Васіль Васілевіч Шур

Васіль Васілевіч Шур
Дата нараджэння	26 чэрвеня 1946(1946-06-26) (78 гадоў)
Месца нараджэння	Стадолічы, Стадоліцкі сельсавет, Лельчыцкі раён, Палеская вобласць, БССР, СССР
Грамадзянства	Беларусь
Род дзейнасці	мовазнавец
Месца працы	Мазырскі дзяржаўны педагагічны ўніверсітэт імя І. П. Шамякіна
Навуковая ступень	доктар філалагічных навук
Навуковае званне	прафесар
Альма-матар	БДПУ філалагічны факультэт МДПУ імя І. П. Шамякіна (1967)
Узнагароды	Выдатнік народнай асветы БССР[d]

Васіль Васілевіч Шур (нар. 26 чэрвеня 1946, в. Стадолічы, Лельчыцкі раён, Гомельская вобласць) — беларускі мовазнавец. Доктар філалагічных навук (2004)^[1], прафесар (2006).

Нарадзіўся 26 чэрвеня 1946 г. у вёсцы Стадолічы Лельчыцкага раёна ў сям’і калгаснікаў Васіля Дзямідавіча і Лідзіі Конанаўнай. Падчас Вялікай Айчыннай вайны ў ліпені 1943 г. акупанты амаль дашчэнту спалілі гэтую вёску і забілі 58 яе жыхароў. У першыя пасляваенныя гады нарадзіўся таксама брат Міхась, у 1950-я — сястра Валянціна^[2]. Гады маленства былі цяжкія, дзеці спазналі нястачу^[2].

Вучыўся ў Стадоліцкай сярэдняй школе^[2]. Скончыў у 1967 годзе філалагічны факультэт Мазырскага педагагічнага інстытута^[1] па спецыяльнасці «Беларуская мова і літаратура» (кваліфікацыя «Настаўнік беларускай мовы і літаратуры сярэдняй школы»). У 1967—1969 гадах выкладаў геаграфію, беларускую і рускую мовы і літаратуру ў роднай школе^[2]. Пасля праходжання тэрміновай службы ў Савецкай Арміі, якая праходзіла ў Вышэйшым авіяцыйным вучылішчы Паўночна-Каўказскай ваеннай акругі, працаваў настаўнікам у Лельчыцкім раёне. З 1969 года — у Мазырскім дзяржаўным педагагічным універсітэце імя І. П. Шамякіна^[1].

У 1974 годзе скончыў аспірантуру Мінскага дзяржаўнага педагагічнага інстытута імя А. М. Горкага па спецыяльнасці «Беларуская мова».

У 1983—1987 гадах — сакратар партыйнага бюро, у 1987—2001 гадах быў дэканам факультэта педагогікі і методыкі пачатковай адукацыі, у 2005—2015 гадах — загадчыкам кафедры беларускага мовазнаўства. Цяпер займае пасаду прафесара кафедры беларускай і рускай філалогіі^[1].

Сфера навуковых інтарэсаў уключае беларускую лексікалогію, лексікаграфію, літаратурную анамастыку. Аўтар манаграфій «З гісторыі ўласных імёнаў» (1997), «Беларускія ўласныя імёны: беларуская антрапаніміка і тапаніміка» (1998), «Анамастычная лексіка ў беларускай мастацкай літаратуры» (2002), «Онім у мастацкім тэксце» (2006), «Уласныя імёны ў прасторы і часе» (2008), «Уласнае імя ў мастацкім тэксце» (2010) і іншых, а таксама звыш 270 навуковых прац^[1].

Узнагароджаны медалём «За працоўныя заслугі» (2016)^[1], знакам «Выдатнік народнай асветы» (1982), шматлікімі Граматамі Міністэрства асветы БССР, Міністэрства адукацыі Рэспублікі Беларусь, Гомельскага аблвыканкама, Мазырскага гарсавета і гарвыканкама^[2].

• Анамастычная лексіка ў мове беларускай мастацкай літаратуры : дысертацыя … доктара філалагічных навук : 10.02.01 : абаронена 23.01.2004 : зацверджана 05.07.2004 / Шур Васіль Васільевіч. — Мінск, 2004.
• Животноводческая лексика в говорах Мозырского Полесья : автореферат диссертации … кандидата филологических наук : 10.02.02 / Шур Василий Васильевич. — Минск, 1974.
• Онім у мастацкім тэксце : манаграфія / Васіль Шур. — Мінск, 2006.

• Шур Василий Васильевич // Рэгіёны Беларусі: энцыклапедыя. У 7 т. = Регионы Беларуси: энциклопедия. В 7 т. (руск.). — Мн.: БелЭн. — ISBN 978-985-11-0463-1.
• Ісмайлава, Л. В. Шур Васіль Васільевіч / Л. В. Ісмайлава // Веснік Мазырскага дзяржаўнага педагагічнага ўніверсітэта імя І. П. Шамякіна. — 2011. — № 3. — С. 175.
• Каноплич, Н. Узнагароды — лепшым / Наталля Канопліч // Жыццё Палесся. — 2016. — 5, 7 января. — С. 6.
• Шур Васіль Васільевіч // На службе роднай мове : да 60-годдзя кафедры беларускага мовазнаўства і 60-годдзя Мазырскага дзяржаўнага педагагічнага універсітета : біябібліяграфічны даведнік. ― Мазыр, 2004. — С. 39—49.
• Крук, Б. Доктар філалогіі са Стадоліч / Барыс Крук, Сяргей Кураш // Светлае жыццё. — 2016. — 8 ліпеня. — С. 4.