Les Genevez

Les Genevez estas kampara komunumo en oriento de la kantono sur altece de iomete super mil metroj s.m. en la monteta regiono de la ĵurasa montaro. Al la komunumo Les Genevez apartenas krom la ĉefvilaĝo mem la vilaĝetoj Le Prédame, Les Vacheries des Genevez, Les Joux kaj Les Bois-Rebetez. Norde de la ĉefvilaĝo al la komunumo ankaŭ apartenas la montdorso Les Combes kun alteco ĝis 1093 s.m. kaj la marĉa kavaĵo Les Embreŭ. Oriente de la vilaĝo komenciĝas la Valo de Bellelay, tra kiu fluas la rivereto Sorne, kiu fontas en la vilaĝocentro de Les Genevez.

La teritorio de la komunumo etendiĝas sur areo de 13,64 km², de kiuj 43% estas kovritaj de arbaro, 53% servas por agrikulturo kaj 3% por setlado.^[1]

La komunumo Les Genevez limas en nordo al Lajoux, en oriento al Saicourt (BE), en sudo al Tramelan (BE), kaj en okcidento al Montfaucon.

La pastora preĝejo de Les Genevez estis unue konstruita en la jaro 1620. En la jaro 1935 ĝi estis novkonstruita, sed la sonorilturo el la 17-a jarcento estis integrita al la nova konstruaĵo. La preĝejo tronas norde de la vilaĝokerno sur la kresto de monteto kaj dominas la tutan regionon.

La vitroj de la fenestroj estas moderne pentritaj per la regiona artisto Yves Voirol. Apud la ĉefaenirejo situas en niĉo la sarkofago kun la mumio de la martirino Sankta Klaro. En la 17-a jarcento en la katakombo de Sankta Kiriako oni malkovris la tombon de Sankta Klaro. La svisa gardisto Benoit Bolinger de Menzigen ricevis de papo Inocento la 11-a la korpon de la sanktulino kaj transportis ĝin en la jaro 1680 al la Monaĥejo Einsiedeln. En la jaro 1683 Sankta Klaro estis ricevita en la Abatejo Bellelay. Dum la franca revolucio la korpo de la sanktulino devis esti kaŝita antaŭ la revoluciaj armeoj malantaŭ mebloj. En la jaro 1805 la abto de Bellelay donacis la korpon de Sankta Klara al la preĝejo de Les Genevez^[2]

En Les Genevez troviĝas la Ĵurasa Kamparana Muzeo en konstruaĵo kun kvarflanka lignobreteta tegmento. La konstruaĵo estas iama farma bieno. La muzeo estas malfermita ĉiam dimanĉon posttagmeze kaj povas ankaŭ vizitata post antaŭa aliĝo. Ĉiam vendredon posttagmeze oni bakas en la lignoformo panon laŭ la metodo de la 17-a jarcento. La muzeo montras la vivon kaj la ilaron de la kamparanoj ĵurasaj de tiu epoko, de ankaŭ la atelieron de horloĝisto kaj la herbolibroj de pastro, kiu vivis en la domo dum la 18-a jarcento.^[3]

Le Genevez situas flanke de la gravaj trafikvojoj. Al la publika transportreto la komunumo estas konektita per buslinio de Genevez Glovelier al Tramelan kaj poŝtaŭtolinio al Tavannes, kiu ambaŭ trafikas nur dum la matenaj, tagmezaj kaj vesperaj horoj en maloftaj kadencoj.

La unua dokumenta mencio de Les Genevez datiĝas el la jaro 1381 kiel Les Geneveys. Dum mezepoko Les Genevez estis sub la regado de la Monaĥejo Bellelay. De 1793 ĝis 1815 la vilaĝo apartenis al Francio kaj formis ĝis 1800 parto de la departemento Mont Terrible kaj poste de la departemento Haut-Rhin. Per la decido de la Viena Kongreso de 1815 Les Genevez estis atribuita al la distrikto Moutier de Kantono Berno. Okaze de la ĵurasaj balotoj la loĝantaro de Les Genevez klare verdiktis por la aliĝo al la nova Kantono Ĵuraso kaj tial transiris per baloto de la 7-a de septembro 1975 al la distrikto Franches-Montagnes kaj kun ĝi la 1-an de januaro 1979 fariĝis parto de Kantono Ĵuraso.

• Les Geneveys

•  
  Mumio de Sankta Klara en la preĝejo de Les Genevez
•  
  Preĝejofenestroj de Yves Voirol en la preĝejo de Les Genevez
•  
  Orgeno en la preĝejo
•  
  Horloĝista ilaro en la Ĵurasa Kampara Muzeo

• Oficiala retejo de la komunumo Les Genevez
• Les Genevez en la Historia Leksikono de Svislando