Johannes XVI.

Dr Johannes isch vu Rossano (hite z Kalabrie) gsii, wu dodmol zum Oschtremische Rych ghert ghaa het. Är isch e Griech gsii un vu dr Chaiseri Theophanu, dr griechische Frau vum Otto II., as Beroter an sächsische Hof gholt wore. Wie grätscht woren isch, hebe d Chaiseri un är e ehbrächerisch Verhältnis ghaa. Zwische 980 un 982 un in dr 991 un 992 het er as chaiserlige Chanzler z Italie dient. Derzue isch er syt 982 Abt vu Nonantola un syt 988 Erzbischof vu Piacenza gsii.

Är isch vum Otto III. zäme mit em Würzburger Bischof Bernward uf Byzanz gschickt wore, go dert fir ihn e Brut finde. Uf dr Ruggchehr het si dr Johannes – wu si schyns arg verschetzt ghaa het, wie d Lag gsii isch – vum Crescentius I. Nomentanu, em Aafierer vu dr Opposition im remische Adel, verlaite loo, si vum remische Klerus zum Bischof wehle un vum Volk bstetige z loo. Des het dr Otto 998 zuen eme Romfäldzug brocht. Voreb där aachuu isch, isch dr Papscht Johannes in d Campagna gflichtet. In eme Durm isch er entdeckt, gruusig entstellt un uf Rom brocht wore. Dr Chaiser het dr friejer Lehrer vum Papscht Gregor V. ohni Auge, Ohre, Nase un Zunge, aber in päpschtligi Hees aaglait verchehrt ume uf eme Esel mit eme Chue-Uter as Chappe in ere Schandprozässion dur Rom jage un un uf Ghaiß vum Papscht Gregor vor e Synod bringe loo. Dert isch dr Gegepapscht Johannes formell abgsetzt wore. No dr Absetzig isch er wider uf em Esel dur d Mängi gfiert wore. Derno isch dr Johannes in e Chloschter abgschobe wore, wun er wahrschyns au gstorben isch e baar Johr speter. Dr Crescentius I. Nomentanus isch as Aastifter uf dr Ängelsburg gchepft wore.

Nit dr Chaiser un au nit Papscht sin schuld gsii, ass ire Gegener eso gruusig zuegrichtet woren isch, Des Schauspil, wu dr Papscht ghaiße ghaa het, isch aber fir beedi ne argi Schand gsii. Dr Chaiser Otto het si syner Läbdig mit Hailige umgee. Vor em Spektakel z Rom isch jetz dr fascht nyynzgjehrig Aisidler Nilus vu Rossano erschine, wu ai Johr vorhär no dr Gegepascht gwarnt ghaa het, un het bim Chaiser un bim Papscht um Gnad fir dr Gstirzt bäte. Wu beedi ihm des verwaigeret hän, het dr wietig Hailig lut mit em Gottesgricht droht.

No dr Absetzig vum Johannes isch dr Gregor V., e Kusäng vum Otto III., wider unumstrittene Pontifex Maximus gsii. D Crescentier hän aber nonig ufgee.

• Giovanni XVI. In: Mario Caravale (Hrsg.): Dizionario Biografico degli Italiani (DBI). Band 55 (Ginammi–Giovanni da Crema), Istituto della Enciclopedia Italiana, Rom 2000, S. 590–595 (italienisch).
• Wolfgang Huschner: Giovanni XVI. In: Massimo Bray (Hrsg.): Enciclopedia dei Papi. Band 2: Niccolò I, santo, Sisto IV. Istituto della Enciclopedia Italiana, Rom 2000, S. 112–116 (treccani.it).
• Michael Tilly: Johannes XVI. In: Biographisch-Bibliographisches Kirchenlexikon (BBKL). Band 3, Herzberg 1992, ISBN 3-88309-035-2, Sp. 214–215.
• Harald Zimmermann: Johannes XVI. Philagathos. In: Lexikon des Mittelalters (LexMA). Band 5, Artemis & Winkler, Münche/Züri 1991, ISBN 3-7608-8905-0, Sp. 542–543.

• Giovanni Filagato, In: Salvador Miranda: The Cardinals of the Holy Roman Church, online uf fiu.edu, Websyte vu dr Florida International University (änglisch)