. Siswa dapek mamiliah sikolah favoritnyo manuruik rangking nilai nan didapeknyo sarato dapek dikatahui sacaro langsuang jo transparan.^[108]

Kota Padang punyo puluhan perguruan tinggi, sapuluah di antaronyo babantuak universitas. Universitas Andalas (Unand) nan balokasi di Limau Manih diresmian dek Wakil Presiden patamo Mohammad Hatta pado taun 1955 sabagai universitas tatuo di lua Jawa. Pado taun 2014, Unand manjadi universitas patamo di Sumatra nan mandapekan paringek A untuak akreditasi paguruan tinggi dari Badan Akreditasi Nasional Perguruan Tinggi (BAN-PT).^[109] Paguruan tinggi nagari lainnyo nan ado di Kota Padang yakni Universitas Negeri Padang (UNP) di Aia Tawa, Universitas Islam Negeri Imam Bonjol (UIN-IB) di Lubuak Lintah, Politeknik Negeri Padang di Limau Manih, Politeknik Kesehatan Padang di Siteba, jo Politeknik ATI Padang di Tabiang. Sajumlah paguruan tinggi swasta ado pulo di kota ko, sarupo Universitas Bung Hatta, Universitas Baiturrahmah, Universitas Ekasakti, Universitas Tamansiswa, Universitas Putra Indonesia, Universitas Muhammadiyah Sumatra Barat, Institut Teknologi Padang, jo Universitas Dharma Andalas.

Perpustakaan Daerah Sumatra Barat talatak di Kota Padang tamasuak salah satu perpustakaan nan paliang rancak di Indonesia, jumlah koleksinyo mancapai 30.000 judul, tamasuak fasilitas jo pangalolaan nan maksimum, sarato jumlah pangunjuang pustaka nan tinggi.^[110] Sasudah gampo bumi, kagiatan Perpustakaan Daerah Sumatra Barat sajak 1 Februari 2010 untuak samantaro dipindahan ka Tabiang, manunggu pambangunan gedung baru nan sabalumnyo rusak parah, kini ko alah baliak ka lokasi samulo nan ado di Jln.Diponegoro, No.4^[111]

Sabagai salah satu pusek kesehatan di Pulau Sumatra, Kota Padang alah punyo fasilitas kesehatan nan cukuik langkok. Salain punyo sajumlah rumah sakik nan bataraf nasional jo internasional, rumah sakik tu alah pulo didukuang dek sajumlah paguruan tinggi nan bakaikan jo kesehatan. Rumah Sakik Umum Dr. M. Djamil nan didirian dek pamarintah pusek pado taun 1953 marupoan rumah sakik rujuakan untuak wilayah Sumatra bagian tangah.^[116] Rumah sakik ko alah baafiliasi jo Fakultas Kadokteran Universitas Andaleh sarato Politeknik kesehatan Padang. Sasudah gampo 30 September 2009, kondisi bangunan jo paralatan rumah sakik ko mamprihatinan.^[117] Rumah Sakik M. Djamil kini ko sadang barusaho mamelokan program Hospital Disaster untuak mangantisipasi kajadian sarupo nantinyo.^[118]

Pamarintahan Kota Padang alah punyo pulo rumah sakik nan banamo Rumah Sakit Umum Daerah Dr. Rasidin.^[119] Untuak maagiahan palayanan nan maksimal, pamarintahan Kota Padang alah mandirian sabanyak 20 buah puskesmas jo 58 buah puskesmas pambantu pado wilayah kecamatan di kota ko. Untuak taun 2007, ciek puskesmas di Kota Padang rato-rato malayani 41.000 urang. Angko ko labiah tinggi dari konsep ideal wilayah puskesmas nan hanyo untuak malayani 30.000 urang sajo, sahinggo jiko ditinjau dari panyebaran, sarana kesehatan alah mamadai. Namun jiko ditinjau dari aspek mutu palayanan kesehatan masih jauh dari nan diharokan.^[115]

Salain itu, di kota ko tadapek pulo sajumlah rumah sakik nan dikalola dek BUMN, Kepolisian, TNI AD jo pihak swasta. Pado taun 2013, PT Semen Padang maresmian Semen Padang Hospital nan marupoan rumah sakik bataraf internasional patamo di Sumatra Barat.^[120] Rumah Sakik Tentara Dr. Reksodiwiryo nan dikalola dek TNI AD talatak pado kawasan cagar budayo Gantiang. Rumah sakik ko tagak di komplek bangunan paninggalan zaman Balando nan sabalumnyo marupoan tampek paristirahatan para tentara kolonial. Rumah Sakik Selasih marupoan rumah sakik swasta nan dikalola sacaro basamo jo pihak Kumpulan Perubatan Johor (KPJ) Sdn Bhd dari Malaysia,^[121] namun akibaik gampo bumi 30 September 2009 rumah sakik ko mangalami karusakan barek.^[122]

Barikuik iko adolah daftar rumah sakik di Kota Padang, Sumatra Barat nan alah tadaftar di Kementerian Kesehatan Republik Indonesia:^[123]

Kota Padang nan tanamo jo lagenda Sitti Nurbaya jo Malin Kundang kini sadang babenah ka arah pambangunan pariwisata.^[124] Kota ko punyo sabuah museum nan talatak di pusek kota nan banamo Museum Adityawarman, nan mampunyoi gaya arsitektur babantuak rumah adat Minangkabau (Rumah Gadang), mode Gajah Maharam. Di laman muko museum ado duo lumbuang padi nan disabuik Rangkiang. Museum ko makhususkan diri pado sijarah jo budayo urang Minangkabau, urang Mentawai jo urang Nieh. Museum ko mampunyoi 6.000 koleksi.

Di kawasan palabuahan Muaro banyak tasuo babarapo bangunan paninggalan sajak zaman Balando. Babarapo bangunan di kawasan tasabuik ditatapkan pamarintah satampek sabagai cagar budaya. Di antaronyo adolah Musajik Muhammadan batarikh 1843, nan marupokan masjid barono ijau mudo nan dibangun dek komunitas katurunan India. Cagar budayo lain, Klenteng Kwan Im nan banamo See Hin Kiong taun 1861 kudian direnovasi baliak taun 1905 dek sabalunnyo tabaka.^[125] Dari sailiran Batang Arau, ado sabuah jambatan nan banamo Jambatan Sitti Nurbaya. Jambatan itu maubuangkan sabuah kawasan bukik nan dikana juo jo namo Gunuang Padang. Pado bukik ko ado Taman Sitti Nurbaya nan manjadi lokasi kuburan Sitti Nurbaya.^[126] Kawasan bukik ko juo daulunyo manjadi tampek mukim mulo-mulo masyarakaik etnis Nieh di Kota Padang.^[127]

Kudian di palabuahan Taluak Bayua ado babarapo kawasan wisata sarupo Pantai Aia Manih, tampek batu Malin Kundang tagak.^[128] Salain itu, taruih ka selatan dari pusek kota juo ado kawasan wisata Pantai Caroline, jo Pantai Bunguih,^[129] sarato sabuah resort wisata sakelas hotel babintang tigo nan talatak di Pulau Sikuai.^[130] Sadangkan ka arah Kecamatan Koto Tangah, ado kawasan wisata Pantai Pasia Jambak, sarato kawasan wisata alam Lubuak Minturun,^[131] nan populer dalam tradisi balimau dan rami disinggahi dek masyarakaik utamonyo saari sabalun masuak bulan Ramadan.^[132]

Kota ko juo tanamo jo masakannya. Salain manjadi salero sabagian gadang masyarakaik Indonesia, masakan ko juo populer sampai ka mancanegara.^[133] Makanan nan populer di antaronyo sarupo Gulai, Randang, Ayam Pop, Taruang Balado, Gulai Itiak Lado Ijau, Nasi Kapau, Sate Padang jo Karupuak Sanjai. Restoran Padang ado banyak di saluruah kota gadang di Indonesia. Walau baitu, nan dinamokan sabagai "masakan Padang" sabananyo takana sabagai masakan etnis Minangkabau sacaro umum.^[134]

Dalam mandorong pariwisata di Kota Padang, pamarintah kota maadoan Festival Randang untuak partamo kalinyo pado taun 2011, sasudah sabalunnyo Randang dinobatkan dek CNN International sabagai hidangan paringkek partamo dalam daftar World’s 50 Most Delicious Foods (50 Hidangan Talamak Dunia).^[135] Festival nan dipusekkan di RTH Imam Bonjol tasabuik diikuti dek kelurahan sa-Kota Padang dan bajayo mamasak 5,2 ton dagiang, sainggo tacataik dalam Museum Rekor Indonesia sabagai palombaan mamasak jo dagiang sarato paserta tabanyak.^[136] Pado taun nan samo pamarintah kota juo mulai manyelenggarakan Festival Sitti Nurbaya, pagelaran taunan nan maangkek adat jo tradisi Minangkabau.^[137]

Barikuik ko monumen-monumen nan ado di Kota Padang:

• Monumen Bahari Sungai Pisang
• Monumen Pertempuran Partamo
• Monumen Tugu Padang Area
• Monumen Tugu Peristiwa Sungai Barameh
• Monumen Tugu Pajuangan Kemerdekaan Rakyaik Pauah
• Monumen Tugu Pajuangan Rakyaik Kuranji
• Monumen Tugu Pamudo Syarif
• Monumen Tugu Panyarangan Pasa Banda Buek
• Monumen Tugu Panaiakan Bandera Merah Putiah
• Tugu Adabiah
• Tugu Bagindo Aziz Chan
• Tugu Bateh Linggajati
• Tugu Bandera Ulang Taun Patamo Kemerdekaan
• Tugu Jong Sumatranen Bond
• Tugu Permindo (Perguruan Menengah Indonesia)

•   Hildesheim, Jerman^[138]
•   Vũng Tàu, Vietnam^[139]
•   Beit Lahia, Palestina^[140]
•   Perth, Australia^[141]
•   Dubai, Uni Emirat Arab^[141]

• Colombijn, Freek (2006). Paco-Paco (Kota) Padang: Sejarah Sebuah Kota di Indonesia pada Abad ke-20 dan Penggunaan Ruang Kota. Yogyakarta: Penerbit Ombak. 

• Situs web rasmi Padang
• Serak Gulo, Tradisi Muslim India di Kampung Keling Okezone, 27 Mei 2009
• Membaur Hingga Tak Fasih Bahasa Mandarin^{[pranala nonaktif permanen]} Radio Nederland, 20 Maret 2008
• Lomba Perahu Naga Internasional di Padang^{[pranala nonaktif permanen]}