الدوله الطولونيه

الدوله الطولونيه هى دوله مستقله متحضره اسسها احمد بن طولون فى مصر سنه 868م و حكمت لسنه 904م.

الدوله الطولونيه
الارض و السكان
القاره	افريقيا اسيا
عاصمه	القطائع
اللغه رسميه	عربى
الحكم
نظام الحكم	ملكيه
التأسيس والسيادة
تاريخ التأسيس	868
تعديل مصدري - تعديل

بعد ما استولى العرب على مصر سنه 642 و لغاية بداية الدوله الطولونيه مصر كانت ولايه او اماره تابعه للخلافه الاسلاميه. الخلفا العباسيين فى بغداد لحد عصر احمد بن طولون كانو هما اللى بيبعتو الولاه لمصر و كان اعتمادهم عليهم كبير فى جمع خراج مصر و الضرايب من المصريين. الفلوس اللى كانت بتتجمع من المصريين كانت بتمثل الجزء الاكبر من دخل بيت المال بتاع الخلفا لإن المناطق التانيه بره مصر كانت اغلبها كحيانه و تقريب مافيهاش حاجه يطلع منها خراج، فكانت مصر بالنسبه ليهم نهيبه و عمرهم ما حاولو يعينو مصرى والى على مصر.

الخليفه العباسى عين احمد بن طولون والى على مصر سنه 868م لكن ابن طولون استقل بحكم مصر سنه 877م. احمد بن طولون و ولاده و احفاده حكمو مصر حكم وراثى لمدة حوالى 38 سنه بطريقه مستقله عن دولة الخلافه العباسيه اللى ما بقاش ليهم فى مصر غير تبعيه اسميه بس. احمد بن طولون بنى مدينة القطائع عشان تبقى عاصمة دولته.

بيقول المؤرخ و المستشرق الفرنساوى جاستون فييت Gaston Wiet ان التاريخ الحقيقى لمصر المستقله بعد ما استولى عليها العرب ابتدا بعصر احمد بن طولون. فبقعاد احمد بن طولون على عرش مصر انتهت فترة الحكم العربى ليها اللى استمرت من وقت احتلالهم لمصر من سنه 642م لغاية قعاد احمد بن طولون على عرش مصر سنه 869. فى العصر الطولونى عاشت مصر عصر مذدهر و خلاها احمد بن طولون دوله قويه و متحضره و انتشر الرخاء و قلت الضرايب على المصريين و زادت الموارد و العمران، و فى عهد ابنه خمارويه اللى بنته قطر الندى اتوسع نطاق الدوله الطولونيه و اذدهرت كمان و كمان و اتبنت جناين و بساتين و بنى خمارويه جنينة حيوان فيها حيوانات و وحوش وسباع. خمارويه نفسه كان عنده سبع استأنسه و ماكانش بيفارقه.

جامع احمد بن طولون فى المنطقه اللى كانت فيها مدينة القطائع من اثار الدوله الطولونيه اللى اتبقت و اللى نجيت بعد ما هاجم العباسيين المدينه و حرقوها على ايد محمد بن سليمان قائد الخليفه العباسى المكتفى بالله اللى نهب البيوت و اغتصب الستات و قتل اعداد كبيره من المصريين و حولوا القطائع عاصمة مصر المتحضره لمدينه مخروبه بعد ما كانت مدينه منظرها يشرح العين ، و فضل العباسيين يحكمو لغاية ما طردهم الفاطميين من مصر سنه 969م فإنكمشو فى المشرق لحد ما المغول دمرو ملكهم و قضو عليهم فى 1258م.

الدوله الطولونيه كانت بداية نهاية حكم العرب لمصر و من وقتها ��يبدأ التاريخ الحقيقى لمصر المستقله فى العصور الوسطى. احمد بن طولون و اللى حكموا مصر بعده ما كانوش عرب ، و من وقته انتهى عصر دفع الجزيه لخليفه عربى عايش بره مصر و بيبعت ولاه عشان يحكموها و ينهبولة غلة مصر و فلوسها ، و بعد العصر الاخشيدى حكمت الدوله الفاطميه و بعدها الدوله الايوبيه الكرديه و بعدين الدوله المملوكيه اللى سلاطينها ما كانوش عرب و انتهى عصرهم بالإحتلال التركى ، و من بعده حكمت اسرة محمد على اللى برضه ماكانوش عرب و حكموا لغاية قيام جمهورية مصر فى سنه 1952. و بكده بيعتبر احمد بن طولون محرر مصر من الاحتلال العربى.

استمرت الدوله الطولونيه تحكم لغاية سنه 904م. و حكامها كانو:

1. احمد بن طولون.
2. خمارويه ابن احمد بن طولون.
3. ابو العساكر جيش بن خمارويه.
4. ابو موسى هرون بن خمارويه.
5. ابو المناقب شيبان بن احمد بن طولون.