Wahle BL

Wahle het diräkti Strosseverbindige uf Breitebach, Büsserach, Grindel und Laufe. Dr Dräger vom öffentlige Verchehr isch dr Schwiizerischi Postautodienst, wo am Tarifverbund Nordwestschwiiz bedeiligt isch.

Wichtigi Erwärbszwiig si d Landwirtschaft, s Gast- und s Chliigwärb.

Bim Bau vo dr Dorfchille het mä im Johr 1837 e Grabhügel gfunden, wo d Historiker dr Bronzezit zueordne. 1927 si Steichistegreber us em 8. Johrhundert zum Vorschiin cho. D Siidlig isch siinerzit an ere Römerstross gläge, wo vom Val Terbi in dr wälsche Schwiiz über e Blattebass am Blaue in d Nöchi vo Basel gfüehrt het. Dr Ortsname isch vom latiinische Vallum – das bedütet e Wall respektiv e Befestigung – abgleitet. En ersti urkundligi Erwähnig git s us dr zweite Helfti vom 12. Johrhundert under em Ortsname Waltenen. Denn zumol het dr Papst Alexander III. e Schwarzi Liste mit de wissentlige Find vom Chloster St. Alban gfüehrt. Dr Bischof vo Basel het er aagwiise, die us dr Chillegmeinschaft uszschliesse und s verbiete im Herzogtum vo de Zähringer Gottesdienst abzhalte. Under ihne si au d Brüeder vo Ramstei gsi, wo z Waltene Grundstück für sich beaasprucht hai.

Vom Drissigjöhrige Chrieg isch Wahle schwer betroffe worde. D Iiwohner hai sich im Nochberdorf Grindel in Sicherheit brocht.

1815 isch Wahle vom Wiener Kongräss em Kanton Bärn zuegordnet worde und het sidder zum Bezirk Laufe ghört. Ufgrund von ere Restrukturierig vo dr politische Gliiderig, wo in ere Volksabstimmig guetgheisse worden isch, ghört s Dorf sit em 1. Januar 1994 zum Kanton Basel-Landschaft.

S Wappe, wo vo dr Gmeind 1946 agnoh worden isch, wird wie folgt blasoniert: „In Rot e goldige Löu mit ere rote Zunge und ere silbrige Bewehrig, wo noch rächts lauf und e silbrige Baselstab hebt.“

• Offizielli Website vo dr Gmeind Wahle

1. ↑ Ständige Wohnbevölkerung nach Staatsangehörigkeitskategorie, Geschlecht und Gemeinde, definitive Jahresergebnisse, 2022. Bei späteren Gemeindefusionen Einwohnerzahlen aufgrund Stand 2022 zusammengefasst. Abruf am 5. September 2023