Адзінкі вымярэньня

У фізыцы і тэхніцы адзінкі вымярэньня (адзінкі фізычных велічынь, адзінкі велічынь^[1]) выкарыстоўваюцца для стандартызаванага паданьня вынікаў вымярэньняў. Лікавае значэньне фізычнай велічыні вызначаецца як дачыненьне вымеранага значэньня да некаторага стандартнага значэньня, якое і зьяўляецца адзінкай вымярэньня. Лік з указаньнем адзінкі вымярэньня завецца найменным.

Адрозьніваюць базавыя адзінкі вымярэньня, якія вызначаюцца з дапамогай эталёнаў, і вытворныя адзінкі, вызначаныя з дапамогай базавых. Выбар велічыні і колькасьці базавых адзінак вымярэньня можа быць адвольным і вызначаецца толькі традыцыямі або дамовамі. Існуе вялікая колькасьць розных сыстэм адзінак вымярэньня, якія адрозьніваюцца выбарам базавых адзінак вымярэньня.

Дзяржава, як правіла, заканадаўча ўсталёўвае якую-небудзь сыстэму адзінак. Мэтралёгія бесьперапынна працуе над паляпшэньнем адзінак вымярэньня і базавых адзінак і эталёнаў.