Սանտա Մարիա դել Պոպոլո

Սանտա Մարիա դել Պոպոլո; Basilica di Santa Maria del Popolo
Հիմնական տվյալներ
Տեսակ	եկեղեցի, փոքր բազիլիկ և cardinal title?
Երկիր	Իտալիա
Տեղագրություն	Հռոմ
Հասցե	piazza del Popolo, 12 - Roma
Դավանանք	կաթոլիկություն
Վանականություն	Augustinians? և Order of Friars Minor?
Թեմ	Հռոմի թեմ
Հիմնական ամսաթվերը	1099 և 1239
Կազմված է	Cerasi Chapel? և Della Rovere Chapel?
Ժառանգության կարգավիճակ	Իտալիայի մշակութային ժառանգություն
Նվիրված	Մարիամ Աստվածածին
Անվանված	Մարիամ Աստվածածին
Ճարտարապետ	Բաչիո Պոնտելլի
Ճարտարապետական տիպ	բազիլիկ
Ճարտարապետական ոճ	վերածննդի ճարտարապետություն
Հիմնադրված	1099 և 1239
Շինանյութ	աղյուս, բետոն
	Santa Maria del Popolo (Rome) Վիքիպահեստում
	smariadelpopolo.com

Սանտա Մարիա դել Պոպոլո (իտալ.՝ Basilica di Santa Maria del Popolo), Օգուստինյան եկեղեցի Հռոմում։ Գտնվում է Պիացցա դել Պոպոլո հրապարակի հյուսիսային կողմում, Պորտա դել Պոպոլոյի (նախկին անվ․ Պորտա Ֆլամինիա) և Պինցիուս բլրի եզրին։ Եկեղեցին կառուցվել է նախկին մատուռի տեղում, որը կառուցվել էր 1099 թվականին։ Սանտա Մարիա դել Պոպոլոյում առկա ստեղծագործությունները պատկանում են այնպիսի հանրահայտ նկարիչների, ինչպիսին են Ռաֆայելը, Լորենցո Բերնինին, Կարավաջոն, Ալեսսանդրո Ալգարդին, Պինտուրիկիոն, Դոնատո Բրամանտեն և այլն։ Սանտա Մարիա դել Պոպոլոն տիտղոսակիր եկեղեցի է։ 2006 թվականի մարտի 24-ից եկեղեցու կարդինալ քահանան ազգությամբ լեհ Ստանիսլավ Ձիվիշն է։

Պատմություն

Եկեղեցու հատակագիծը և կողային կապելլաները

1099 թվականին Դոմիտիի Ահենոբարբիի գերեզմանի վրա Պասքալիս II պապը մատուռ կառուցեց։ Ըստ ավանդույթի այդ վայր հաճախակի այցելում էին Ներոնի ուրվականերն ու դևերը սև ագռավների տեսքով։ Հետևաբար պապը հատում է տեղի ընկուզենին, որն ագռավների ապաստանն էր, և տեղում կառուցում մատուռ։ Դել Պոպոլո անվանումն առաջացել է Հռոմի մարդկանցից, որոնք աջակցել են մատուռի կառուցմանը։ Սակայն ըստ որոշ աղբյուրների, այն առաջացել է լատիներեն «populus» բառից, որը նշանակում է բարդի՝ նկատի ունենալով տեղի ծառը։ Մատուռն ընդլայնվել և 1235 թվականին դարձել է եկեղեցի Գրիգոր IX պապի կողմից, իսկ 1250 թվականին տրվել է Օգուստինյան վանականներին, որոնք մինչ այսօր հսկում են այն։

Սանտա Մարիա դել Պոպոլոն վերակառուցվել է Բակկիո Պոնտելլիի և Անդրեա Բրենոյի կողմից 1472-1477 թվականներին Սիքստոս IV պապի պատվերով։ Վերակառուցման արդյունքը իտալական Վերածննդի վաղ և հիանալի օրինակ է։ 1655-1660 թվականներին ճակատամասը ձևափոխվել է Լորենցո Բերնինիի կողմից, որին Ալեքսանդր VII պապը խնդրեց վերածննդյան եկեղեցին վերափոխել ավելի ժամանակակից, բարոկկո ոճով։

Ինտերիեր

Աբսիդ

Եկեղեցու աբսիդը ձևավորել է Դոնատո Բրամանտեն։ Այստեղ կարելի է գտնել հնագույն ներկված ապակուց պատրաստված պատուհանները, որոնք ֆրանսիացի նկարիչ Գիլիոմ դե Մարչիլայի աշխատանքներն են։ Պինտուրիկիոն ձևավորել է պահոցը ֆրեսկոներով։ Կարդինալ Ասկանիո Սֆորցայի և Ջիրոլամո Բասսո դելլա Ռովերեի տապանաքարերը, որոնց հեղինակն է Անդրեա Սանսովինոն, գտնվում են աբսիդում։

Կողային կապելլաներ

Դելլա Ռովեր կապելլա

Չիբո կապելլա

Բասսո Դելլա Ռովեր կապելլա

Կոստա կապելլա

Մոնտեմիրբլ կապելլա

Կիջի կապելլա

Մելլինի կապելլա

Չիբո-Սոդերինի կապելլա

Ֆեոդոլի կապելլա

Չերազի կապելլա

Ֆեոլի և Չիկադա կապելլա

1. Դելլա Ռովեր կապելլա

Դելլա Ռովեր կապելլան աջակողմյան թևի առաջին աղոթարանն է։ Կառուցվել է կարդինալ Դոմենիկո դելլա Ռովերի կողմից 1471-1484 թվականներին, երբ իր ազգական Սիքստոս IV պապը վերակառուցեց եկեղեցին։ Ձևավորումն իրականացվել է Պինտուրիկիոյի և իր սաների կողմից։ Կարդինալ Կրիստոֆորո դելլա Ռովերի տապանաքարը Անդրեա Բրենոյի և Մինո դա Ֆիեսոլի աշխատանքն է։ Կանգնեցվել է նրա եղբոր կողմից։ Աջակողմյան Ջիովանի դե Կաստրոյի հուշարձանը վերագրվում է Ֆրանչեսկո դա Սանգալլոյին։ Կապելլան 15-րդ դարի ամենալավ պահպանված հուշակոթողն է Հռոմում։

2․ Չիբո Կապելլա

Չիբո կապելլան արմատապես վերակառուցվել է կարդինալ Ալդերանո Չիբոյի (1613-1700 թթ) կողմից 1682-1687 թվականներին՝ ըստ Կառլո Ֆոնտանայի նախագծի։ Նկարների գեղեցկության, թանկարժեք մարմարով երեսապատված պատերի, ինչպես նաև կառուցման մեջ ներգրավված ճարտարապետների և նկարիչների պատճառով, այս կապելլան համարվում է ամենակարևոր ծիսական հուշարձանը, որ կանգնեցվել է Հռոմում 17-րդ դարի վերջում։

3. Բասսո Դելլա Ռովեր կապելլա

Բասսո Դելլա Ռովեր կապելլան կառուցվել է Ջիրոլամո Բասսո Ռովերի կողմից 1471-1481 թվականներին։ Պատկերազարդ ձևավորումների հեղինակն է Պինտուրիկիոն։ Աղոթարանի գլուխգործոցը «Տիրամայրը և սրբերի հետ թագադրվող մանուկը» ֆրեսկոն է։ Առաջին պատին Մարիամ Աստվածածնի վերափոխումն է, և տարբեր տեսարաններ սրբերի նահատակություններից։ Սկզբնական մայոլիկա հատակը նույնպես պահպանվել է։

4. Կոստա կապելլա

Կոստա կապելլան ունի նույն նախագիծը, ինչ Դելլա Ռովեր աղոթարանը։ Սակայն այն կահավորվել է պորտուգալացի կարդինալ Խորխե դա ոստայի կողմից, որն այն գնել է 1488 թվականին։ Արվեստի կարևոր գործեր են նկարները, որոնցում պատկեված են եկեղեցու չորս հայրերը, մարմարե խորանը (հեղինակ՝ Ջիան Քրիստոֆորո Ռոմանո), կարդինալ Կոստայի դամբարան հուշարձանը։ Պիետրո Ֆոսկարիի մարմարե և բրոնզե հուշարձանը 1480 թվականից պահվում է այստեղ։

5. Մոնտեմիրբլ կապելլա

Այս կապելլան կառուցվել է 1479 թվականին, սակայն 1561 թվականին դարձել է մկրտարան։ Կապելլայի ամենաարժեքավոր արվեստի գործը մկրտարանն է։ Այն պատելու համար մարմարը վերցվել է բազիլիկի հին խորանից։ Ինչպես սա, այնպես էլ կարդինալ Անտոնիոտտո Պալլավիչինիի դամբարան-հուշարձանը Անդրեա Բրենոյի աշխատանքներն են։

6. Կիջի կապելլա

Ագոստինո Կիջին պատվիրել է Ռաֆայելին նախագծել և ձևավորել այս դամբաան-մատուռը իր համար 1513 թվականին։ Կապելլան իտալական Վերածննդի և բարոկկոյի արվեստի գանձարան է։ Այն համարվում է բազիլիկի ամենակարևոր հուշարձաններից մեկը։ Գմբեթը զարդարված է Ռաֆայելի խճանկարներով, որում արտացոլվում է Աշխարհի արարումը։ Կապելլան հետագայում ավարտել է Լորենցո Բերնինին՝ Ֆաբիո Կիջիի համար։

7. Մելլինի կապելլա

Այս աղոթարանը նվիրված է եղել Սուրբ Նիկոլա Տոլենտինոյին։ Այն 15-րդ դարի ինքնատիպ վեցանկյուն կապելլաներից մեկն է եղել։ Բայց նրա ներքին ձևավորումը փոփոխվել է վերջին դարերի ընթացքում։ Այն Մելլինի ընտանիքի դամբարան-մատուռն է եղել դարեր շարունակ, և այնտեղ են գտնվում մի շարք տապանաքարեր։ Դրանց հեղինակներից են Ալեսսանդրո Ալջարդին և Պիեր Էտիեն Մոննոն։ Կամարի վրայի ֆրեսկոները ստեղծվել են Ջիովաննի դա Սան Ջիովաննիի կողմից 1623-1624 թվականներին։

8. Չիբո-Սոդերինի կապելլա

Խաչելության աղոթարանը կամ Չիբո-Սոդերինի կապելլան վերափոխվել է բարոկկոյի ժամանակաշրջանում, երբ ֆլամանդացի նկարիչ Պիետեր վան Լինտը պատկերում է մի շարք ֆրեսկոներ։ Ձախ կողմում «Խաչի կանգնեցումն» է, իսկ աջ կողմում՝ «Խաչի մեծարումը»։ Կամարը նույնպես զարդարված է ֆրեսկոներով։ Խորանի վրա կանգնեցված է փայտե խաչ։ Աղոթարանը վերանորոգվել է Լորենցո Սոդերինիի կողմից 1825 թվականին։

9. Ֆեոդոլի կապելլա

Այս կապելլան ռոմանական մաներիզմի թաքնված գանձ։ Այն նաև անվանել են Սանտա Կատերինա այն բանից հետո, երբ խորանի վրա տեղադրվել է Սուրբ Կատերինայի մարմարե արձանը։ Կապելլայի նախնական ձևավորումը իրականացվել է առաջին սեփականատեր Տրայանո Ալիկորնիի կողմից 1555 թվականին, իսկ 1569 թվականին աշխատանքները վերստին սկսել է նոր հովանավորը՝ Ջիրոլամո Ֆեոդոլին, և դրանք ավարտվել են մոտավորապես 1575 թվականին։

10. Չերազի կապելլա

Չերազի կապելլայում է գտնվում երկու հանրահայտ կտավներ, որոնք պատկերել է Կարավաջիոն՝ «Սուրբ Պոտրոսի խաչելություն» ու «Դավանափոխություն Դամասկոսի ճանապարհին»։ Հավանաբար սրանք բազիլիկի ամենակարևոր արվեստի նմուշներն են։

11-12. Ֆեոլի և Չիկադա կապելլա

Երկու միանման կապելլաներ են բացվում աջ տրանսեպտում։ Նրանք գեղարվեստական առումով զիջում են եկեղեցու մյուս աղոթարաններին։ Երկուսն էլ կառուցվել են 17-րդ դարում, սակայն նրանց ներկայիս ձևավորումն իրականացվել է ավելի ուշ։ Ամենաուշագրավ արվեստի գործը Օդոարդո Չիկադայի հուշարձանն է։

Հուշարձաններ

Մարիա Էլեոնորա Բոնկոպանի Լուդովիսիի տապանաքարը
Ջովաննի Բատտիստա Գիսլենի տապանաքարի ներքևի հատվածը
Սամուել Ռաֆայել Գլոբիկի տապանաքարը
Քրիստինա Դուլիոլի Անջելելլիի հուշաքարը
Վինչենցա Դանեսիին նվիրված հուշարձանը
Վւնչենցո Բոնադիեսի տապանաքարը
Ֆելիքս Բոիսսելիեին նվիրված հուշատախտակը
Ստեֆանո Սպադայի դիմաքանդակը
Մարիա Ֆլամինիա Օդեսկալչի Կիջիի հուշարձանը
Ագոստինո Կիջիի հուշարձանը
Ֆրանչեսկո Մանտիկայի հուշարձանը
Նատալ Ռոնդինինիի հուշարձանը
Ալեսսանդրո Մագգիի հուշաքարը
Տրիվուլցիո կարդինալների հուշաքարը
Ջերոնիմո դե Բորնեյի և Ջիովաննի Բատտիստա Ռոբիանոյի հուշաքարը
Կամիլլա Բուոնվիսիի հուշաքարը
Ջիովաննի Բատտիստա Սպադայի հուշարձանը
Ֆրանց Լուդվիգ Կատելի հուրաքարը
Գալեոտտո Բերնարդինիի հուշաքարը
Ադել Յուլիենի տապանաքարը
Գասպարե Սելիոյի տապանաքարը
Ստեֆանո Դեսիդերիոյի և Տերեզա Բենվենուտիի հուշաքարը
Մասկի եպիսկոպոսի տապանաքարը
Ջիովաննի Անտոնիո Պարակկայի տապանաքարը
Ջիովաննի Բատտիստա Պալլավիչինոյի հուշաքարը
Լուդովիկո Պոդոցատարոյի տապանաքարը
Ջուզեպպե Սեֆֆերի հուշաքարը

Ծանոթագրություններ

↑ ^1,0 ^1,1 ^1,2 http://www.santamariadelpopolo.it/it/?lang=it
↑ ^2,0 ^2,1 ^2,2 dati.beniculturali.it — 2014.

Արտաքին հղումներ

SM del Popolo: A Multimedia Presentation of the church and its setting Արխիվացված 2019-05-21 Wayback Machine, Australian National University
Santa Maria del Popolo Video Introduction
Santa Maria del Popolo, article and photos at Sacred Destinations
Piazza del Popolo, at "Rome Art Lover"
Santa Maria del Popolo, virtual tour with map and compass effect by Tolomeus

Վիքիպահեստն ունի նյութեր, որոնք վերաբերում են «Սանտա Մարիա դել Պոպոլո» հոդվածին։

[_f677a5b3ed13468f-1] 1,0 ^1,1 ^1,2 http://www.santamariadelpopolo.it/it/?lang=it

[_3bcde9ce190a1c0e-2] 2,0 ^2,1 ^2,2 dati.beniculturali.it — 2014.

[2]