Two Rode Together

Mientres os anyos 1880 en a localidat de Tascosa, en l'estau de Texas, o marshal Guthrie McCabe s'acontenta con estar o socio comercial (y personal) de l'atractiva propietaria d'o saloon d'a ciudat, Belle Aragon, recibindo-ne o 10% d'os beneficios d'o local, mesmo que o 10% d'o beneficio de todas as botigas d'o lugar. Cuan os familiars de captivos feitos por os comanches mientres as Guerras indias de Texas desichen a las autoridaz militars que aportellen a los suyos familiars secuestraus, o comandant Frazer ninvía a lo tenient Jim Gary, un viello conoixiu d'o marshal ta que lo porte enta lo fuerte ta convencer-lo ta que marche enta lo campamento comanche ta negociar a liberación d'os presoners. A mala raca, McCabe marcha con él dica lo fuerte, pero se niega a cumplir la misión que li quieren encomendar. Finalment, con una combinación de chantache y autorización ta que lis cobre a los familiars d'os secuestraus, McCabe accede. T'acompanyar-lo, o comandant Frazer designa a lo tenient Gary, encara como legalment un militar no puet dentrar en territorio indio, li ordena que deserte, y si la misión marcha mal, asinas Fraser no se trobará implicau.

Entre los colons que buscan a los suyos familiars, se troba Marty Purcell, una mesacha obsesionada en remerar a su chirmán menor Steve, que nomás teneba que 9 anyadas cuan lo secuestroron os comanches, porque ella s'amagó y no fació garra cosa t'aduyar-lo, y nomás conserva d'él que la remeranza y una antiga caixa de musica que yera lo chuguete favorito de Steve. McCabe li diz que fácil que Steve no tienga garra remeranza d'ella, en estar masiau nino cuan lo secuestroron. Un atro que ye buscando a un nino secuestrau, que ya estará un choven guerrero, ye Harry Wringle, un cabalero comerciant que no ye masiau intresau en cual sía lo nino que li porten, porque nomás quiere que acontentar a su muller, a qui los comanches roboron un nino d'o suyo primer matrimonio, y como él no ye lo pai real li diz a McCabe que li pagará una important recompensa por cualsiquier nino que li pueda levar.

Finalment McCabe y Gary marchan cabalgando chuntos enta lo campamento comanche y McCabe negocia con o chefe comanche, Quanah Parker,^[1] qui li diz que en a tribu bi ha cuatro captivos blancos, un mesache, una mesacha, una muller d'edat abanzada y una choven mexicana. Una d'as captivas no quiere tornar con os blancos, en estar casada con un comanche y tener-ne fillos. Una atra, la sinyora Clegg, no quiere tornar por verguenya y prefiere que su mariu y sus fillos la consideren ya muerta. Asinas, McCabe logra rescatar nomás que a dos captivos: o choven Running Wolf, qui ha decidiu que adchudicará a Harry Wringle como si estase lo suyo fillastro sía verdat u no, nomás que ta cobrar a recompesa, y la captiva mexicana, Elena de Madariaga. Elena ye la muller de Stone Calf, un chefe guerrero cheyenne enemigo de Quanah Parker, y Quanah aproveita asinas tamién ta fer-li mal a lo suyo rival, pero asinas tamién o camín de tornada enta lo fuerte se fa perigloso.

En considerar o periglo, McCabe decide esperar en una posición favorable porque sabe que Stone Calf l'atacará ta recuperar a su muller, pero lo tenient Gary decide que ye millor marchar de camín enta lo fuerte y se deseparan. Gary contina la marcha con o choven Running Wolf, y McCabe espera con Elena de Madariaga. Gary plega en o fuerte con o choven, pero Running Wolf amuestra clarament o suyo odio enta los blancos, en afirmando que ye un comanche, y Harry Wringle decide que no l'acceptará como fillastro. Una d'as mullers que son buscando a su fillo diz alavez que lo reconoix como lo suyo fillo robau, y l'esposo la refirma, asinas que legalment o comandant Frazer decide que Running Wolf ye lo fillo d'ixos colons. alavez plega en o fuerte McCabe con a sinyorita de Madariaga, porque a la fin ha podiu matar a Stone Calf, con gran satisfacción de Quanah Parker. Se troba con a sorpresa de que Ya no podrá cobrar a recompensa que li ufría Wringle, asinas que ha perdiu muitos diners en iste negocio.

Ixa nueit se fa un baile, y la sociedat blanca bienpensant amuestra clarament a suya esquiva enta Elena de Madariaga, en considerar que hese estau preferible que s'hese suicidau millor que convertir-se en a muller d'un indio, y McCabe s'escarcata muito. Antiparte, cuan la nueva mai de Running Wolf quiere tallar-li lo cabello, iste li gazupia as estixeras y la mata con ellas, y deciden enforcar-lo por o delicto. Cuan lo portan a arrecegons enta la forca, Running Wolf escuita lo soniu d'a caixa de musica y lo remera, porque en realidat yera Steve, lo chirmán de Marty Purcell, qui tampoco ista vegada puet fer garra cosa ta salvar-lo. Finalment, Marty Purcell accepta la proposición de voda d'o tenient Gary. McCabe finalment decide tornar enta lo suyo treballo de marshal en Tascosa, acompanyando a Elena de Madariaga ta que puye en una dilichencia y marche luent, y lo tenient Gary marcha tamién con él. Pero lo que McCabe no sabe ye que en a suya ausencia en Tascosa s'han celebrau unas eleccions a marshal....

Ta lo rodache d'a cinta de fació servir o plató que John Wayne heba construyiu en Texas ta rodar-ie The Alamo (1960).^[3]

A filmación distó muito d'estar pacifica; en primeras, a lo director John Ford no li cuacaba a novela en que se basaba lo guión y nomás acceptó que treballar-ie por o suyo elevau salario (225.000 dólars, amás d'o 25% d'os beneficios d'a cinta) y por a suya relación con o director de Columbia Pictures, Harry Cohn. Ni con l'aduya de Frank S. Nugent, o suyo guionista favorito con qui treballó en diez cintas, consideraba que lo guión yera adecuau y en fació a-saber-las modificacions mientres o rodache. Ford pensaba que yera muito millor a narración sobre o tema d'os captivos blancos d'os indios que ya heba feito en The Searchers en 1956 (con un guión de Nugent, d'atra man).

O papel de Quanah Parker ye interpretau por l'actor Henry Brandon, qui tamién heba treballau en The Searchers interpretando a lo chefe comanche Scar / Cicatriza.

Two Rode Together estió la quinzena cinta a on Jack Murray fació lo montache cinematografico ta John Ford, estando tamién a zaguera en morir meses entes d'enguerar-se la cinta.

Quim Casas considera que:^[4]

Antonio Méndez en AlohaCriticón afirma que:^[5]

En Fotogramas la califican de:^[6]

• Cine en 1961.
• Cintas de 1961.

• (en) Two Rode Together en Internet Movie Database.
• (en) Two Rode Together en TCM Movie Database.
• (en) Two Rode Together en AllMovie.
• (en) Two Rode Together en l' American Film Institute Catalog de l'American Film Institute.
• (en) / (es) Two Rode Together en FilmAffinity.
• (en) Two Rode Together en Rotten Tomatoes.
• (fr) Two Rode Together en Allociné.