Gistel

Gistel besteit oet veer deilgemeintes. Gistel zelf heet 'n oppervlak vaan 16,88 km² en had in 2006 8.135 inwoeners.

• I. Gistel
• II. Moere
• III. Zevekote
• IV. Snaaskerke

Gistel ligk op de grens vaan de polder- en zavelstreek.

Bij Gistel ligk e klei windmeulepark.

Bekind zien in Gistel de Sint-Godelieveabdij Ten Putte, gestiech in d'n èlfden iew (foto; binne häör mör e museum gewijd aon Sint-Godelieve) en de neogotische Slevrouwekèrk mèt 78 meter hoegen torie. Boete 't dörp stoon twie aw windmeules, d'n Oostmolen en meule De Meerlaan.

Gistel hèlt jaorleks 'n percessie ter iere vaan Sint-Godelieve, en wel op d'n iersten zoondag nao 5 juli.

De naom Gistel liet ziech vrij sumpel aofleie vaan geest 'zavel' en lo 'ope bós'. Gistel ligk op 'ne zandrögk tösse lieger ligkend land. Gistel weurt mesjiens al in de negenden iew in aonteikeninge vaan de Noormanne gevoonde, meh pas euver de vermelding in d'n tienden iew besteit zekerheid. Gistel laog toen aon de Breede Ee, 'ne zie-erm dee deep 't Vlaamse land in veel. Dit maakde 't dörp zoewel gesjik veur d'n handel es good te verdeidege tege de Noormanne. In d'n twelfden iew woort 't pläötske versterk, in d'n daartienden iew volgde stadsrechte. In 1488 woort 't stedsje verweus in 'n represaille vaan Maximiliaan vaan Oosteriek, wie Vlaandere tege häöm in opstand kaom. Haafweeg de zestienden iew kaom Gistel in bezit vaan de Italiaonse familie Affaitati. In d'n Tachtegjaoregen Oorlog woort 't gebeed zoe door 't geweld versjäörd tot 't gebeed oontvolk raakde. 't Verval woort pas umgekierd nao d'n aonlag vaan 'ne steinweeg vaan Oostende nao Wijnendale in d'n achtienden iew, 'ne spoorweeg in de negentienden iew en d'n A18/E40 in de twintegsten iew. Gistel woort neve forenzeplaots veur Oostende ouch zelf 'n industrieplaots. In 1971 woorte de opgeheve gemeintes Moere en Zevekote aon Gistel touwgeveug, in 1977 volgde Snaaskerke.

• Website vaan de gemeinte