Капейка

Капе́йка (па-расейску: копейка) — расейская грашовая адзінка, роўная сотай частцы рубля. Ужываецца з 16 стагодзьдзя.

Назва пайшла ад выявы Сьвятога Юрыя зь дзідай, працінаючага цмока, на авэрсе манэтаў Маскоўскага княства.

Друкавалася са срэбра, золата, медзі. Замена срэбра на медзь у 1655—1663 гадох прывяла да «медзянога рокашу». Рэгулярны выпуск медзяных капеек і ператварэньне іх у разьменную манэту адбыліся ў 1704 годзе.

Сёньня капейка — разьменная манэта ў Расеі (1/100 расейскага рублю), а таксама ва Ўкраіне (копійка, 1/100 украінскае грыўны) і ў Беларусі (1/100 беларускага рублю, фактычна манэтаў ці банкнотаў, намінаваных у капейках, у абароце не было з 1994 году. Але пасьля дэнамінацыі 1 ліпеня 2016 ^[1] зноў зьявіліся ў абароце).

• 
  Капейка 1600-1605 гадоў, Маскоўская дзяржава, Барыс Гадуноў. Срэбра.
• 
  Сярэбраныя і медныя капейкі Пятра I. Расейская імпэрыя.
• 
  Капейка 1914 году, Расейская імперыя, Мікалай II. Медзь.
• 
  Капейка 1990 году, СССР.
• 
  Капейка 1997 году, Расейская Фэдэрацыя.

2 верасьня 2024 году Нацыянальны банк Украіны ініцыяваў зьмену назвы разьменных манэтаў з «капейка» на «шаг(uk)» у мэтах аднаўленьня гістарычнай справядлівасьці, садзейнічаньня дэрасеізацыі й адраджэньня нацыянальных традыцыяў Украіны. Вярхоўная Рада Ўкраіны павінна прыняць рашэньне аб увядзеньні ў абарачэньне новай манэты.^[2][3]