Liberalisme

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

't Liberalisme is 'n politiek-maotsjappelike struiming waarin de vrieheid van 't individu centraal steitj. Dees struiming is óntstangen innen achtieëndjen ieëf en woort veur 't ieës inne praktiek gebrach nao de democratische revoluties vanne neugetieëndjen ieëf in Europa en Naord-Amerika.

Veure vrieheid van 't individu te garandere mót de euverheid zich zoea min meugelik besjeftige mit ingriepen inne economie en 't maotsjappelik laeve vanne börger. Daomit steitj 't liberalisme geraadwaegs taengeneuver 't socialisme. E wichtig puntj van 't liberalisme is de sjeijing tösse kirk en staot, wobie 't liberalisme waal weer veurstenjer is vanne vrieheid van godsdeens. Ouch wille de liberale det de staotsinrichting vasgelag wuuertj inne gróndjwèt, wo ouch alle gróndjrechte vanne börger in mótte staon.

In 't liberalisme van noe zeen versjillige struiminge te óngersjeie; dees varieëre van klassiek liberalisme toet progressief en sociaal liberalisme.

De VVD en D66 zen in Nederlandj politische partieje die ideologisch gezeen toet 't liberalisme behuuere. Op EU-niveau behuueren alle nationaal pertieje binne de Europese Unie toet zeker Europese pertieje. De liberaal pertieje behuuere meis toet Renew Europe; wie ouch de Belzje Open VLD en Mouvement Réformateur, de Duutsje FDP en de Nederlandjse VVD en D66.