TSG 1899 Hoffenheim

Die klub is in 1899 gestig as Turnverein Hoffenheim. Na die samesmelting van die gimnastiek- en sokkerverenigings in 1945 het TSG Hoffenheim ontstaan.

Die opmars van die klub het in 1990 begin, terwyl die klub nog in die A-Klasse ('n lae amateurdivisie) meegeding het, toe Dietmar Hopp, een van die grondleggers van die sagtewarereus SAP, by die klub betrokke geraak het. Hopp was in sy jeugjare by die klub betrokke en het as hoofborg op die toneel verskyn.

Na 'n reeks promosies in die Bezirks-, Landes- en Verbandsliga word die klub in die 2000/01-seisoen as debutant kampioen in die Oberliga Baden-Württemberg. Die klub het in 2007 na die 2. Bundesliga gepromoveer en na slegs een seisoen sensasioneel na die Bundesliga gepromoveer.

Die klub het in 1999 die Dietmar Hopp-stadion met 'n kapasiteit van 5 000 in gebruik geneem. Die klub sal in 2009 sy intrek neem in die splinternuwe Rhein Neckararena, wat tans in aanbou is in Sinsheim en met 'n kapasiteit van 30 000 voldoen aan Bundesliga-standaarde. Intussen sal die klub die Carl Benz-stadion in Mannheim as tuisveld gebruik vir Bundesliga-wedstryde.

• Amptelike klubblad
• Abseits Guide to German Soccer