Joël

Joël is die 29ste boek in die kanon van Hebreeuse Geskrifte wat as die Ou Testament in die Bybel opgeneem is. Hierdie boek is die tweede van die sogenaamde twaalf Klein Profete. Daar is min oor die lewe van die profeet Joël bekend en daar bestaan ook onsekerheid oor die tyd van sy optrede. Hy verwys na die sprinkaanplae en 'n droogte, en sien in hierdie natuurrampe 'n teken van die aanbreek van die laaste dae wanneer God dié sal oordeel wat teen Hom in opstand is. Die volk word opgeroep om hulle te bekeer, met die belofte van tydelike en geestelike seën, veral dat God sy Gees op alle mense sal uitstort.