Jakob Dubs

De Jakob Dubs (* 26. Juli 1822 z Affoltern am Albis; † 13. Januar 1879 z Losann) isch en Schwiizer Politiker (FDP) gsii.

Er isch am 26. Juli 1822 z Affoltern am Albis i d Familie vomene Metzger uf d Wält cho. Er hät s Gymnasium in Züri bsuecht und dänn Recht in Bern schtudiert. Scho früeh hät er sich i dr Politik betätiget, hät a de Freischarezüüg und am Sonderbundchrieg aktiv teilgnaah.

De Jakob Dubs hät d Underschtützig vom Alfred Escher ghaa. 1847 hät mer ihn in Zürcher Grosse Rat gwählt, 1849 in Nationalrat, 1854 in Zürcher Regierigsrat und in Schtänderat.

Am 30. Juli 1861 isch de Jakob Dubs vo dr Bundesversammlig im Erschte Wahlgang in Bundesrat gwählt worde.

De Dubs hät sich für e Revision vo dr Bundesverfassig iigsetzt, isch aber schliesslich im Mai 1872 zruggträte, wil ihm di endgültig Fassig zu zentralistisch erschine isch. De Dubs hät denaa di üsserscht homogeni Gruppe vo de Revisionsgegner aagfüert, wos glunge isch, d Totalrevision 1872 z Fall z bringe.

De Jakob Dubs hät vo 1854 bis 1861 als nebeamtliche Bundesrichter gamtet. 1875 isch er zum vollamtliche Bundesrichter uufgschtige.

Während siinere Amtsziit als Bundesrat isch de Jakob Dubs de folgende Departement vorgschtande:

• 1861–1863: Juschtiz- und Polizeidepartement
• 1864: Politischs Departement
• 1865: Departement vom Innere
• 1866: Juschtiz- und Polizeidepartement
• 1867: Poschtdepartement
• 1868: Politischs Departement
• 1869: Poschdepartement
• 1870: Politischs Departement
• 1871–1872: Departement vom Innere

Er isch Bundespräsident gsii i de Jahre 1864, 1868 und 1870 und Vizepräsident i de Jahre 1863 und 1867.