Valtu

Nun ta realmente claru'l so orixe, pero les posibilidaes de la so procedencia prerromana, yá pue columbrase en pallabres d'Estrabón, qu'afirmaba que yera vezu de los pueblos del norte peninsular el facer exercicios de llucha ensin armes.

Ye bien popular nes romeríes onde, xunto al llanzamientu de barra y les carreres, sirvía pa poner a prueba l'axilidá y fuercia de los mozos.

Dos lluchadores agárrense pasando'l brazu derechu pel hombru izquierdu del contrariu y la mano izquierda per baxo'l so sobacu derechu, xuniendo dambes manes nel llombu d'ésti. Los lluchadores queden d'esta manera trabaos y tenten entós, per aciu de la fuercia colos brazos y de mañes, valtar al contrariu en suelu. Les normes son firmes y controlen l'agresividá de los lluchadores en tou momentu. Lea llucha llionesa y la llucha canaria guarden asemeyanza col valtu dientro del panorama estatal, asina como nel internacional, como por exemplu cola llucha Back Hold d'Escocia.

Según recueye Julio Muñiz Silva, les regles principales del valtu son les que siguen: 1. Los contendientes lluchen garraos al cuerpu. Un brazu arrodia’l llombu del adversariu y l’otru gárrase a esti pasándolu ente’l brazu y el cuerpu del contrariu. 2. A la de dominar al contrariu, esta llucha nun almite otra cosa que bloquialu o tiralu per aciu de trancadielles y otros movimientos apalancaos con puntos d’apoyu talos como’l llombu, el cadril, les rodielles, les piernes o los calcaños. Enxamás güelpes nin otres formes de combate dañibles. 3. Dambes persones faen por valtar al oponente de forma que caya al suelu tocando col llombu nél. Esta aición llámase facer «un valtu». 4. El lluchador que fai un valtu, gana’l combate direutamente. 5. En casu de cayer los dos lluchadores al empar, ye preciso repetir el combate. 6. Si, en cuenta de cayer col llombu, el lluchador valtáu pega colos llaos del cuerpu en suelu, dizse que’l contrariu consiguió facer «mediu valtu». 7. Dos medios valtos valen por un valtu, asina que los combates pueden ganase con distintes combinaciones de marcador:

• 1 vs 0: un valtu

• 1 vs 0,5: un valtu gana a mediu valtu consiguíu enantes

• 0,5+0,5 vs 0: dos medios valtos

• 0,5+0,5 vs 0,5: dos medios valtos ganen a mediu valtu

• 0,5+1 vs 0: mediu valtu y un valtu

• 0,5+1 vs 0,5: mediu valtu y un valtu ganen a mediu valtu

Esisten dos variantes: llucha cuerpu a cuerpu y a petrina

Yá nel sieglu I d.C. les comarques de la rexón enfrentábense unes a otres con esta modalidá de llucha na que los contrincantes permanecíen abrazaos l'ún al otru.

Ensin mover les manes, tán angariyaos a tentar valtiase usando la destreza de les sos piernes y la fuercia del torsu, si bien la téunica ye l'elementu fundamental p'algamar la victoria. En muchos requexos asturianos, los neños entamaben a prauticar el Valtu a los seis años y lo primero que se-yos enseñaba yera a cayer al suelu, que ye la manera de vencer al otru.

La posición na que queden trabaos ente sí los dos lluchadores da llugar a l'agarrada o lapsu de tiempu qu'empleguen dos lluchadores en vencese. L'agarrada ye lo que'l "round" o asaltu al boxéu. La lluchada ye'l combate en sí.

Una mano garra'l cintu (na parte anterior de la cintura) y la otra va per enriba del hombru a la espalda o per enriba del hombru a coyer tamién el cintu pela parte postrera. Les téuniques de piernes son válides y son les que faciliten l'aición de valtiar al contrariu.

Los dos lluchadores (valtiadores) tienen prohibíos los güelpes, les estrangulaciones, luxaciones y agarre de cualesquier parte de la tiesta.

El xeógrafu ya historiador griegu Estrabón, al serviciu del Imperiu Romanu cuenta nel so Llibru III Geográphica:

“son mañosos n'emboscaes, áxiles, llistos,...Prautiquen lluches ximnástiques, hoplítiques y hípiques. Exercitándose pal puxilatu, la carrera, les safadures y les batalles campales... así viven estos montañeses que como dixi son los qu'habiten nel llau septentrional d'Iberia, esto ye, los kallakoi, Astoures y kantabroi...”

Na dominación romana prauticáronse los xuegos qu'apurrió Roma como les lluches ente homes y con fieres. Na época romana y tamién visigoda la llucha prautícase como exerciciu vigorizante y formativu.

Depués de la denomada Reconquista la llucha emplégase como un instrumentu d'entretenimientu, asina podemos topar nel arte románicu capiteles, canecinos y metopes con representaciones d'escenes de llucha.

Yá nel sieglu XVIII topamos testimonios de dellos autores como Xovellanos (Xixón, 1790) que testifica que:

“el deporte de la llucha nunca nun faltaba nes romeríes del so tiempu y país”.

En 1895, Braulio Vigón fala d'un xuegu de llucha nomáu La Vuelta:

“dos neños abrazábanse fuertemente y procuren valtar al so contrariu”

Asina, anguaño atopamos testimonios orales de persones mayores en cualesquier fastera d'Asturies que nos falen de la mena d'engarriase, los finxos y les téuniques, asina como d'anéudotes o nomes de los meyores lluchadores de los pueblos. Los motivos de lluchar tienen que ver col entretenimientu, p'arreglar disputes o pa marcar l'estatus de poder dientro d'un grupu social.

Tamién faénnos saber que s'iguaben competiciones ente pueblos y munches vegaes arbitraben los paisanos mayores que fueren bonos valtiadores.

Anguaño, la recuperación del valtu pasa pelos estudios etnográficos y proyeutos de dellos coleutivos y autores: Lliga Celta d'Asturies (Enol Fuente Corripio y Fernán Morán), Conceyu d'Estudios Etnográficos Belenos, Federación Asturiana de Llucha, Ensame pol Deporte Autóctonu, Tertulia Cultural El Garrapiellu, Federación de Deportes Autóctonos d'Asturies, Jose Gerardo Ruiz Alonso y Julio Muñiz Silva), pola normativización de regles y finxos, pela sensibilización y aceptación del deporte y la cultura asturiana, y pela realización de muestres y competiciones en diferentes fiestes y romeríes.

El domingu 5 de setiembre de 2021, el conceyu de Bimenes acoyó la presentación del primer equipu de valtu reguláu baxo la Federación de Lluches Olímpiques y Disciplines Asociaes del Principáu d'Asturies.

Col oxetivu de facer esa modalidá deportiva federativa en próximes feches, ufiertala nos centros asturianos pa la so promoción y promocionala de cara a la so participación na edición del Festival Intercélticu de Lorient de 2022.<ref>Presentación equipu de valtu 26 d'agostu de 2021, Asturies.com<ref>== Referencies ==

• Fernánde, Gausón; Barrio, Uxenu (1996): Deportes na tradición asturiana: Les Lluches. Asturies: memoria encesa d'un país, nᵘ1-Xunu 1996. Conceyu d'Estudios Bibliográficos Belenos.
• Ruiz Alonso, José Gerardo (2001): Juegos y deportes tradicionales en Asturias, Volumen II. Alborá Llibros, Xixón.
• Estrabón (7 e.c., edición de 2004): Geografía. Libros III-IV. introducción, traducción

y notes de Mª J. Meana y F. Piñero". Revisada por C. Serrano Aybar. Madrid, Editorial Gredos.

• Xovellanos, Melchor Gaspar de de (1782, edición de 2011): Cartas del Viaje de Asturias (a Ponz)

• Páxina oficial de la Federación de Lluches Olímpiques y Disciplines Asociaes del Principáu d'Asturies - Valtu (castellán)
• Páxina del equipu 6 conceyos (n'asturianu)