C. Buddingh'

Buddingh' woort in 1918 gebore in Dordrech, boe heer vaan 1930 tot 1935 de HBS doorleep. Sinds 1933 voetbalden 'r bij D.F.C. In 1938 haolde heer in D'n Haag zien lèsbevoogheid Ingels. Vaan 1938 tot 1940 zaot heer in deens, achterein in Breda, Den Bosch en Apeldoorn; mèt de mobilisatie zaot heer in Gouda. Nao de bezètting kierde heer trök nao Dordrech um dao in de bibliotheek te wèrke, meh wie bij häöm tering woort vasgestèld mós heer nao sanatorium Zonnegloren in Soest. Heer zaot dao vaan 1942 tot 1943 en later nog ins vaan 1947 tot 1949. Zie wijer leve zouw heer 'n zwake gezoondheid hawwe. In 1950 trouwden heer mèt Stientje van Vuren. Ze zouwe twie zäöns kriege, Sacha en Wiebe.

Al in d'n oorlog waor Buddingh' begós mèt 't publicere vaan diechwerk. Zoe sjreef heer zie bekind gediech "De blauwbilgorgel" in 't sanatorium. Nao d'n oorlog naom heer dit werk serjeus t'r hand. ech bekind woort heer in 1966, nao optrejje bij Poëzie in Carré. Heer zouw nog diverse kiere op de tv koume. In deen tied bleef heer diechte, meh sjreef heer ouch verhaole, brach heer zien daagbeuk oet en vertaolde heer väöl Ingelse literatuur. De vertaoling vaan A clockwork orange (vaan Anthony Burgess) deeg heer same mèt ziene zoon Wiebe, dee ouch zouw oetgreuje tot 'ne bekinde vertaoler (meh kint häöm beveurbeeld vaan de Harry Potter-beuk).

In 1979 deeg Willem Frederik Hermans in 't NRC Handelsblad e zier negatief artikel euver de daagbeuk vaan Buddingh' publicere. Zoedoende publiceerde Buddingh' tot zienen doed gein daagbeuk mie; de notities vaan zien lèste jaore woorte pas in 1995 oetgegeve. Buddingh' storf op 24 november 1985 in 't Gemeintelek Hospitaol vaan Dordrech, boe heer herstèlde vaan 'n operatie.

In Buddingh' zien umvaankriek werk zien e paar constantes te oontdèkke. 't Is in 't gemein löchteg en leunt dèks tege plezeerdiechterij aon. De bekinde Gorgelrijmen zien zelfs echte nonsenspoëzie. In de loup vaan de jaore viefteg en zèsteg kaom heer tot ziene kinmerkende stijl: euver 't algemein gei rijm en metrum, en oetgesproke spreektaoleg vaan aard (clichés, Hollandse dialekwäörd, stopwäördsjes). Heimèt zeuk Buddingh' de grenze vaan de poëzie op. Ouch de oonderwerpe zien dèks alledaogs. Heimèt voont Buddingh' aonsleting bij de Zèstegers, allewel tot dees diechters e stök joonger waore es heer; heer wèrkde ouch mèt aon hun tiedsjrif Gard Sivik. De oonderwerpe zien dèks otobiografisch. Ouch diechde Buddingh' gere euver sport en euver zien toesstad Dordrech.

Zien bekindste gediechte zien "De blauwbilgorgel" en "Pluk de dag". In Dordrech is ouch zien "Ode aan Dordrecht" nog hendeg geleef.

Sinds 1988 weurt de C. Buddingh'-pries oetgereik aon 't bèste Nederlandstaoleg poëtisch debuut.

Dit artikel is gebaseerd op 't corresponderend Nederlandstaoleg artikel en wel in dees versie.

• Literatuur vaan en euver Buddingh' in de DBNL